ލާމަރުކަޒީ ނިޒާމު ފައްކާ ކުރުމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހަމައެކަނި ރިޔާސީ އިންތިހާބާއި ދިމާކޮށް ވެވަޑައިގެންނެވި ވައުދެއް ނޫން ކަމަށާއި އެއީ ރާއްޖޭގެ ވެރިކަން ކުރަން ޖެހޭނެ ކަމަށް އެމަނިކުފާނު އީމާންވެ ވަޑައިގަންނަވާ ގޮތް ކަމަށް ހޯމް މިނިސްޓަރ އިމްރާން ވިދާޅުވެއްޖެއެވެ.
މިއަދު ފެށި "ވިއަވަތި" ރާއްޖެ ކޮންފަރެންސުގެ ތިންވަނަ ބައްދަލު ފެއްޓެވުމަށް ބޭއްވޖ ރަސްމިއްޔާތުގައި ވާހަކަދައްކަވަމުން އިމްރާން ވިދާޅުވީ ލާމަރުކަޒީ ނިޒާމަކީ ރާއްޖެ ތަރައްޤީކޮށް ހަމަހަމަ ފުރުސަތު ތަނަވަސްކުރުމަށް ރައީސުލްޖުމްހޫރިއްޔާ އެންމެ އިސްކަން ދެއްވާ ސިޔާސަތުކަމަށެވެ. އަދި އެމަނިކުފާނުގެ ވެރިކަމުގެ މިވީ ދުވަސްތަކުގައި މަރުކަޒީ ބާރުވެރިކަން ދޫކޮށް، ލާމަރުކަޒީ ސިޔާސަތު ތަންފީޒު ކުރުމަށް ކުރެއްވި މަސައްކަތުން ހެޔޮ ނަތީޖާތަކެއް ލިބިފައިވާކަމަށް އިމްރާން ވިދާޅުވިއެވެ.
"ލާމަރުކަޒީ ނިޒާމު ފައްކާ ކުރުން އެއީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކެމްޕެއިން ވައުދެއްގެ ގޮތުގައި ވިދާޅުވެފައިވާ ބައްފުޅެއްނޫން. އެއީ މިޖަޒީރާ ރާއްޖޭގެ ވެރިކަން ހިންގަންޖެހޭނެކަމަށް އެމަނިކުފާނު އީމާންވެ ވަޑައިގަންނަވާ ގޮތް. އެމަނިކުފާނުގެ ޕެޝަން. އެމަނިކުފާނު ވެރިކަން ކުރައްވާ ވައްޓަފާޅިއާއި ސްޓައިލް." މިނިސްޓަރ އިމްރާން ވިދާޅުވިއެވެ.
މިއަދު ފެށުނު "ވިއަވަތި" ކޮންފަރެންސާއި އަދި މިހާތަނަށް ބޭއްވުނު މިފަދަ ކޮންމެ ކޮންފަރެންސެއްގައިވެސް ސަރުކާރުން ވަނީ ރައްޔިތުންނަށް ބޭނުންވާ ޚިދުމަތްތައް އޮޅުންފިލުވައި، އެކަންކަމަށް ޤާނޫނުގެ ތެރެއިންނާއި، އިދާރީ ގޮތުންވެސް ހައްލު ގެނެސް ދެއްވާފައިކަމަށް މިނިސްޓަރ އިމްރާން ވިދާޅުވިއެވެ. މިކުރެވުނު މަސައްކަތުން މިއަދު އެންމެ އިސްކަން ދޭންވީ އެއްކަމަކީ ރައީސުލްޖުމްހޫރިއްޔާ މުޅި ރާއްޖެއަށް ދޫކުރެއްވި ލާމަރުކަޒީ ސިޔާސަތު ހިފެހެއްޓޭނެ ގޮތަކަށް އެއްވެސް މީހަކަށް ޖާގަ ނުދިނުންކަމަށްވެސް އިމްރާން ވިދާޅުވިއެވެ.
"މިދައުރު ނިމުމަށްފަހު އަތޮޅުތަކަށް ފަތުރާލައްވާފައިވާ ލާމަރުކަޒީ ސިޔާސަތު ދެން އިންޗިއަކަށްވެސް ފަހަތަށް ޖެއްސުމަށް އެއްވެސް މީހަކަށް ފުރުސަތު ދީގެން ނުވާނެ. ޤައުމެއް ތަނަވަސްވި ކަމަށްވާނީ އެންމެން ތަނަވަސް ވުމުން. އެންމެ ފަގީރު މީހާވެސް އުފާވީމަ. ހުރިހާ ރަށްތަކެއް އެއްވަރަށް ތަރައްޤީވެގެން." މިނިސްޓަރ އިމްރާން ވިދާޅުވިއެވެ.
މީގެ އިތުރުން، ތަރައްޤީގެ އެންމެ މުހިންމު އެއްކަމަކީ މަޝްވަރާގެ އުސޫލުން ކަންކަން ކުރުން ކަމަށާއި، ރައީސް ޞާލިހުގެ ވެރިކަމުގެ މިހާތަނަށް ހޯދުނު ކާމިޔާބީގެ އެންމެ ބޮޑު ހިއްސާއަކީ އެމަނިކުފާނު މަޝްވަރާއަށް އިސްކަން ދެއްވުމުންކަމަށް އިމްރާން ވިދާޅުވިއެވެ.
މިނިސްޓަރ ވަނީ އިސްލާމީ ތާރީހުގައި މަޝްވަރާގެ މަތިން ކަންކަން ކުރުމުގެ މުހިންމުކަމާއި، މަޝްވަރާގެ އުސޫލު ކަންކަން ކުރުމުން ލިބިފައިވާ ކާމިޔާބީތަކަށްވެސް އަލި އަޅުވާލައްވައި، ވާހަކަ ދައްކަވާފައެވެ.
"މިއީ ހެޔޮވެރިކަމެއްގައި ހުންނަން ޖެހޭ ސިފަތައް. ރައްޔިތުންނާ މެދު އޮންނަންޖެހޭ އޯގާވެރިކަން. ރައްޔިތުންނާ މެދު އޮންނަންޖެހޭ ގާތްކަން. މިއަދުގެ މި ވެރިކަމުން އެ ސިފަތައް އެންމެ ރީތި ގޮތުގައި އެންމެ ފުރިހަމަ ގޮތުގައި ފެންނާތީ މި އެންމެން މިތަނަށް އެއްވެ މިތިބީ" ގުރުއާނުން މިސާލު ނަންގަވައި އިމްރާން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
