ޝައިޚް އާދަމް ނަސީމް (ބީއޭ) ދެއްވި ދަރުހެއް ވެގެންދިޔައީ މުޅި ހަޔާތް ބަދަލުކޮށްލި ސަބަބަކަށް ކަަމަށް ޖަމިއްޔަތުއް ސަލަފުގެ ޗީފް މާކެޓިންގ އޮފިސަރ ޢަލީ ރަމީޒު ވިދާޅުވެއްޖެެއެވެ.  

ޝެއިޚް އާދަމް ނަސީމް އިއްޔެ އަވަހާރަވެފައިވާއިރު، ޝެއިޚް އަށް ރަހުމަތް ލެއްވުން އެދި ދުޢާ ކުރައްވަމުން ޢަލީ ރަމީޒު އިއްޔެ މީސްމީޑިއާގައި އާއްމު ކުރި ވީޑިއޯއެއްގައި ބުނެފައިވާ ގޮތުން، 1999 ވަނަ އަހަރު އޭނާ ހައްޖުގެ އަޅުކަން އަދާ ކުރައްވަން އުޅުއްވި އިރު، ބީއޭ ނަސީމް ދެއްވި ދަރުހެއް ވެގެން ދިޔައީ އޭނާގެ މުޅި ހަޔާތް ބަދަލު ކޮށްލި ސަބަބެއް ކަމަށެވެ.

"އެއީ 1424 (1999) ވަނަ އަހަރުގެ ހައްޖުމަސް. ތަނަކީ މާތް ވެގެންވާ ޢަރަފާތު ބިން. އެދުވަހު އައްޝައިހް އާދަމް ނަސީމް ދެއްވި ކުރުކުރު ދަރުސް ވެގެން ދިޔައީ އަޅުގަނޑުގެ މުޅި ޙަޔާތް ބަދަލުކޮށްލަން މެދުވެރިވި ސަބަބަށް. އޭގެ ފަހުންވެސް ޝެއިޚް ވަނީ ވަރަށް އަގުހުރި ނަސޭހަތްތަކެއް އަޅުގަނޑަށް ދެއްވާފައި. އަދި އެ ނަސޭހަތްތައް ވަނީ އަޅުގަނޑުގެ ހިތުގައި ބިންވަޅު ކަނޑައި ނެގިފައި. މާތް ރަސްކަލާނގެ އައްޝެއިޚް އާދަމް ނަސީމަށް ހެޔޮ ރަހުމަތް ލައްވާށި!" ޢަލީ ރަމީޒުގެ ވީޑިއޯގައި އޭނާ ބުނެފައިވެއެވެ. 

ޢަލީ ރަމީޒު ވީޑިއޯގައި އިޝާރާތް ކުރައްވާ ދުވަސްވަރަކީ އޭނާ ލަވަކިޔުމުގެ ދާއިރާގައި އެންމެ މަޝްހޫރުކަން ހޯދި ޒަމާނެވެ. އެހެން ނަމަވެސް، އިސްލާމް ދީނުގައި އެކަމުގެ ހުކުމް އޮންނަ ގޮތް އެނގުމުން އޭނާ ވަނީ އެކަމާއި ދުރުވެ، ތައުބާވެސް އިއުލާން ކުރައްވާފައެވެ. އެއަށްފަހު، އޭނާ މިހާރު އަންނަނީ ދީނީ ޖަމިއްޔާ އެއް ކަމަށްވާ ޖަމިއްޔަތުއްސަލަފާއި ގުޅިވަޑައިގެން ދީނަށް ޚިދުމަތް ކުރުމުގެ މަސައްކަތުގައި އަމަލީ ގޮތުން ހަރަކާތްތެރިވަމުންނެވެ. 

އެގޮތުން، ޖަމިއްޔަތުއް ސަލަފުގެ ޒުވާނުންނަށް އަމާޒުކޮށްގެން ރަށްރަށުގައި ކުރިއަށްގެންދާ "އަލީ ރަމީޒާއެކު" ޕްރޮގްރާމްގެ ތެރެއިންވެސް އޭނާ އަންނަނީ ޒުވާނުންނަށް އޭނާގެ ހަޔާތުގައި ދިމާވެފައިވާ ކަންކަމާއި ގުޅޭ ޢިބުރަތްތެރި ވާހަކަތައް ކިޔައިދެއްވަމުންނެވެ. އެވާހަކަ ތަކުގެ ތެރެއިން، އޭނާ ހައްޖުގެ އަޅުކަން އަދާކުރެއްވުމަށް ގޮސް އުޅުއްވި އިރު މިއުޒިކާއި ގުޅިގެން ބީއޭ ނަސީމް ދެއްވި ދަރުހަކީ އޭނާގެ ހަޔާތަށް ބޮޑު ބަދަލު ތަކެއް ގެންނަން އޭނާ ވިސްނަން ފެށި ހިސާބު ކަމަށް ފާހަގަކުރައްވައެވެ.