ނާޒިމް ސައްތާރު އަކީ ކުށްވެރިއެއް އަދި ވިކްޓިމް އެއް ކަމަށާ އޭނާ މިހާރު ބޭނުންވަނީ ތައުބާވާން ކަމަށް ވިދާޅުވެއްޖެއެވެ. 

އެތައް ބަޔަކާއި އެކު އެއްޖިންސުން ގުޅުން ހިންގާފައިވާ ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގިރި އާއި އެކު އެއްޖިންސުން ހިންގާފައިވާ ކަމަށް އިއުތުރާފްވެފައިވާ ނާޒިމް ސައްތާރު މިއަދު ނެރުނު ބަޔާނެއްގައި ބުނީ, އޭނާގެ މައްޗަށް ޕީޖީ އޮފީހުން ދައުވާކޮށްފައިވަނީ ޤާނޫނުލް ޢުޤޫބާތުގެ 411 ވަނަ މާއްދާގެ (ހ)ގެ ދެވަނަ އަކުރާ ހަވާލާދީ އެ މާއްދާގެ (ށ)ގެ 1 ވަނަ ނަންބަރުގެ ދަށުން ކަމަށެވެ. އޭނާގެ މައްޗަށް އުފުލާފައިވަނީ އެއްޖިންސުން ޖިންސީ ގުޅުން ހިންގުމުގެ ކުށުގެ ދައުވާ ކަމަށެވެ.

އަދި އޭނާ ކުރި ކުށާމެދު ހިތާމަކޮށް ތައުބާވާ ކަމަށާއި، އެ ކުށަށް އިއުތިރާފުވަނީ އެކަމުގައި އޭނާއަކީ ކުށްވެރިއަކަށްވުމުގެ އިތުުރަށް، މިކަމުގައި އޭނާ ބުލެކްމެއިލްކޮށް ފައިސާ އަތުލަންއުޅުމުގެ ސަބަބުން އެކަމުގައި އޭނާއަކީ އަނިޔާ ލިބުނު މީހަކަށްވާ ހާލުގައި ކަމަށްވެސް އޭނާ ބުނެފައިވެއެވެ.

"އަދި އަޅުގަނޑުގެ މި ކުށަށް މި އިއުތިރާފު މިވަނީ އަޅުގަނޑަކީ މިކަމުގައި ކުށްވެރިއަކަށްވުމުގެ އިތުރުން، މިކަމުގައި ބްލެކްމެއިލްކޮށް ފައިސާ އަތުލަންއުޅެ، އެމައްސަލައިގައި ވިކްޓިމްއެއް ކަމުގައި ވާއިރު ވެސް މެއެވެ." ނާޒިމް ސައްތާރުގެ ބަޔާނުގައި ބުނެފައިވެއެވެ.

ނާޒިމް ސައްތާރު ބުނެފައިވަނީ، އޭނާ ރާއްޖޭން ބޭރަށް ފިލައިގެން ނުގޮސް، ރާއްޖޭގައި ހުރެ، ކުށަށް އިއުތިރާފުވެފައިވަނީ މި ކުށުގެ އަދަބަށް ކުރިމަތިލާން ބޭނުންވާތީ ކަމަށެވެ.

"އަޅުގަނޑު ރާއްޖޭން ބޭރަށް ފިލައިގެން ނުގޮސް، ރާއްޖޭގައި ހުރެ، އަޅުގަނޑު އިއުތިރާފުވެ، މި ކުށުގެ އަދަބަށް ކުރިމަތިލާން އަޅުގަނޑު ބޭނުން ވާތީ އެވެ. އަޅުގަނޑު އެދެނީ މި ކުށަށް އިއުތިރާފުވެ ތައުބާވެ ރައްޔިތުންގެ އަރިހުން މާފެވެ." ނާޒިމް ސައްތާރު ނެރުއްވި ބަޔާނުގައިވެ އެވެ.

ނާޒިމް ސައްތާރު މިފަދަ ބަޔާނެއް ނެރެފައި މިވަނީ، އޭނާ އެއްޖިންސުން ގުޅުން ހިންގި މައްސަލައިގެ ހުކުމް ކުރުމުގެ އަޑުއެހުން މިއަދު 4:30 ގައި ކްރިމިނަލް ކޯޓުގައި ތާވަލްކޮށްފައި ވަނިކޮށެވެ.