ރާއްޖޭގައި ހިންގާ ފުރަތަމަ ސްޕޭސް މިޝަނަށް 'އަޒުމް' ގެ ނަމުން ނަންދީފިއެވެ.
ރާއްޖޭގައި ހިންގާ ފުރަތަަމަ ސްޕޭސް މިޝަންއަށް ދޭނެ ދިވެހި ނަމެއް ހޯދުމަށް އެ މިޝަންގެ މެއިން ޕާޓްނަރު ކަމަށްވާ އެޗްޑީސީއިން އިއުލާން ކުރީ މިދިޔަ ޖުލައި މަހުގައެވެ.
އެޗްޑީސީގެ މި އިއުލާނާއި ގުޅިގެން ހުށަހެޅި ނަންތަކުގެ ތެރެއިން، 'އަޒުމް' މި ނަން ހުށަހަޅާފައިވަނީ ސައުދު އިދްރީސް އެވެ. އަޒުމްގެ ގެ މާނައަކީ ކަމެއް ކުރުމަށް ގަސްތުކޮށް، މާ ވަރުގަދައަށް ހިތުގައި ކަނޑައަޅާ ކަނޑައެޅުމެވެ.
ރާއްޖޭގެ ފުރަތަަމަ ސްޕޭސް މިޝަން އަށް މި ނަމުން ނަން ދީފައިވަނީ، އެއީ އެހެން ގައުމު ތަކުގެ މީހުންނަށްވެސް ކިޔާލަން ފަސޭހަ ދިވެހި ނަމަކަށް ވާތީ ކަމަށް އެޗްޑީސީން ބުނެއެވެ. އަދި އެބަހުގެ މާނަ އާއި އެއްގޮތަށް އައު އުސްމިންތަކަށް ދަތުރު ކުރުމަށް ހިތުގައި އަޒުމް ކަނޑައަޅައި ގަދައަށް މަސައްކަތް ކުރުމަށް ޓީމްގެ ބައިވެރިންނަށް ހިތްވަރު ލިބިގެން ދިއުމަށް ކަމަށްވެސް ފާހަގަކޮށްްފައިވެއެވެ.
ސްޕޭސް މިޝަންގެ ޓީމުގައި 30 އަހަރުން ދަށުގެ ހަތް ޒުވާނުން ހިމެނޭއިރު އެއީ ދެ އަންހެނަކާއި ފަސް ފިރިހެނުންނެވެ. އެ ޓީމުގައި ހިމެނޭ ޒުވާނުންނަކީ އެރޯސްޕޭސް އިންޖީނިއަރުންނާއި އިލެކްޓްރޯނިކްސް އަދި މެކޭނިކަލް އިންޖީނިއަރުންގެ އިތުރުން ކޮމްޕިއުޓާ ސައިންސް ދާއިރާގެ ގްރެޖުއޭޓުންނެވެ.
ރާއްޖޭގައި ފުރަތަމަ ފަހަރަށް ކުރިއަށްގެންދާ ސްޕޭސް މިޝަން ހިންގާ އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް)އިން މީގެ ކުރިން ބުނެފައިވާ ގޮތުގައި އެ ސްޕޭސް މިޝަންގައި ބައިވެރިވާ ޓީމަކީ، ސެޓަލައިޓް ހަދައި ލޯންޗުކޮށް އަދި ސައިންޓިފިކް ރިސާޗް ހަދަން ދަސްކޮށްދޭ ކޯހެއް ކަމަށްވާ ނެނޯ ސެޓަލައިޓް އިންޖިނިއަރިން ޕްރޮފެޝަނަލް ކޯސް ފުރިހަމަކޮށްފައިވާ ޓީމެކެވެ.
ސްޕޭސް މިޝަންގެ މަގުސަދަކީ ރާއްޖޭގެ ފުރަތަމަ "ޕްރޮޓޯޓައިޕް ސެޓެލައިޓް" ހަދައި ޓެސްޓްކުރުމަށްވާއިރު، އެ ސެޓްލައިޓަކީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް ބޭނުންވާ މައުލޫމާތު އެއްކުރަން އަޖުމަ ބެލުމަށް ހަދާ ސެޓެލައިޓެކެވެ.
Advertisement
This content is created and paid for by advertisers and does not involve Voice Journalists
