ތިމާގެ އަމިއްލަ ނަފުސަށް ހެޔޮއެދޭމީހާ، ހެޔޮ ޢަމަލު ކުރުމުގައި ފަސްޖެހިގެން ނުވާނެކަމަށް މިއަދުގެ ހުކުރުޚުތުބާގައި ބުނެފިއެވެ.

"ތިމާ ކުޅަ ޢަމަލު ތިމާ ދެކޭނެ" މި މައުޟޫއަށް މިއަދު އިއްވި ޚުތުބާގައި ބުނީ، ދުނިޔޭގައި އިންސާނާ ކުރާ ޢަމަލުތައް އޭނާ ޤިޔާމަތްދުވަހުން ދެކޭނެކަމަށް އީމާންވާ ހިނދު، އޭނާގެ އުޚުރަވީ ބާއްޖަވެރިކަމާއި އަބާއްޖަވެރިކަން ބިނާ ވެފައިވަނި އެ ޢަމަލުތަކުގެ މައްޗަށް ކަމަށެވެ.

"އިންސާނާއަށް ސުވަރުގެވަދެވޭ ވަސީލަތަކީ، އޭނާ ކޮށްފައިވާ ހެޔޮ އަމަލު ކަމުގައިވާ ހިނދު، ތިމާގެ އަމިއްލަ ނަފުސަށް ހެޔޮއެދޭމީހާ، ހެޔޮ ޢަމަލު ކުރުމުގައި ފަސްޖެހިގެން ނުވާނޭ ކަމާމެދަކު ޝައްކެއްނެތެވެ. އެހެންކަމުން ބުއްދިވެރިއަކީ ހެޔޮ ޢަމަލުކުރުމުގައި ކުރިއަރައިދާ މީހާއެވެ." ޚުތުބާގައި ބުނެފައިވެއެވެ.

އެހެންކަމުން ދުނިޔޭގެ އަރާމަށްވުރެ އާޚިރަތަށް އެދިގެން އެދުވަހުގެ ބާއްޖަވެރިކަން ލިބުމަށް އެދި މަސައްކަތްކުރުމަށް ޚުތުބާގައި ވަނީ ގޮވާލާފައެވެ.

"މާތްﷲ ވަޙީ ކުރައްވާފައިވާ ބަސްފުޅެއްގެ މާނަގައިވެއެވެ. “ދުނިޔޭގެ އަރާމަށް އެދޭމީހާ (ދަންނާށެވެ!) ތިމަންރަސްކަލާނގެ އިރާދަކުރައްވާކަމެއް ތިމަން ރަސްކަލާނގެ އިރާދަ ކުރައްވާމީހަކަށް، ދުނިޔެމަތީގައި ދެއްވާހުށީމެވެ. ދެން އެމީހަކަށްޓަކައި ތިމަން ރަސްކަލާނގެ ނަރަކަ ލެއްވީމެވެ. މަލާމާތްލިބި، ރަޙުމަތުން ދުރު ކުރައްވާފައިވާ ހާލު، އެނަރަކައަށް އެމީހަކު ވަންނާނެއެވެ". ޚުތުބާގައި ބުނެފައިވެއެވެ.
މިއާއެކު ހުތުބާގައި ބުނީ ކިތަންމެ ކުޑަ އަމަލެއް ވިޔަސް އަދި ބޮޑު އަމަލެއް ވިޔަސް އެމީހެއްގެ ފަތުގައި ލިޔެފައިވާތަން ދެކޭނެ ކަމުގައެވެ. އާހިރަތް ދުވަހަށް އީމާންވުމުގެ ތެރޭގައި ހިމެނޭ ހަގީގަތްތަކުގެ ތެރެއިން އެއް ކަމަކީ، ދުނިޔޭގައި އިންސާނާ ކުރާ އަމަލުތައް ފަތެއްގެ ގޮތުގައި އޭނާ ދެކޭނެކަމަށް އީމާން ވުމެވެ.
މީސްތަކުން ކިތަންމެ ވަންހަނާ ގޮތެއްގައި ކުރާ އަމަލަކަސް އިންސާނަކު ކުރާ އަމަލެއް މާތް ރަސްކަލާނގެ ދެނެވޮޑިގަންނަވާނެ ކަމަށް ހުތުބާގައި ބުނެފައިވެއެވެ. އަދި ސުވަރުގޭގެ ވަސީލަތަކީ އެމީހަކު ކޮށްފައިވާ ހެޔޮ އަމަލު ކަމަށް ވާއިރު، ހެޔޮ އަމަލު ކުރުމުގައި ފަސް ނުޖެހުމަށް ހުތުބާގައި ވަނީ ގޮވާލާފައެވެ.
ގިޔާމަތް ދުވަހުން އެމީހެއްގެ ފަތް ކަނާތަށް ލިބިއްޖެ މީހަކީ ބާއްޖަވެރިއެއް ކަމަށާއި، އެމީހެއްގެ ފަތް ފުރަގަހުން (ވާތަށް) ދެވިއްޖެ މީހަކީ އަބާއްޖަވެރިއެއް ކަން ހުތުބާގައި ބަޔާންކޮށްފައިވާއިރު، ދުނިޔެ އެދޭ އަޅަކަށް ދުނިޔަވީ ހުރިހާ ކަމެއް މިންވަރު ކުރެއްވުމާއި، އާހިރަތް އެދޭ މީހާއަށް، ބާއްޖަވެރި އާހިރަތެއް ލިބުމުގައި އޮތީ މާތް ރަސްކަލާނގެ އިރާދަފުޅުކަން ހުތުބާގައި ވަނީ ފާހަގަކޮށްފައެވެ.