އެއްޖިންސުން ގުޅުން ހިންގި މައްސަލާގައި ދައުވާކޮށްފައިވާ ގާނޫނީ ވަކީލު ނާޒިމް ސައްތާރުގެ ޝަރީއަތް އަންނަ އާދީއްތަ ދުވަހު ފަށަން ކްރިމިނަލް ކޯޓުގައި ތާވަލުކޮށްފި އެވެ.

ކްރިމިނަލް ކޯޓުން ނެރެފައިވާ ތާވަލްގައިވާގޮތުން އަންނަ އާދީއްތަ ދުވަހު 1:30 ގައި ނާޒިމް ސައްތާރުގެ އެއްޖިންސުން ޖިންސީ ގުޅުން ހިންގި މައްސަލައިގެ ޝަރީއަތް ބޭއްވުމަށް ވަނީ ހަމަޖެހިފައެވެ. އަދި އެ ޝަރީއަތުގެ އަޑުއެހުން ކުރިއަށްދާނީ ސިއްރު އަޑުއެހުމެއް ގޮތުގައި ކަމަށްވެސް އެކޯޓުން ހާމަކޮށްފައިވެއެވެ.

ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގިރި އާއި އެކު އެއްޖިންސުން ގުޅުން ހިންގާ ކަމަށް ތުހުމަތު ކުރެވޭ ވީޑިއޯ އަކާއި ގުޅިގެން ފުލުހުން ނާޒިމް ސައްތާރު ހައްޔަރު ކޮށްފައިވަނީ ނިމިދިޔަ ޖުލައި މަހުގެ 28 ވަނަ ދުވަހުއެވެ. އެއަށްފަހު އޭނާގެ ބަންދުގެ މުއްދަތު އިތުރު ކުރުމަށްފަހު މިހާރު ވަނީ ބަންދުން ދޫކޮށްލާފައެވެ.

Advertisement

އެއަށްފަހު އެ މައްސަލާގައި ނާޒިމްގެ މައްޗަށް އުފުލާފައިވާ ދައުވާގެ ޝަރީއަތް އާދީއްތަ ދުވަހު ފަށަން ތާވަލްކޮށްފައިވާއިރު އެ މައްސަލާގައި އަމިއްލަ އިއުތިރާފުން ކުށް ސާބިތުވެ އަލަމްގީރަށް 7 މަހާއި 7 ދުވަހުގެ ޖަލު ހުކުމެއް މިދިޔަ މަހުގެ 31 ވަނަ ދުވަހު ކްރިމިނަލް ކޯޓުން ވަނީ އިއްވާފައެވެ.
އަލަމްގީރް އާއި އެކު އެއްޖިންސުން ގުޅުން ހިންގި ކަމަށް ތުހުމަތު ކުރެވޭ މީހުންގެ ތެރޭގައި ގާނޫނީ ވަކީލް ނާޒިމް ސައްތާރާއި ކުރީގެ މަޖިލިސް މެމްބަރު މުހައްމަދު ނަޝީދު (ކާނަލް)ގެ އިތުރުން ފުލުހުންގެ ޑްރަގް އެންފޯސްމެންޓް ޑިޕާޓްމެންޓުގެ ސީނިއާ މީހެއް ކަމުގައިވާ ސާޖަންޓް އަބްދުއްރަހުމާން ރަފީއު ހިމެނެއެވެ. ތަހުގީގަށް ފަހު ބަންދުން އެ މީހުން ދޫކޮށްލާފައިވާއިރު އެ މީހުންގެ މައްޗަށް ވެސް ވަނީ ދައުވާ އުފުލާފައެވެ. އޭގެ އިތުރުން ބައެއް މުދިމުންނާއި ޓީޗަރުންކަމަށް ބުނާ ބައެއްގެ ވީޑިއޯވެސް ވަނީ ލީކްވެފައެވެ.