އެއްޖިންސުން ގުޅުން ހިންގި މައްސަލައިގައި ދައުވާ އުފުލާފައިވާ ގާނޫނީ ވަކީލް ނާޒިމް އަބްދުއްސައްތާރުގެ ޕާސްޕޯޓް ކްރިމިނަލް ކޯޓުން ހިފެހެއްޓި އަމުރުގެ މުއްދަތު ހަމަވެފައިވާ ކަމަށް އޭނާ ވިދާޅުވެއްޖެ އެވެ.
ނާޒިމްގެ ޕާސްޕޯޓް ކޯޓު އަމުރެއްގެ ދަށުން ހިފަހައްޓާފައިވާ ކަމަށް ފުލުހުން ހާމަކޮށްފައިވަނީ މިދިޔަ ޖޫން 25 ވަނަ ދުވަހު އެވެ. އެ އަމުރު މިދިޔަ އޮގަސްޓް މަހުގެ 24 ވަނަ ދުވަހަށް ހަމަވެފައިވާ ކަމަށް ނާޒިމް މިއަދު ވަނީ ވިދާޅުވެފަ އެވެ. އެހެން ކަމުން އޭނާ ބޭނުންވާނަމަ ކޮންމެ ވަގުތަކު ވެސް ގައުމުން ފުރައިގެން ދެވިދާނެ ކަަމަށް ވެސް އޭނާ ވިދާޅުވިއެވެ.
ނާޒިމް މިފަދައިން ވިދާޅުވެފައި ވާއިރު، ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގީރް އާއި އެކު އޭނާ އެއްޖިންސުން ގުޅުން ހިންގި ކަމުގެ ކުށް ވަނީ އޭނާގެ މައްޗަށް ސާބިތުވެފައެވެ. އަދި އެމައްސަލައިގެ ހުކުމް ކުރުމުގެ އަޑުއެހުން މިއަދު 4:30 އަށް ކްރިމިނަލް ކޯޓުން ވަނީ ތާވަލްކޮށްފައެވެ.
ބަންގުލަދޭޝް ރައްޔުތެއް ކަމުގައިވާ އެމްޑީ އަލަމްގިރާއެކު އެއްޖިންސުން ގުޅުން ހިންގާ ވީޑިއޯއެއް އާންމުވީ މައްސަލައިގައި ނާޒިމްގެ މައްޗަށް އުފުލާފައިވާ ދައުވާގެ އިބްތިދާއީ އަޑުއެހުން މި ސެޕްޓެމްބަރު 11 ވަނަ ދުވަހު ކްރިމިނަލް ކޯޓުގައި ވަނީ ބާއްވާފައެވެ.
ސިއްރުން ކުރިއަށް ގެންދިޔަ އެ އަޑުއެހުމުގައި ނާޒިމް ވަނީ އަލްމަގީރާއެކު ޖިންސީ ގުޅުން ހިންގި ކަމަށް އިއުތިރާފުވެފައެވެ. އެއާއެކު ކްރިމިނަލް ކޯޓުން ވަނީ އެއް ޖިންސުން ޖިންސީ ގުޅުން ހިންގުމުގެ ކުށުގެ ދައުވާ އޭނާގެ މައްޗަށް ސާބިތުވާ ކަމަށް ކަނޑައަޅާފައެވެ.
Advertisement
This content is created and paid for by advertisers and does not involve Voice Journalists
