މީހާ އަޅާފައި ހުންނަ ހެދުމާއި ގުޅުވައިގެން ފުރައްސާރަ ކުރުމަކީ ބަލައިގަނެވޭނެ ކަމެއް ނޫންކަމަށް އަދާލަތުޕާޓީގެ ރައީސް އަދި ހޯމް މިނިސްޓަރ އިމްރާން ވިދާޅުވެއްޖެއެވެ.

މޫނު ބުރުގާ އަޅައިގެން މަގުމަތިން ހިނގާފައި ދިޔަ މީހެއްގެ މޫނު ފޮތިކޮޅު (ނިޤާބް) އަށް ދަމައި އޭނާއަށް ފުރައްސާރަ ކުރި މައްސަލައެއް ފެންމަތިވުމާއި ގުޅިގެން ޢިމްރާން ކުރެއްވި ޓުވީޓެއްގައި ވިދާޅުވީ، އަޅާފައި ހުންނަ ހެދުމާއި ގުޅުވައިގެން ފުރައްސާރަ ކުރުމަކީ ބަލައިގަނެވޭނެ ކަމެއް ނޫންކަމަށެވެ. 

"ވަކިން ޚާއްސަކޮށް އިސްލާމީ މުޖުތަމަޢު އެއްގައި ނިގާބުވެގެން ތިބޭ އަންހެންނުންނަށް ފުރައްސާރަ ކޮށް ގަޔަށް އަތްލުމަކީ އަޅާނުލާ ދޫކޮށްލެވޭނެ ކަމެއް ނޫން." ޢިމްރާން ވިދާޅުވިއެވެ.

މިއާއެކު އިމްރާން ވަނީ އެފަދަ މައްސަލަތައް ހައްލުކުރުމަށް ޚާއްސަ އިސްކަމެއް ދެއްވާނެ ކަމަށް ވިދާޅުވެފައެވެ.

ރޭ އިރާކޮޅު މޫނު ބުރުގާ އަޅައިގެން ހުރި އަންހެނަކު ގެއަށް ދިޔަ މަގުމަތީ ފިރިހެނަކު އަންހެން މީހާގެ ބުރުގާގައި ހިފައި ދަމައިގަތުމަށްފަހު "ނިންޖާ"އޭ ކިޔާ އޭނާއާ ދިމާއަށް ހަޅޭއްލެވި ކަމަށް އެމީހާ ކުރި ޓުވީޓެއްގައި ބުނެފައިވެއެވެ. އަދި އެ ހާދިސާ ހިނގީ މަޖީދީ މަގުގައި ކަމަށްވެސް އޭނާ ބުނެފައިވެއެވެ.

"އަހަރެން ގެއަށް އައި މަގުމަތީ، މަޖީދީ މަގުމަތިން ފިރިހެނަކު އަހަރެންނާ ދިމާއަށް 'ނިންޖާ' އޭ ކިޔައި ހަޅޭލަވައި ގަނެފައި، އަހަރެންގެ ނިޤާބަށް ދަމައި ގަތީ." އަންހެން މީހާ ބުނެފައިވެއެވެ