ޖިންސީ ބާރުގަދަކޮށްދޭ ކަމަށް ބުނެ ހުއްދަނެތް މާއްދާތަކެއް އަޅައިގެން އުފައްދާފައިވާ މާމުއި އެއް ވިއްކަމުންދާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.
އެމްއެފްޑީއޭއިން މިއަދު ކުރި އިއުލާނެއްގައި ބުނީ ސެކްޝުއަލް އެންހޭންސްމެންޓް އަދި އިރެކްޓައިލް ޑިސްފަންކްޝަނަށް ބޭނުންކުރާ ޑޮކްޓަރީ ބޭހެއް ކަމަށްވާ 'ޓަޑަލަފިލް' އަދި 'ސިލްޑެނަފިލް' ހިމެނޭ މާމުއި ރާއްޖެ އެތެރެކޮށް ވިއްކަމުންދާ ކަމުގެ މައުލޫމާތު ލިބިފައިވާ ކަމަށެވެ.
އެގޮތުން އެލާޓްކޮށްފައިވާ މާމުއިގެ ތެރެއިން ރާއްޖެ އެތެރެކޮށް ބޭނުންކުރަމުންދާ އަށް ބާވަތެއްގެ މާމުއިގެ ފޮޓޯ ވަނީ އެ އޮތޯރިޓީން އާންމުކޮށްފަ އެވެ.
އަދި އެ އުފެއްދުންތަކަކީ ފްރޯޑްކޮށްގެން އުފައްދާފައިވާ އުފެއްދުންތަކެއް ކަމުގައި ޔުނައިޓެޑް ސްޓޭޓްސް ފުޑް އެންޑް ޑްރަގް އޮތޯރިޓީ (ޔޫއެސް އެފްޑީއޭ) އެލާޓްކޮށްފައިވާ ކަމަށް އެމްއެފްޑީއޭ އިން ބުންޏެވެ.
އެހެންކަމުން، ރައްކާތެރިކަމުގެ ފިޔަވަޅެއްގެ ގޮތުން އެ އުފެއްދުންތައް ބޭނުންކުރުމާއި ވިއްކުން އެމްއެފްޑީއޭ އިން ވަނީ މަނާކޮށްފަ އެވެ.
އަދި މިކަމާބެހޭ އިތުރު މައުލޫމާތު ބޭނުންފުޅުވާނަމަ މި އޮތޯރިޓީގެ ހޮޓްލައިން ނަންބަރު 7200321 ފޯނަށް ގުޅުމަށްވެސް އެ އޮތޯރިޓީން ވަނީ އެދިފައެވެ.
Advertisement
This content is created and paid for by advertisers and does not involve Voice Journalists
