ހުކުރު ޚުތުބާ އައްޑޫ ބަހުރުވައިން ވިދާޅުވުމުން ސަސްޕެންޑު ކުރި އައްޑު އަތޮޅު މީދޫ މުދިމުކަން ކުރައްވަމުން ގެންދަވާ މުހައްމަދު ރަޝީދު މައްސަލަ ބޮޑަށް ބަލަނީ ޚުތުބާއަށް އުނިއިތުރު ގެނައުމުން ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން މިއަދު ބުނީ، މިނިސްޓްރީ އޮފް އިސްލާމިކް އެފެއާޒް އިން 10 ޖުލައި 2018 ގައި ގެޒެޓް ކޮށްފައިވާ "ރާއްޖޭގައި އިމާމުވެ ހުކުރުނަމާދާއި، ޢީދުނަމާދާއި، ކޭތަނަމާދު ކުރުމުގެ ހުއްދަ ދިނުމުގެ އުޞޫލު" އާ ޚިލާފަށް އައްޑޫ ސިޓީ މީދޫގައި ޚަޠީބަކު ހުކުރު ޚުތުބާ ކީ މައްސަލައެއްގައި، އެމައްސަލަ ބަލާ ނިމެންދެން ވަގުތީ ގޮތުން، އެ ޚަޠީބަށް ހުކުރު ކުރަން ނުޖައްސަން އައްޑޫގައި އޮންނަ ޚުޠުބާ ކޮމިޓީއިން ނިންމާފައިވާ ކަމަށެވެ.
އަދި އެ އުސޫލުގެ ދަށުން ޚުޠުބާއަށް އުނި އިތުރު ގެނައުމަކީ މަނާ ކަމެއްކަަން ފާހަގަކޮށް އިސްލާމިކް މިނިސްޓްރީން ބުނީ، ވަކި ބަހުރުވައަކުން ޚުޠުބާކިޔުމުގެ މައްސަލައަކަށްވުރެ ބޮޑަށް، އެމައްސަލަ ބަލަމުން ގެންދަނީ ކަނޑައެޅިފައިވާ އުޞޫލާ ޚިލާފަށް، މިނިސްޓްރީ އޮފް އިސްލާމިކް އެފެއާޒުން ނެރެފައިވާ ހުކުރު ޚުޠުބާއަށް އުނި އިތުރު ގެނައި މައްސަލައެއްގެ ގޮތުގައި ކަމަށެވެ.
މުހައްމަދު ރަޝީދު ވަނީ މިދިޔަ ހުކުރު ދުވަހު މީދޫ މަސްޖިދުއް މަޖްދުއްދީނުގައި ހުކުރު ހުޠުބާ ވިދާޅުވިއިރު މިނިސްޓްރީ އޮފް އިސްލާމިކް އެފެއާޒުއިން ފޮނުވި ހުޠުބާ އައްޑޫ ބަހުރުވައަށް ބަދަލުކޮށްގެން ވިދާޅުވެފައެވެ.
އައްޑޫ ބަހަށް ޚުތުބާ ބަދަލު ކުރީ ހުކުރަށް ދާ ބިދޭސީންވެސް ހުޠުބާގައި ކިޔާ އެއްޗެއް ސާފު ނުވާ ކަމަށްކަމަށް ބުނެ ޝަކުވާކުރަމުންދާތީ، އެމީހުންނަށްވެސް ޚުތުބާ ސާފުކޮށްދެއްވުމަށްކަމަށް އިބްރާހިމް ރަޝީދު ވަނީ ވިދާޅުވެފައެވެ. އަދި އެބަހުން ކީ ނަމަވެސް ޚުތުބާގެ މައިގަނޑަށް އެއްވެސް ބަދަލެއް ގެނެސްފައި ނުވާނެކަމަށާ، ޤުރުއާނާއި ހަދީސް އާއި އޭގެ މާނަ ކިޔާފައިވާނީ ހުޠުބާގައި އޮތް ގޮތަށްކަމަށް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
