އިނގިރޭސީންގެ ހިމާޔަތް ދިވެހިރާއްޖެއަށް ނުލިބުނު ނަމަ ދިވެހިރާއްޖެ ވަރަށް ބޮޑަށް ނިކަމެތިވެގެން ދިޔައިސް ކަމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ގާސިމް މިފަދައިން ވިދާޅުވީ ރާނީ އެލިޒަބަތު ދެވަނަ، އަދި ނިޝާން ގާޒީގެ އިއްޒަތުގެ ވެރިޔާ، މިދިޔަ ބުރާސްފަތި ދުވަހު އަވަހާރަވުމާ ގުޅިގެން ތައުޒިޔާގެ ބަސްފުޅެއް ވިދާޅުވުމަށް މަޖިލީހުގައި ތަމްސީލުކުރައްވާ ސިޔާސީ ޕާޓީތަކުގެ ލީޑަރުންނަށް ފުރުސަތު ދެއްވުމާއި ގުޅިގެން ޖުމުހޫރީ ޕާޓީގެ ފަރާތުން ވާހަކަފުޅުދައްކަވަމުންނެވެ.
ރާނީގެ ޚިދުމަތުގެ ހަނދާން އާކުރައްވާ ގާސިމް ވިދާޅުވީ ދިވެހިރާއްޖެއަށް ގިނަ ގުނަ ހިދުމަތްތަކެއް ރާނީ އެލިޒަބަތު 2ގެ ވެރިކަމުގައި ކޮށްދެއްވާފައިވާކަމަށާއި އެކަމަނާގެ ވެރިކަމުގައި ދިވެހިރާއްޖެއަށް ވަރަށް ގިނަ ގުނަ އެހީތެރިކަންވެސް ފޯރުކޮށްދެއްވާފައިވާކަމަށެވެ.
އަދި ދުނިޔޭގެ ހާލަތު އޭރު އޮތް ގޮތުން، އިނގިރޭސިންގެ ހިމާޔަތް ދިވެހިރާއްޖެއަށް ނުލިބުނު ނަމަ، ރާއްޖެ ވަރަށް ބޮޑަށް ހާލުގައި ޖެހުނިސްކަމަށް ގާސިމް ވަނީ ވިދާޅުވެފައެވެ.
ގާސިމްގެ ވާހަކައިގައި ވަނީ އިނގިރޭސިންގެ ހިމާޔަތް ދިވެހިންނަށް ލިބުނު ދުވަސްވަރަކީ ދުނިޔޭގެ އެކި ބާރުތަކުން ރާއްޖެއަށް ނުފޫޒު ފޯރުވުމަށް މަސައްކަތްކުރަމުން ދިޔަ ދުވަސްވަރެއްގެ ގޮތުގައި ފާހަގަކުރައްވާފައެވެ. އެހެން ނަމަވެސް އޭރު ދިވެހިން އޮތީ އަމިއްލައަށް ކަންކަން ނިންމޭނެ ފަދަ ހާލަތެއްގައި ނޫންކަމަށް ގާސިމް ވިދާޅުވިއެވެ.
އޭގެ އިތުރުން އޭނާ ވިދާޅުވީ، ދިވެހިންގެ ހާލަތު ރަނގަޅުވެ، އަމިއްލައަށް ޚާރިޖީ ކަންކަން ނިންމުމުގެ ބާރުވެރިކަމާއި، ގާބިލުކަން ލިބުނު ހިސާބުން، މިނިވަންކަމާއެކު އޮންނަން ބޭނުންވާކަމަށް ރާނީގެ އަރިހުގައި އެދިލެއްވުމުން އެކަމަނާ ދިވެހިންނަށް އެ ފުރުސަތުވެސް ފަހިކޮށްދެއްވާފައިވާ ކަމަށެވެ.
ގާސިމް ވަނީ އެ ކަންކަން ފާހަގަކުރައްވާ އިނގިރޭސި ދައުލަތަށާއި، އިނގިރޭސި ރާނިއަށް ޝުކުރުއަދާކުރައްވާފައެވެ.
Advertisement
This content is created and paid for by advertisers and does not involve Voice Journalists
