ދިވެހިރާއްޖޭގެ ރައްޔިތުން މިއަދު އެދި ގޮވަނީ އިދިކޮޅު ކޯލިޝަންގެ ރިޔާސީ ކެންޑިޑޭޓް އަދި ކުރީގެ ރައީސް، ރައީސް ޔާމީން އަބްދުލްގައްޔޫމް ގެ ތަރައްގީއަށް ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ވިދާޅުވެއްޖެއެވެ.
ކަރެކްޝަނަލް ސަރވިސްގެ 51 ވަނަ އަހަރީ ދުވަސް ފާހަގަކުރުމުގެ ގޮތުން ރޭ ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ޔާމީން ޖަލަށް ލެވުނަސް ރިހިބިލިޓޭޓް ޕްރޮގްރާމްގައި ބައިވެރިވާން ޖެހޭނެ ކަމަށް ހޯމް މިނިސްޓަރ އިމްރާން ވިދާޅުވުމާއި ގުޅިގެން, ނުރުހުން ފައުޅުކޮށް މޮސްޓާ ކުރެއްވި ޓުވީޓެއްގައި ވިދާޅުވީ ރައީސް ޔާމީން ޖަލަށްލައި އެމަނިކުފާނުގެ އަގު ވައްޓާލުމަށް މަސައްކަތް ކުރެއްވި ނަމަވެސް އެގޮތަށް އެކަން ނުވާނެ ކަމަށެވެ.
އަދި ރައްޔިތުން މިއަދު އެދި ގޮވަނީ ރައީސް ޔާމީންގެ ތަރައްގީއަށް ކަމަށްވެސް މޮސްޓާ ވިދާޅުވިއެވެ.
"މިހާރު ކޯޓުން ހުކުމް ނުކުރަނީސް ޝެއިޚް އިމްރާން ކުރީބައިގައިތި ނިއްމާލީ ދޯ ކޮންމެ ގޮތަކުން ނަމަވެސް ރައީސް ޔާމީން ޖަލައްލާ ރައްޔިތުންގެ ކުރިމަތީގައި ހިތުން އަގު ވައްޓާލާނަމޭ. އެހެން އެކަން ނުވާނެ ރައްޔިތުން މިއަދު އެދި ގޮވަނީ ރައީސް ޔާމީންގެ ތަރައްގީއަށް." މޮސްޓާ ވިދާޅުވިއެވެ.
ރޭގެ ރަސްމިއްޔާތުގައި ވާހަަކަ ދައްކަވަމުން ހޯމް މިނިސްޓަރު އިމްރާން ވިދާޅުވީ އަމާޒަކީ ކަރެކްޝަން ސާވިސްގެ ބެލުމުގެ ދަށުގައި ތިބޭ ހުރިހާ ގައިދީންނަކީ ވެސް ރެހިބިލިޓޭޓް ވާންޖެހޭ ގައިދީންނަށް ހެދުން ކަމަށެވެ.
އެގޮތުން އަމާޒަކީ ކަރެކްޝަންގެ ބެލުމުގެ ދަށުގައި ޖަލުގައި ތިބޭ ހުރިހާ ޤައިދީންނަކީވެސް ރިހިބިލިޓޭޓްވާންޖެހޭނެ މީހުންކަމުގައި ހެދުން ކަމަށާއި، ކޮންމެ މީހަކު ޖަލަށްލި ކަމުގައި ވިޔަސް ރިހިބިލިޓޭޓް ޕްރޮގުރާމުގައި ބައިވެރިވާން ޖެހޭނެ ކަމަށް އިމްރާން ވިދާޅުވިއެވެ.
"އަޅުގަނޑު ޤަބޫލުކުރާ ގޮތުގައި ހަޤީޤަތުގައިވެސް އިމްރާން ޖަލަށް ލިޔަސް, ރައީސް ޔާމީން ޖަލަށް ލެވުނަސް ރިހިބިލިޓޭޓް ޕްރޮގްރާމްގައި ބައިވެރިވާން ޖެހޭނެ. އެއީ އެކަން އޮތްގޮތް, އެތަނަށް ދަނީ ކޮންމެވެސް މައްސަލައެއް ހައްލުކުރަންވެގެން. ކޮންމެސް މައްސަލައެއް އޮވެގެން އެތަނަށް ދިޔާމާ އެތަނުގެ ތެރޭން ކޮންމެސް ޕްރޮގްރާމެއްގައި ބައިވެރިވެ ކޮންމެސް ފިލާވަޅެއް, ދަރުސެއް ލިބިގެން އަނބުރާ މުޖުތަމައުއަށް އަންނަންވާނީ. އެކަން ކަށަވަރުކޮށްދިނުމަކީ ކަރެކްޝަންގެ ޒިންމާއެއް, މަސްއޫލިއްޔަތެއް. ވާޖިބެއްކަމަށް އަޅުގަނޑު ދެކެނީ" މިނިސްޓަރ ވިދާޅުވިއެވެ.
މިނިސްޓަރު މިފަދައިން ވިދާޅުވެފައި ވާއިރު، ރައީސް ޔާމީން އާއި ދެކޮޅަށް ކްރިމިނަލް ކޯޓުގައި މިހާރު ކުރިއަށްދާ އާރަށު ޚިޔާނާތުގެ މައްސަލާގައި ދޮގު ތުހުމަތު ކޮށް އެމަނިކުފާނު ޖަލަށް ލާން އުޅޭކަމަށް އިދިކޮޅުން އަންނަނީ ތުހުމަތުކުރަމުންނެވެ. އަދި އެފަދައިން ސަރުކާރުން ކަންތައް އެކުރަނީ ރައީސް ޔާމީން އަށް ކުރިއަށް އޮތް ރިޔާސީ އިންތިހާބުގައި ވާދަނުކުރެވޭގޮތް ހެދުމަށް ކަމަށްވެސް އިދިކޮޅުން އަންނަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
