ޝައިޚް އާދަމް ނަސީމް (ބީއޭ)ގެ ވަކިވުމާއި އެކު، ދިވެހިރާއްޖޭގެ ދަޢުވަތުގެ މައިދާނުން ގެއްލިގެން އެދިޔައީ އެފަދަ ޚިދުމަތްތެރި ބޭފުޅެއް މަދުންނޫނީ ނުފެންނަވަރުގެ ޝަޚުޞިއްޔަތެއް ކަމަށް ޖަމިއްޔަތުއް ސަލަފުގެ ރައީސް އައްޝައިހް އަބްދުﷲ ބިން މުހައްމަދު ވިދާޅުވެއްޖެއެވެ. 

އުމުރުފުޅުން 80 އަހަރުގައި ޝެއިޚް ނަސީމް ރޭ ފަތިހުުގެ ވަގުތެއްގައި އަވަހާރަވުމާއި ގުޅިގެން ޝެއިޚް އަބްދުﷲ މިއަދު ކުރެއްވި ޓުވީޓެއްގައި ވިދާޅުވީ،  ދިވެހިރާއްޖޭގެ ދަޢުވަތުގެ މައިދާނުން ގެއްލިގެން އެދިޔައީ އެފަދަ ވަރަޢަވެރި، ޢަމަލީ، ޚިދުމަތްތެރި ބޭފުޅެއް މަދުންނޫނީ ނުފެންނަވަރުގެ ޝަޚުޞިއްޔަތެއް ކަމަށެވެ.

"މިދިޔަ ހަފްތާ އަންގާރަދުވަހު ހަވީރު ކުރެވުނު ޒިޔާރަތް ވެގެންއެދިޔައީ އެންމެފަހުން ފެނުނު ފެނުމަށެވެ. އަޅުގަނޑަށް ޝޭޚް ތަޖްރިބާ ކުރެވުނީ ވަރަށް ހެޔޮލަފާ، ޢަމަލުވެރި، ވަރަޢަވެރި، ތަވާޟުޢުވެރި ބޭފުޅެއްގެގޮތުގައެވެ." ޝެއިޚް އަބްދުﷲ ގެ ޓުވީޓުގައި ވިދާޅުވިއެވެ. 

ނަސީމް އަކީ ރާއްޖޭގައި އިނގިރޭސި ބަހުން ފުރަތަމަ ޑިގްރީ ހާސިލުކުރެއްވި މަދު ބޭފުޅުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އޭގެ އިތުރުން، އޭނާ އަކީ މަދީނާ ޔުނިވަސިޓީން ދީނީ ތައުލީމު ހާސިލުކުރެެއްވި އެންމެ ފުރަތަމަ ދިވެހިންގެ ތެރޭގައި ވެސް ހިމެނިވަޑައިގަންނަވާ ބޭފުޅެކެވެ.

ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި، އޭރުގެ އިދިކޮޅު ފަރާތްތަކުން ރާއްޖެއަށް ޑިމޮކްރެސީ ގެނައުމަށް ހިންގި ހަރަކާތްތަކުގައި އިސް ދައުރެއް ނަސީމް އަދާކުރެއްވިއެވެ. އެގޮތުން ނަސީމްއަކީ ނުވަދިހައިގެ އަހަރުތަކުން ފެށިގެން ސިޔާސީ އަދި ދީނީ ގޮތުން ގައުމު އިސްލާހު ކުރެއްވުމަށް އެކިއެކި މަސައްކަތް ކުރެއްވި ބޭފުޅެކެވެ. އެއިރު އޭނާގެ މަސައްކަތުގެ ތެރެއިން ހައްޔަރުކޮށް ދައުވާ ކުރުމެއް ނެތި ޖަލުގައިވެސް ބެހެއްޓި އެވެ. 

ނަސީމަކީ އެމްޑީޕީ އުފެދިގެން އައިއިރު އިސް ސަފުން ފެނުނު ބޭފުޅެކެވެ. ބީއޭ ނަސީމްވަނީ އެމްޑީޕީގެ އިސްލާމީ މަޝްވަރާ މަޖިލީހުގެ ރައީސްކަން ދިގު މުއްދަތަކަށް ކުރައްވާފައެވެ.

އެހެންނަމަވެސް، ކުރީގެ ރައީސް މުހައްމަދު ނަޝީދުގެ ވެރިކަމުގައި، ރާއްޖޭގެ ތައުލީމީ ނިޒާމަށް އިސްލާމް ދީނާ ބީރަށްޓެހި ކަންކަން ތައާރަފް ކުރަން މަސައްކަތް ކުރި ކަމަށް ތުހުމަތު ކުރެއްވައި، އެމްޑީޕީގެ އިސްލާމީ މަޝްވަރާ މަޖިލީހުގެ ރައީސް ކަމުންނާއި އެ ޕާޓީގެ މެންބަރު ކަމުންވެސް 7 ނޮވެމްބަރު 2010ގައި އޭނާ ވަނީ ވަކިވެވަޑައިގެންފައެވެ. 

އެއަށްފަހު، ޖެނުއަރީ 2013ގައި އަދާލަތު ޕާޓީއާވެސް ނަސީމް ގުޅިވަޑައިގެންނެވިއެވެ. އެހެން ނަމަވެސް، ހަޔާތުގެ ފަހު ދުވަސްތަކުގައި އޭނާ ބޮޑަށް ހުންނެވީ ސިޔާސީ ކަންކަމުން ދުރުގައެވެ. 

ޝައިޚް ނަސީމް ގެ ޖަނާޒާ މިއަދު މެންދުރު ނަމާދަށްފަހު އިސްލާމީ މަރުކަޒުގައި ބޭއްވުމަށް ވަނީ ހަމަޖެހިފައެވެ.