އަނިޔާކުރުމަކީ ހަމައެކަނި ތަޅައިގެން އަނިޔާކުރުމެއް ނޫން ކަމަށް ބުނެ ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު ހޯމް މިނިސްޓަރ ޢިމްރާނަށް ރައްދުދެއްވައިފިއެވެ.

ކިތަންމެ ބޮޑު ކުށެއް ކުރިޔަސް ޤައިދީއަކަށް އަނިޔާކުރުމަކީ ކުރެވޭނެކަމެއް ނޫންކަމަށް އިމްރާނު ވިދާޅުވުމާއި ގުޅިގެން އެކަމަށް ރައްދު ދެއްވައި ވަހީދު ކުރެއްވި ޓްވީޓެއްގައި ވިދާޅުވީ، އަނިޔާކުރުމަކީ ހަމައެކަނި ތަޅައިގެން އަނިޔާކުރުމެއް ނޫން ކަމަށެވެ.

"ބޭނުންވާ ފަރުވާއިން މަހުރޫމް ކުރުމަކީވެސް އަނިޔާއެވެ. ކުދި ގޮޅިގޮޅީގައި ގިނަ ގައިދީންތަކެއް ބޭތިއްބުމަކީވެސް އަނިޔާއެވެ. ކުދި ކުށްތަކުގައި ޝާމިލްވާ މީހުންނާ ބޮޑެތި ކުށްކުރާ މީހުން އެއްތަން ކުރުމަކީވެސް އަނިޔާއެވެ." ވަހީދު ވިދާޅުވިއެވެ.

Advertisement

މޯލްޑިވްސް ކަރެކްޝަނަލް ސަރވިސްއަށް 51 އަހަރު ފުރުން ފާހަގަކުރެއްވުމަށް ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުން ޢިމްރާން ވިދާޅުވީ ޖަލުތަކުގައި ނުރައްކާތެރި ޤައިދީން ބެލެހެއްޓުމަކީ ބިރުވެރި, ދަތި އުނދަގޫ, ގޮންޖެހުން ބޮޑުކަމެއްކަމަށެވެ.

އަދި އެމަސައްކަތް ކުރަން ތިއްބެވި އޮފިސަރުންނަކީ ވަރަށް ކެތްތެރި ޤާބިލް އިހުލާސްތެރި ބައެއްކަމަށެވެ. އެބޭފުޅުން ކޮށްދެއްވަނީ ވަރަށްބޮޑު ޤައުމީ މަސައްކަތެއްކަން ފާހަގަކުރައްވާ, އޮފިސަރުންނާއި, އޮފިސަރުންގެ އާއިލާތަކަށް މިނިސްޓަރ ޝުކުރު އަދާކުރެއްވިއެވެ. އަދި އެއާއެކު މިނިސްޓަރ ވަނީ އޮފިސަރުން އިތުރަށް ކެތްތެރިވެވަޑައިގަތުމަށް އިލްތިމާސްކުރައްވާފައެވެ.

"ތި ޔަބޭފުޅުން މިހާރަށްވުރެވެސް ބޮޑަށް ކެތްތެރިވެވަޑައިގަންނަވާށޭ. މިހާރަށްވުރެ ބޮޑަށް ހިތްތިރިކުރާށޭ. އޯގާވެރިކަމާއި ރަހުމު އިސްކުރާށޭ. ޤައިދީއަކަށް އަނިޔާކުރުމަކީ ކުރެވޭނެކަމެއް ނޫން. އެއީ ކިތަންމެ ބޮޑު ކުށެއްކޮށްފައިވާ ޤައިދީއެއް ނަމަވެސް." އިމްރާން ވިދާޅުވިއެވެ.

ރާއްޖޭގެ ޖަލުތަކުގެ ހާލަތު ގޯސް ވެފައިވާ ވާހަކައަކީ ސިޔާސީ ލީޑަރުންނާއި އާއްމުންވެސް ކަންބޮޑުވާ ބޮޑު މައްސަލައެކެވެ. އެގޮތުން އެ ޖަލެއްގައި އެތައް ގައިދީން ބަހައްޓާ މައްސަލަ އާއި ގައިދީންނަށް ލިބެންޖެހޭ ސިއްހީ ފަރުވާ ނުލިބޭ މައްސަލަ އަކީ ގިނަ ބަޔަކު ފާހަގަކުރާ މައްސަލަ ތަކެކެވެ.