ދިވެހިރާއްޖޭގެ ރައީސުލްޖުމްހޫރިއްޔާގެ މަގާމުގައި ހުންނެވި، ރައީސް އިބްރާހިމް މުހައްމަދު ޞާލިހަކީ ރާއްޖޭގެ ސަރަޙައްދުން ޒައްރެއްގެ މިންވަރުވެސް ބޭރު ޤައުމަކަށް ދޫކޮށްލައްވާނެ ވެރިއެއްނޫންކަމަށް މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީ ވިދާޅުވެއްޖެއެވެ.
ސިފައިންގެ 130 ވަނަ އަހަރީ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ މާރިޔާ ވިދާޅުވީ، ދިވެހިން ކުރިމަތިލައިގެން މިތިބީ ވަރަށް ތަފާތު އިޤްތިޞާދީ، އިޖްތިމާޢީ، އަދި ސަލާމަތީ ޙާލަތަކާއިކަމަށެވެ.
އަދި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ އިބްރާހީމް މުޙައްމަދު ޞާލިޙު، މަޤާމާ ހަވާލުވެވަޑައިގަތުމަށްފަހު އެންމެ ބޮޑު އިސްކަމެއް ދެއްވި އެއްކަމަކީ، ދިވެހިރާއްޖޭގެ ޤައުމީ ސަލާމަތަށް ހުރި ތަފާތު ގޮންޖެހުންތަކަށް ރިޢާޔަތްކުރައްވާ، ދިފާޢީ އަދި ސަލާމަތީ ސިޔާސަތުތައް އެކުލަވާލައްވާ، އެ ސިޔާސަތުތަކުގެ މައްޗަށް ދިވެހިރާއްޖޭގެ ދިފާޢީ އަދި ސަލާމަތީ ނިޒާމުތަކާއި އިންތިޒާމްތައް ބައްޓަން ކުރެއްވުންކަމަށްވެސް މާރިޔާ ވިދާޅުވިއެވެ.
މިއާއެކު މާރިޔާ ވިދާޅުވީ ރާއްޖެއަށް އޮތް އެންމެ ބޮޑެތި ނުރައްކާތަކަކީ ޓެރަރިޒަމާއި ހަރުކަށި ފިކުރުގެ ނުރައްކާ އަދި ޑުރަގްގެ ވިޔަފާރި އާއި ގަވާއިދާ ހިލާފަށް ރާއްޖޭގެ މަސްކަނޑުތައް ބޭނުން ކުރުމުގެ މައްސަލަ ކަމަށެވެ. މީގެ އިތުރުން ޗައިނާ އާއި އިންޑިއާ ފަދަ ބޮޑެތި ގައުމުތަކުގައި އޮތް ވާދަވެރިކަން އިންޑިއާ ކަނޑުގެ ސަރަހައްދުގައި ބޮޑުވެގެން ދިއުމަކީ ވެސް ރާއްޖެއަށް އޮތް ބޮޑު ގޮންޖެހުމެއް ކަމަށެވެ.
އަދި އެފަދަ ކިތަންމެ ގޮންޖެހުންތަކެއް ރާއްޖެއަށް އޮތް ނަމަވެސް ރައީސް ޞާލިހު ކުރައްވާ ކޮންމެ ކަމެއް ކުރައްވަނީ ރާއްޖެއަށް އެންމެ މަންފާ ހުރި އަދި ގައުމުގެ އެންމެ މަތީ މަސްލަހަތު އިސް ކޮށްގެން ކަމަށްވެސް މާރިޔާ ވިދާޅުވިއެވެ.
"މިއަދު ދިވެހި ގައުމުގެ ޒައާމަތުގައި އެ ހުންނެވީ ދިވެހިރާއްޖޭގެ ސަރަހައްދުން ޒައްރެއްގެ މިންވަރުވެސް ބޭރުގެ ގައުމަކަށް ދޫކޮށްލައްވާނެ ވެރިއެއް ނޫން. ރައީސް ސޯލިހަކީ ރައްޔިތުންގެ އިހުސާސްތައް އަޑު އައްސަވާ ގައުމުގެ ސަލާމަތީ ހާލަތު ފަހުމްވާ ވެރިއެއް. ދިފާއީ އަމާޒު ހިފަންވީ މިސްރާބު ދެނެވަޑައިގަންނަވާ ލީޑަރެއް،"
ޑިފެންސް މިނިސްޓަރ މާރިޔާ އަހްމަދު ދީދީ
Advertisement
This content is created and paid for by advertisers and does not involve Voice Journalists
