މަޝްހޫރު ދީނީ އިލްމުވެރިޔާ އައްޝައިޚް އާދަމް ނަސީމް (ބީއޭ ނަސީމް) މިއަދު އަވަހާރަވެއްޖެ އެވެ.

އުމުރުފުޅުން 80 އަހަރުގެ ނަސީމް އަވަހާރަވީ ރޭ ފަތިހުގެ ވަގުތެއްގައި މާލޭގަ އެވެ. އަދި ޝައިޚް ގެ ޖަނާޒާ މިއަދު މެންދުރު ނަމާދަށްފަހު އިސްލާމީ މަރުކަޒުގައި ބޭއްވުމަށް ވަނީ ހަމަޖެހިފައެވެ.

ނަސީމް އަވަހާރަވުމާއި ގުޅިގެން ގިނަ ދީނީ ޢިލްމުވެރިން އަންނަނީ އާއިލާ އަށް ތައުޒިޔާ ވިދާޅުވަމުންނެވެ. 

ނަސީމަށް ބީއޭ ނަސީމްގެ ނަމުން އާންމުކޮށް މުހާތަބު ކުރަން ފެށީ، ރާއްޖޭގައި އިނގިރޭސި ބަހުން ފުރަތަމަ ޑިގްރީ ހާސިލުކުރެއްވި މަދު ބޭފުޅުންގެ ތެރޭގައި އޭނާ ހިމެނިވަޑައިގަތުމުންނެވެ. އޭގެ އިތުރުން، އޭނާ އަކީ މަދީނާ ޔުނިވަސިޓީން ދީނީ ތައުލީމު ހާސިލުކުރެެއްވި އެންމެ ފުރަތަމަ ދިވެހިންގެ ތެރޭގައި ވެސް ހިމެނިވަޑައިގަންނަވާ ބޭފުޅެކެވެ.

ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި، އޭރުގެ އިދިކޮޅު ފަރާތްތަކުން ރާއްޖެއަށް ޑިމޮކްރެސީ ގެނައުމަށް ހިންގި ހަރަކާތްތަކުގައި އިސް ދައުރެއް ނަސީމް އަދާކުރެއްވިއެވެ. އެގޮތުން ނަސީމްއަކީ ނުވަދިހައިގެ އަހަރުތަކުން ފެށިގެން ސިޔާސީ އަދި ދީނީ ގޮތުން ގައުމު އިސްލާހު ކުރެއްވުމަށް އެކިއެކި މަސައްކަތް ކުރެއްވި ބޭފުޅެކެވެ. އެއިރު އޭނާގެ މަސައްކަތުގެ ތެރެއިން ހައްޔަރުކޮށް ދައުވާ ކުރުމެއް ނެތި ޖަލުގައިވެސް ބެހެއްޓި އެވެ. 

ނަސީމަކީ އެމްޑީޕީ އުފެދިގެން އައިއިރު އިސް ސަފުން ފެނުނު ބޭފުޅެކެވެ. ބީއޭ ނަސީމްވަނީ އެމްޑީޕީގެ އިސްލާމީ މަޝްވަރާ މަޖިލީހުގެ ރައީސްކަން ދިގު މުއްދަތަކަށް ކުރައްވާފައެވެ.

އެހެންނަމަވެސް، ކުރީގެ ރައީސް މުހައްމަދު ނަޝީދުގެ ވެރިކަމުގައި، ރާއްޖޭގެ ތައުލީމީ ނިޒާމަށް އިސްލާމް ދީނާ ބީރަށްޓެހި ކަންކަން ތައާރަފް ކުރަން މަސައްކަތް ކުރި ކަމަށް ތުހުމަތު ކުރެއްވައި، އެމްޑީޕީގެ އިސްލާމީ މަޝްވަރާ މަޖިލީހުގެ ރައީސް ކަމުންނާއި އެ ޕާޓީގެ މެންބަރު ކަމުންވެސް 7 ނޮވެމްބަރު 2010ގައި އޭނާ ވަނީ ވަކިވެވަޑައިގެންފައެވެ. 

އެއަށްފަހު، ޖެނުއަރީ 2013ގައި އަދާލަތު ޕާޓީއާވެސް ނަސީމް ގުޅިވަޑައިގެންނެވިއެވެ. އެހެން ނަމަވެސް، ހަޔާތުގެ ފަހު ދުވަސްތަކުގައި އޭނާ ބޮޑަށް ހުންނެވީ ސިޔާސީ ކަންކަމުން ދުރުގައެވެ.