ފުރަމާލޭގައި ދުއްވާއެއްޗެހި ޕާކުކުރުމަށް ޕާކިން ޒޯން ހެދުމުގެ ގޮތުން މާފަންނު ސަހަރާ ކޮނެ އެތަން ސާފުކުރުމުގެ މަސައްކަތް ސަރުކާރުން ކުރަމުންދާއިރު، އެކަމާއި ގުޅިގެން ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ ޢާޒިމްގެ ނުރުހުން މާލެސިޓީ ކައުންސިލްގެ މޭޔަރު މުހައްމަދު މުޢިއްޒު އަށް އަމާޒުވެއްޖެއެވެ.

މާފަންނު ސަހަރާގައި ޕާކިންގ ޒޯން ހަދަން އެތަން ސާފުކުރަން ފެށުމާއި ގުޅިގެން އެކަމުގެ ނުރުހުން މޭޔަރ މުޢިއްޒު އަށް އަމާޒު ކުރައްވައި އާޒިމް ކުރެއްވި ޓްވީޓެއްގައި ވިދާޅުވީ، ސަހަރާތައް ކޮނެ ގަބުރުތައް ނެގުމަކުން މާލޭގެ ޕާކިންނަށް ހައްލެއް ނާންނާނެކަމަށެވެ.

"މުއިއްޒު ތިކުރާ މަސައްކަތަކުން މާލޭގައި ދިރިއުޅޭ މީހުންނަކަށް ލުޔެއް ނުލިބެ. ލުޔެއްލިބޭނީ ލާމަރުކަޒީ ގާނޫނުގައި ބުނެފައިވާގޮތަށް ވެހިކަލް ކެރީން ކެޕޭސިޓީ ސިޓީ ކައުންސިލުން ކަނޑައަޅަންކެރުނު އިރަކުން." އާޒިމްގެ ޓުވީޓުގައި ވިދާޅުވިއެވެ. 

އާޒިމް މިފަދައިން ވިދާޅުވެފައި ވާއިރު، މާފަންނު ސަހަރާގައި ޕާކިން ޒޯނެއް ހެދުމުގެ ނިންމުމަކީ ސަރުކާރުގެ ނިންމުމެކެވެ. އަދި އެކަމަށް އިސްލާމިކް މިނިސްޓްރީއިން ވަނީ ހުއްދަވެސް ދީފައެވެ.

އެ މައްސަލައާއި ގުޅޭގޮތުން މީގެ ކުރިންވެސް ސިޓީ ކައުންސިލަށް ފާޑުކިޔުންތައް އަމާޒުވުމާއި ގުޅިގެން ޑރ. މުއިއްޒު ވަނީ އެ ފަރާތްތަކަށް ރައްދު ދެއްވާފައެވެ. އެގޮތުން ރައްދުދެއްވައި ކުރެއްވި ޓްވީޓެއްގައި ވިދާޅުވީ، ޕާކިން ޒޯނު ހެދުމުގެ މަސައްކަތުގައި ސިޓީ ކައުންސިލުން އަދާކުރާ ޒިންމާއަކީ، ނުވަތަ ސިޓީ ކައުންސިލްގެ މަސްއޫލިއްޔަތަކީ ސަރުކާރުން ދައްކާ ބިންތަކުގައި ޕާކިން ޒޯނުތައް ހެދުމުގެ މަސައްކަތް ކަމަށެވެ.

އަދި ޕާކިންގ ޒޯން ހެދުމަށް ބިން ކަނޑައަޅައި، އެތަންތަން ސާފުކުރާނީވެސް ސަރުކާރުގެ ކަމާ ގުޅުންހުރި އިދާރާތަކުންކަމަށް ޑރ. މުއިއްޒު ވިދާޅުވިއެވެ.