އަންހެނުންގެ ތަރައްޤީއަށް މަސައްކަތްކުރާ ކޮމެޓީ (ޑަބްލިޔުޑީސީ) ބާއްވައިގެން އިތުރުހޭދަ ކުރާވަރަކަށް ކައުންސިލަށް ލިބޭ އާމްދަނީ އުނިވަމުންދާކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ވައްޑެ މިފަދައިން ވިދާޅުވެފައި ވަނީ، ޑަބްލިޔުޑީސީ އުވާލައި، ކައުންސިލާއި އެކީގައި ޑަބްލިޔުޑީސީ އެއްކޮށްލަށް ޖެހޭކަމަށް ފެނިވަޑައިނުގަންނަވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވުމާއި ގުޅިގެންނެވެ.
ރައީސް ޞާލިހުގެ ވާހަކަފުޅަށް ރައްދު ދެއްވަމުން ވައްޑެ ކުރެއްވި ޓުވީޓުގައި ވިދާޅުވީ، ޑަބްލިޔުޑީސީތަކަކީ ކައުންސިލްތަކުގައި އަންހެނުންގެ ކޯޓާ ކަނޑަނޭޅޭއިރުގެ އެއްޗެއްކަމަށެވެ. އެހެންނަމަވެސް، މިހާރު ކައުންސިލް ތަކުގައި އަންހެނުނަށްވެސް ކޯޓާ ކަނޑައެޅިފައިވާއިރު, މިހާރު މުހިންމުވާނީ ކައުންސިލް ތަކަށް އިންތިޚާބު ވެފައިތިބި އަންހެން ކައުންސިލަރުންގެ ދައުރު ފުޅާކުރުމަށް އެހީތެރިވުން ކަމަށްވެސް ވައްޑެ ވިދާޅުވިއެވެ.
"ޑަބްލިޔުޑީސީ ބާއްވައިގެން އިތުރުހޭދަ ކުރާވަރަކަށް އުނިވަނީ ކައުންސިލަށް ލިބޭމަދު އާމްދަނީ." ވައްޑެ ވިދާޅުވިއެވެ.
ލ. ގަމުގައި ބޭއްވުނު ތިންވަނަ 'ވިއަވަތި ރާއްޖެ' ކޮންފަރެންސް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިހު ވަނީ ޑަބްލިޔުޑީސީ އުވާލައި، ކައުންސިލާއި އެކީގައި ޑަބްލިޔުޑީސީ އެއްކޮށްލަށް ޖެހޭކަމަށް ފެނިވަޑައިނުގަންނަވާ ކަމަށް ވިދާޅުވެފައެވެ. އަދި އެމަނިކުފާނު ދެކެވަޑައިގަންނަވާ ގޮތުގައި، ޑަބްލިޔުޑީސީ އުވާލުމުގެ ބަދަލުގައި އެންމެ ފުރަތަމަ ކުރަންވީ ކަމަކީ، ޑަބްލިޔޫ.ޑީ.ސީ.ގައި ތިބި ފަރާތްތަކަށް މަސައްކަތް ކުރެވޭނެ ރަނގަޅު މާޙައުލެއް ޤާއިމުކޮށްދެއްވުން ކަމަށްވެސް ރައީސް ޞާލިހު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
