ހއ. އިހަވަންދޫއަށް ލަކުނޑިން ހަދާފައިވާ ބުދެއް ލައްގައިފި އެވެ.

އިހަވަންދޫ ކައުންސިލް ރައީސް އަހްމަދު ސޮބާހް "ވޮއިސް" ވިދާޅުވީ އެ ރަށު ހުޅަނގު ފަރާތު ފެން ޕްލާންޓް ހުންނަ އާނު ގަނޑު ސަރަހައްދުން ލަކުނޑިން ހަދާފައިވާ ބުދެއް ލައްގާފައިވާ ކަމުގެ މައުލޫމާތު މިއަދު މެންދުރު ފަހު 3:30 ހާއިރު ކައުންސިލަށް ލިބިފައިވާ ކަމަށެވެ.

އަދި އެ ބުދު ފެނިފައިވަނީ ގޮނޑުދޮށަށް ގޮސް އުޅުނު އާންމުންގެ ބަޔަކަށް ކަމަށާ، ލޮލާއި، ނޭފަތާއި އަނގަވެސް ފާހަގަވާހެން ކަނޑާފައިވާ އެ ބުދުގެ ބޮޑުމިނުގައި ގާތްގަޑަކަށް 4 ފޫޓް ހުންނާނެކަމަށްވެސް ސޮބާހު ވިދާޅުވިއެވެ.

Advertisement

ސޮބާހު އިތުރަށް ވިދާޅުވީ، އާއްމުން ކައުންސިލަށް އެ ޚަބަރު ދިނުމާއި އެކު ކައުންސިލުން އެކަން ފުލުހަށް ރިޕޯޓް ކޮށްފައިވާ ކަމަށާ، އަދި މިހާރު އެ ބުދުވަނީ ފުލުހުންނާއި ހަވާލުކޮށްފައިކަމަށެވެ.

އިހަވަންދޫ އިން ފެނުނު ބުދު ފުލުހުން ގެންދަނީ

އިހަވަންދޫއަށް ބުދެއް ލައްގާފައިވާއިރު ދާދިފަހުން ރާއްޖޭގެ ރަށެއްގައި އުޅޭ އިންޑިއާ ބަޔަކު މަށިން ބުދެއް ހެދުމަށްފަހު ރަށުތެރޭގައި ހިންދޫ ދީނުގެ އަޅުކަންތަކެއް ކުރި މައްސަލައެއްވެސް ވަނީ ފެންމަތިވެފައެވެ.

އެކަމުގައި ޝާމިލުވާ އިންޑިއާ މީހުން މިހާރު ތިބީ ފުލުހުންގެ ހައްޔަރުގައެވެ.