ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ކޮއްކޮ އަދި ގާނޫނީ ވަކީލު ނާޒިމް ސައްތާރު އެއް ޖިންސުން ގުޅުންހިންގުމުގެ ކުށަށް އިއުތިރާފުވެއްޖެއެވެ.

ބަންގުލަދޭޝް ރައްޔުތެއް ކަމުގައިވާ އެމްޑީ އަލަމްގިރާއެކު އެއްޖިންސުން ގުޅުން ހިންގާ ވީޑިއޯއެއް އާންމުވީ މައްސަލައިގައި ނާޒިމްގެ މައްޗަށް އުފުލާފައިވާ ދައުވާގެ އިބްތިދާއީ އަޑުއެހުން މިއަދު ކްރިމިނަލް ކޯޓުގައި ވަނީ ބާއްވާފައެވެ.

ސިއްރުން ކުރިއަށް ގެންދިޔަ މި އަޑުއެހުމުގައި ނާޒިމް ވަނީ އަލްމަގީރާއެކު ޖިންސީ ގުޅުން ހިންގި ކަމަށް އިއުތިރާފުވެފައެވެ. އެއާއެކު ކްރިމިނަލް ކޯޓުން ވަނީ އެއް ޖިންސުން ޖިންސީ ގުޅުން ހިންގުމުގެ ކުށުގެ ދައުވާ އޭނާގެ މައްޗަށް ސާބިތުވާ ކަމަށް ކަނޑައަޅާފައެވެ.

Advertisement

ނާޒިމް ސައްތާރު ހިމެނޭހެން ގިނަ އަދަދެއްގެ ދިވެހި ފިރިހެނުންނާއެކު އެއްޖިންސުން ގުޅުން ހިންގި ބަންގްލަދޭޝްގެ އަލްމްގިރްވެސް ވަނީ އޭނާގެ ކުށަށް ޝަރީއަތުގައި އިއުތިރާފުވެފައެވެ. އަދި ކުށަށް އިއުތިރާފުވުމާ ގުޅިގެން އަލަމްގިރުގެ މައްޗަށް ކޯޓުން އިއްވާފައިވަނީ 7 މަސް ދުވަހުގެ ޖަލު ހުކުމެކެވެ. 

އެ މައްސަލާގައި އެމްޑީ އަލަމްގިރާއި ނާޒިމްގެ އިތުރަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުޙައްމަދު ނަޝީދު (ކާނަލް)އާއި ފުލުހެއް ކަމުގައިވާ އަބްދުއްރަހްމާން ރަފީއުގެ މައްޗަށް ދައުލަތުން ދައުވާކޮށްފައިވެއެވެ.

އެމްޑީ އަލަމްގިރާއެކު އެއްޖިންސުން ގުޅުންހިންގި ކަމުގެ ތުހުމަތުގައި އިތުރު 6 މީހަކު މި ފަހުން ހައްޔަރުކޮށްފައިވެއެވެ. އެ އެންމެންވެސް ބަންދުގައި ބައިތިއްބަން ކޯޓުންވަނީ މުހުލަތު ދީފައެވެ.