ވިލިމާލޭ ހޮސްޕިޓަލުން ތުއްތުކުދިން ގަޔަށް މުއްދަތު ހަމަވެފައިހުރި ވެކްސިންތަކެއް ޖަހާފައިވާ މައްސަލާގައި އިހުމާލުވި ފަރާތްތަކާއިމެދު ފިޔަވަޅު އަޅާފައިވާ ކަމަށާ، އެފަދަ ކަމެއް ދެފަހަރު ހިނގާފައިވާ ފަދަ މޭރުމަކުން ފެތުރެމުންދާ ޚަބަރަކީ ދޮގު ޚަބަރެއް ކަމަށް އައިޖީއެޗް ހޮސްޕިޓަލުން ބުނެފިއެވެ.
އައިޖީއެޗް ހޮސްޕިޓަލުގެ ބެލުމުގެ ދަށުން ހިނގަމުންދާ ވިލިމާލޭ ހޮސްޕިޓަލުން ތުއްތުކުދިން ގަޔަށް މުއްދަތު ހަމަވެފައިހުރި ވެކްސިންތަކެއް ޖަހާފައިވާ ކަމަށް ބުނެ ފެތުރެމުންދާ ޚަބަރާއި ގުޅިގެން އެ އައިޖީއެޗް ހޮސްޕިޓަލުން ނެރުނު ނޫސް ބަޔާނެއްގައި ބުނީ، އެފަދަ މައްސަލައެއް ވިލިމާލޭ ހޮސްޕިޓަލުގައި ދިމާވެފައިވަނީ މި އަހަރުގެ މެއި މަހުގައި ކަމަށެވެ. އަދި އެ މައްސަލަ ހޮސްޕިޓަލުގެ ސަމާލުކަމަށް އައުމާއި އެކު އެއީ ހިނގާފައިވާ ކަމެއްކަން ބަޔާންކޮށް މި ހޮސްޕިޓަލުން ނޫސް ބަޔާނެއްވެސް ނެރެފައިވާނެކަމަށެވެ.
މިއާއެކު އެ ބަޔާނުގައި ބުނީ، އެ މައްސަލަ ވަރަށް ސީރިއަސް މައްސަލައެއްގެ ގޮތުގައި އައިޖީއެޗް ހޮސްޕިޓަލުންނާއި ހެލްތު ޕްރޮޓެކްޝަން އެޖެންސީ (އެޗް.ޕީ.އޭ.) އިން އޭރު ތަޙުޤީޤުކޮށް މި މައްސަލައިގައި އިހުމާލުވާ ފަރާތްތަކާ މެދު އަޅަންޖެހޭ ފިޔަވަޅު އަޅައި، މިފަދަ ކަމެއް ކުރިމަގުގައި ތަކުރާރެ ނުވާނެކަން ކަށަވަރު ކުރެވިފައިވާކަމަށެވެ.
އަދި އެ މައްސަލައާއި ގުޅުން ހުރި ތުއްތުކުދިންގެ ބެލެނިވެރިންނަށް މައުލޫމާތު ހިއްސާ ކުރުމުގެ މަސައްކަތް އަދިވެސް ކުރެވެމުންދާ ކަމަށް އެ ބަޔާނުގައި ބުނެފައިވެއެވެ.
"ވީމާ ވިލިމާލެ ހޮސްޕިޓަލުން ދެވަނަ ފަހަރަށް މުއްދަތު ހަމަވެފައިވާ ވެކްސިންތަކެއް ތުއްތުކުދިން ގަޔަށް ޖެހިކަމަށް ދޭހަވާ މޭރުމަކުން ދައުރުވަމުންދާ ޚަބަރަކީ އެއްވެސް އަސާސެއް ނެތް ދޮގު ވާހަކަތަކެއް ކަމުގައި ދަންނަވަމަމެވެ." އައިޖީއެޗް ހޮސްޕިޓަލުން ނެރުނު ބަޔާނުގައިވެއެވެ.
Advertisement
This content is created and paid for by advertisers and does not involve Voice Journalists
