ރާއްޖެ ޓްރެވެލް ލިންކު (އާރްޓީއެލް) ގެ މިނީ ބަހުގެ އޮޕަރޭޝަނަށް އޯކިޑް މަގުގައި ޕާކް ކުރުން މަނާކޮށް ބަދަލުގައި ހެދި ޕާކިން ޒޯންގެ މަސައްކަތް ނިންމައިފިއެވެ. 

މާލެ ސިޓީ ކައުންސިލުން ކުރިއަށް ގެންދިޔަ މި ޕާކިން ޒޯން ހެދުމުގެ މަސައްކަތް ނިމިފައިވާކަން މާލެ ސިޓީގެ މޭޔަރު ޑރ މުހައްމަދު މުއިއްޒު ވަނީ ޓުވީޓު ކުރައްވާފައެވެ.

މޭޔަރު މުއިއްޒުގެ ޓުވީޓުގައި ބުނެފައިވާ ގޮތުން މ. ސްޓާލިން ގައި ހެދުނު މި ޕާކިން ޒޯނުގައި 50 ސައިކަލާއި 15 ކާރު ޕާކު ކުރެވޭނެ ޖާގަ ހަދާ ކުރަހާ ނިމިފައެވެ. 

މާލެ ސިޓީގައި އާރްޓީއެލްގެ މިނީ ބަސް ހިދުމަތް ތައާރަފްކޮށް ފުރިހަމަ ކުރުމުގެ މަސައްކަތުގެ ދަށުން ޓްރެފިކް ކޮންޓްރޯލްކޮށް ބަހަށް ޖާގަ ދިނުމުގެ ގޮތުން ބަސް ދަތުރު ކުރާ މަގުތަކުގައި ޕާކް ކުރުން ވަނީ މަނާކޮށްފައެވެ. އަދި މި މަގުތަކުން ގެއްލޭ ޕާކިން ޖާގަ ތަކުގެ ބަދަލުގައި އައު ޕާކިން ޒޯން ތަކެއް އެޅުމުގެ މަސައްކަތް މާލެ ސިޓީ ކައުންސިލުން ދަނީ ކުރަމުންނެވެ. އެގޮތުން މިހާތަނަށް މަޖީދީ މަގާއި، އަމީނީ މަގު އަދި އޯކިޑް މަގުގެ ގެއްލުނު ޖާގަ ތަކުގެ ބަދަލުގައި އެކި ސަރަހައްދުތަކުގައި ވަނީ ޕާކިން ޒޯންތައް އަޅާފައެވެ.