ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުގެ ހޯމް މިނިސްޓަރ ކަން ކުރައްވަމުން ގެންދަވާ، އަދާލަތުޕާޓީގެ ރައީސް، ޢިމްރާން، ރައީސް ޞާލިހަށް ސަނާކިޔުއްވައި ޓުވީޓެއް ކުރައްވައިފިއެވެ. 

އިމްރާން ދާދި ދެންމެ ކުރެއްވި ޓުވީޓެއްގައި އޭނާ ވަނީ ރައީސް ޞާލިހާއި ކުރީގެ ރައީސް އަދި އިދިކޮޅު ކޯލިޝަންގެ ލީޑަރ ރައީސް ޔާމީން އަބްދުލްގައްޔޫމް އާއި އަޅާކިޔުއްވައި، ރައީސް ޞާލިހަށް ތައުރީފް ކުރައްވާފައެވެ. 

އެގޮތުން ޢިމްރާން ވިދާޅުވީ، ބައެއް ބޭފުޅުންނަށް ގަބޫލުކުރަން ކިތަންމެ ދަތިވި ކަމުގައިވިޔަސް، ރައީސް ޞާލިހުގެ ކިބައިގައި މަޝްވަރާ ކުރުމުގެ އަޚްލާގު ހުރި މިންވަރަށް، ރައީސް ޔާމީންގެ ކިބައިގައި އެ އަޚްލާގު ނެތް ކަމީ އެ ދެ ބޭފުޅުން ރަނގަޅަށް ދަންނަ އެންމެންވެސް ދަންނަ ހަގީގަތެއް ކަމަށެވެ. 

އިމްރާން މިފަދައިން ވިދާޅުވެ ޓުވީޓު ކުރައްވާފައި މިވަނީ، ލ. ގަމުގައި ކުރިއަށް ދިޔަ "ވިއަވަތި ރާއްޖެ" ކޮންފަރެންސްގައި ވާހަކަފުޅުދައްކަވަމުން ރައީސުލްޖުމުހުރިއްޔާ އިބްރާހިމް މުހައްމަދު ޞާލިހް ކުރައްވަނީ ކީރިތި ޤުރުއާންގައި ބަޔާންކުރައްވާފައިވާ ފަދަ ހެޔޮ ވެރިކަމެއްކަމަށް އޭނާ ވިދާޅުވުމާއި ގުޅިގެން ގިނަ ބައެއްގެ ފާޑުކިޔުންތައް އޭނާއަށް އަމާޒުވެފައިވާ ދަނޑިވަޅެއްގައެވެ. 

އެ ކޮންފަރެންސްގައި ވާހަކަދައްކަވަމުން މިނިސްޓަރު ވިދާޅުވީ ހެޔޮވެރިކަމެއްގައި ހުންނަން ޖެހޭ އެންމެ މާތް އެންމެ މަތިވެރި އެންމެ މޮޅު އެންމެ ވިދާ ބަބުޅާ ސިފައަކީ ފުރިހަމަ ސިފާގައި އެންމެން އެކުގައި މަޝްވަރާ ކުރުންކަމަށާއި ކީރިތި ޤުރުއާނުގައި ފުރިހަމަ ވެރިކަމެއްގެ ނިޒާމުގައި މަޝްވަރާ ކުރުން އޮންނަން ޖެހޭ މިންވަރު ވަރަށް ސާފުކޮށް ގެނެސް ދެއްވާފައިވާކަމަށެވެ.

ކީރިތި ޤުރުއާނުން މިސާލު ނަންގަވަމުން މިނިސްޓަރު ވިދާޅުވީ އެއީ ހެޔޮވެރިކަމެއްގައި ހުންނާނެ ސިފަތަށް ކަމަށާއި މި ވެރިކަމުން އެ ސިފަތަށް އެންމެ ރީތިގޮތުގައި ފުރިހަމަގޮތުގައި ފެންނަކަމަށެވެ.