ދޮންދޫނި ލިޓްލް ލާނާސްގައި ކިޔަވަމުންދާ ދަރިވަރުންގެ ތެރެއިން އިތުރު އެހީ ބޭނުންވާ ދަރިވަރުންނަށް ފަންނީ ތަޖުރިބާކާރުންގެ އެހީތެރިކަން ދިނުމަށް ކެއާ ސޮސައިޓީ އިން ދޮންދޫނި ލިޓްލް ލާނާސް ޕްރީސްކޫލާ އެކު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ކެއާ ސޮސައިޓީގެ ފަރާތުން ސޮއިކުރެއްވީ އެ އޮފީހުގެ އެގްޒެކްޓިވް ޑިރެކްޓަރު އަހުމަދު އާތިފްއެވެ. އަދި ދޮންދޫނި ލިޓްލް ލާނާސް ޕްރީސްކޫލްގެ ފަރާތުން ސޮއިކުރެއްވީ އެ ސުކޫލުގެ ޕްރިންސިޕަލް އައްޝައިހް ހަސަން މޫސާ ފިކުރީ އެވެ.
މި އެއްބަސްވުމާއި ގުޅޭގޮތުން ވާހަކަ ދައްކަވަމުން އާތިފް ވަނީ ދޮންދޫނި ޕްރީސްކޫލުން އިސްނަގައިގެން ނިންމި އެ ނިންމުމަކީ އެ ސުކޫލައި ކިޔަވާ ދަރިވަރުންނަށް ވަރަށް ފައިދާ ކުރާނެކަމެއް ކަމަށް ފާހަގަކުރައްވާފައެވެ. 

އާތިފް އިތުރަށް ވިދާޅުވީ، އާއްމު ގޮތެއްގައި ޕްރީ ސުކޫލް ތަކުގައި، ތަފާތު އެކި ކަހަލަ ކުދިންނަށް ކިޔަވައިދިނުމުގައި މަސައްކަތް ކުރަމުންދަނީ އެންމެ ޓީޗަރެއް ކަމަށެވެ. އެހެން ނަމަވެސް، އެކަން ބަދަލުކޮށް، އެކި ކަހަލަ އެހީތެރިކަން ބޭނުންވާ ދަރިވަރުންނަށް، އެކުދިންނަށް އިތުރު އެހީ ބޭނުންވާ ކަންކަމުން އެހީ ފޯރުކޮށްދިނުމަށް އެކަމުގެ ޢިލްމާއި ތަޖުރިބާ ހުރި މީހުންގެ އެހީތެރިކަން ލިބުންވެސް މުހިއްމު ކަމަށާ، އެގޮތުން ދޮންދޫނި އާއި އެކު ވެވުނު އެއްބަސްވުމުގެ ދަށުން އެގޮތުން ސްޕެޝަލް އެޑިއުކޭޓާސް އާއި ތެރަޕިސްޓުން އެ ސުކޫލަށް ޒިޔާރަތްކޮށް ދަރިވަރުންނަށް އެހީތެރި ވެ ދިނުމަށް ހަމަޖެހިފައިވާ ކަމަށެވެ. 

"އަޅުގަނޑު ގަބޫލުކުރަނީ މިކަހަލަ މަސައްކަތަކީ ކުއްޖާގެ ކުރިއެރުމަށް ވަރަށް ވަރަށް މުހިއްމު ކަމެއް. ޚާއްސަކޮށް ޓީޗަރުންނަށް، ކިޔަވައިދިނުމުގައި ވަރަށް ބޮޑަށް ފަސޭހައަކަށް ވެގެންދާނެ. އެހެންވީމާ ވަރަށް މުހިއްމު ކަމެއްގެ ގޮތަށް އަޅުގަނޑުމެން ގަބޫލު ކުރަނީ ޕްރީސްކޫލް ތަކުގައި މިކަހަލަ މަސައްކަތްތައް ކުރުންމީ." އާތިފް ވިދާޅުވިއެވެ. 

Advertisement

މި އެއްބަސްވުމުގެ ދަށުން ކުރެވިގެންދާ މަސައްކަތްތަކުން ކުދިންގެ ކިޔެވުމާއި، އަދި އެހެނިހެން ކަންކަމަށްވެސް ވަރަށް ބޮޑު ކުރިއެރުމެއް ލިބިގެންދާނެ ކަމަށް އުއްމީދު ކުރައްވާކަމަށްވެސް އާތިފް ވިދާޅުވިއެވެ. 

ހަފްތާގެ ކަނޑައެޅިފައިވާ ވަކި ދުވަސްތަކެއްގައި ކެއާ ސޮސައިޓީގެ ސްޕެޝަލް އެޑިއުކޭޓާސް އާއި ތެރަޕިސްޓުން ދޮންދޫނި ސުކޫލަށް ޒިޔާރަތް ކޮށް ދަރިވަރުންނަށް އެހީތެރިވެދާނެ އެވެ. އަދި ކުރިއަށް އޮތްތާ އެ ސޮސައިޓީގެ ކެޕޭސިޓީ ހުރި މިންވަރަކުން އެހެން ސުކޫލުތަކުގައިވެސް މިފަދަ ޕްރަގްރާމްތައް ފެށުމަށް ވަނީ ހަމަޖެހިފައެވެ.
ކެއާ ސޮސައިޓީ އުފެއްދުމުގެ އެންމެ ބޮޑު މަގުސަދަކީވެސް އެހީތެރިކަމަށް ބޭނުންވާ ކުދީންނަށް ވީހާވެސް ޅަފަތުގައި އެހީތެރިވެ ދިނުމެވެ