ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނަށް އެންމެ ކުޑަ އުޖޫރަ ނުވަތަ މިނިމަމް ވޭޖް ދިނުން ވަކި މުއްދަތެއް ނެތް ގޮތަށް ފަސްކުރުމަށް އެދި ބިލެއް ރައްޔިތުންގެ މަޖިލީހަށް ހުށަހަޅައިފިއެވެ.
ވަޒީފާއާއިބެހޭ ޤާނޫނަށް މި އިސްލާހު ހުށަހެޅުއްވީ ރައްޔިތުންގެ މަޖިލީހުގެ ކުޅުދުއްފުށީ ދެކުނު ދާއިރާގެ މެންބަރު ޖަމްޝީދު މުހައްމަދު އެވެ.
މިނިމަމް ވޭޖު ނުވަތަ އެންމެ ކުޑަ އުޖޫރަ ހިމަނައިގެން ވަޒީފާއާ ބެހޭ ޤާނޫނަށް ގެނައި އިސްލާހުގައިވާ ގޮތުން ބިދޭސީންނަށް އެންމެ ކުޑަ އުޖޫރަ ދިނުން ލާޒިމުވާނީ އެ ޤާނޫނު ތަސްދީގުވެ އެންމެ ކުޑަ އުޖޫރަ ތަންފީޒުކުރަން ފަށާތާ 2 އަހަރު ފަހުންނެވެ. އަދި އެ މުއްދަތުގެ ތެރޭގައި ބިދޭސީންގެ އެންމެ ކުޑަ އުޖޫރަ ކަނޑައެެޅުން ޤާނޫނުގައި ލާޒިމުކުރެއެވެ.
ޖަމްޝީދުގެ ފަރާތުން މަޖިލީހަށް ހުށަހެޅުއްވި ބިލުގައި ވަނީ، ދުނިޔެެއަށް މިހާރު ކުރިމަތިވެފައިވާ އިޤްތިޞާދީ ހާލަތުގެ ސަބަބުން ރާއްޖޭގެ އިޤްތިޞާދަށްވެސް އޭގެ ނޭދެވޭ އަސަރު ކޮށްފައިވާތީ އެކަމަށް ރިޢާޔަތްކޮށް މަސައްކަތް ތެރިންނަށް މުސާރައިގެ ގޮތުން އެންމެ ކުޑަމިނުން ދޭންޖެހޭ އުޖޫރަ ބިދޭސީ މަސައްކަތްތެރިންނާއި ގުޅޭގޮތުން ވަޒީފާދޭ ފަރާތްތަކުން އަމަލު ކުރަން ލާޒިމް ކޮށްފައިވާ ދެ އަހަރުގެ މުއްދަތަށް ބަދަލު ގެނައުމަށެވެ.
އެ ބިލުމުގެ މަޤުޞަދެއް ކަމުގައި ބުނެފައިވަނީ ބިދޭސީންނަށް އެންމެ ކުޑަ އުޖޫރަ ދޭން ފަށާނެ ވަކި ތާރީޚެއް ކަނޑައެޅުމުގެ ބަދަލުގައި އެކަމަށް އަމަލުކުރަން ފަށާނީ ރާއްޖޭގެ އިޤުތިޞާދީ ހާލަތާއި ޤައުމުގެ އުފެއްދުންތެރިކަމާއި ފުދުންތެރިކަމަށް ރިއާޔަތްކޮށް، މިނިމަމް ވޭޖު އެޑްވައިޒަރީ ބޯޑުން އަރުވާ ލަފައެއްގެ މަތިން މިނިސްޓަރު ކަނޑައަޅުއްވައި އާންމުކުރާ ތާރީޚެއްގައި ކަމަށް ޤާނޫނުގައި ކަނޑައެޅުން ކަމަށެވެ.
Advertisement
This content is created and paid for by advertisers and does not involve Voice Journalists
