ހިޔާ ފްލެޓު ލިބުނު މީހުންގެ ތެރެއިން ފްލެޓް އެއްބަސްވުމުގައި ސޮއިނުކުރާ މީހުންނަށް ފަހުގެ މުހުލަތު ދީ، ސޮއިކުރަން ނުދާ ނަމަ ފްލެޓު އެއްބަސްވުން ބާތިލުކުރަން ސަރުކާރުން ނިންމައިފިއެވެ.
ޕްލޭނިންގ މިނިސްޓްރީއިން ކޮށްފައިވާ އިއުލާނެއްގައި ބުނެފައި ވަނީ ހިޔާ މަޝްރޫއުގެ ދަށުން އިމާރާތް ކޮށްފައިވާ 6720 ފުލެޓު ލިބުމަށް ހޮވިފައިވާ ފަރާތްތަކަށް ފުލެޓު އެގްރީމަންޓްގައި ސޮއިކުރުމުގެ ކަންކަން ނިންމުމަށް ވަރަށްގިނަ ދުވަސްތަކެއް ދީފައިވާ ކަމަށެވެ.
ނަމަވެސް 40 މީހަކު އަދިވެސް އެގްރިމެންޓްގައި ސޮއިނުކުރާ ކަމަށާއި އެ ފަރާތްތަކަށް އިތުރު ފުރުޞަތެއް ދިނުމަށް ނިންމާފައިވާ ކަމަށެވެ.
މިހާތަނަށް އެއްބަސްވުމުގައި ސޮއިނުކުރާ 40 މީހެއްގެ ވަނަވަރު ވެސް ޕްލޭނިން މިނިސްޓްރީގެ އެ އިއުލާނުގައި އާންމުކޮށްފައިވާ ވާއިރު، އެ ލިސްޓްގައިވާ ފަރާތްތަކުން މި މަހުގެ 29 ވަނަ ދުވަހުގެ ކުރިން އެޗްޑީސީއަށް ވަޑައިގެން އެގްރީމަންޓްގެ ކަންކަން ނިންމުމަށް މިނިސްޓްރީއިން ވަނީ އެދިފަ އެވެ.
އެ މުއްދަތުގައި އެގްރީމަންޓްގައި ސޮއިނުކުރާ ފަރާތްތަކުގެ ފުލެޓު ލިބުމަށް ހޮވިފައިވާ ހޮވުން ބާތިލްވާނެ ކަމަށް ވެސް އިއުލާނުގައި ބުނެފައި ވެއެވެ.
ހިޔާ ފްލެޓުގައި މީހުން ދިރިއުޅެން ފެށިތާ އަހަރެއްހާ ދުވަސް ވެފައިވާއިރު، އެ ތަނުގައި ހުރި 16 ފްލެޓުގައި އެތައް އާއިލާއެއް މިހާރު ދިރިއުޅެ އެވެ.
Advertisement
This content is created and paid for by advertisers and does not involve Voice Journalists
