މާލޭގެ އަމީނީމަގު ހެދުމަށް ގަސް ނުކަނޑާނެ ކަމަށް ބުނި ނަމަވެސް ފެންނަމުން މިދަނީ ގަސްތައް ކަނޑައި ތިރި ކުރާތަން ކަމަށް ވިދާޅުވެ މާލެ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހް ރޯޑް ޑިވަލޮޕްމަންޓް ކޯޕަރޭޝަން (އާރްޑީސީ) އާއި ސަރުކާރަށް ފާޑުވިދާޅުވެއްޖެއެވެ.
މާލޭގެ އަމީނީ މަގު ހެދުމުގެ މަސައްކަތް ކުރުމަށްޓަކައި އެމަގުގައި ހުރި ބައެއް ގަސްތައް އާރްޑީސީގެ އެދުމުގެ މަތިން ސިޓީ ކައުންސިލުން އަންނަނީ ކަނޑަމުންނެވެ. އެކަމާއި ގުޅިގެން ކަންބޮޑުވުން ފާޅުކޮށް ސައިފް ކުރެއްވި ޓުވީޓެއްގައި ވިދާޅުވީ އަމީނީ މަގުން ކަނޑާ ގަސްތައް ގެންދަނީ ކުޑަ ގިރި އަށް ކަމަށް މައުލޫތު ލިބިލައްވާ ކަމަށާ، ކުޑަ ގިރި ފެހި ކުރަން މާލޭގެ ގަސްތައް ކެނޑުމާއި އޭނާ ދެކޮޅު ކަމަށެވެ.
"އަމީނީމަގު ހަދަން ނުކަނޑާނެކަމަށް ބުނި ގަސްތައް މިއަދު މިފެންނަނީ ކަނޑާ ބިންތިރި ކުރާ ތަން. ގަސްތައް ގެންދަނީ ކުޑަގިރުއަށް ކަމަށްވޭ!ކުޑަގިރި ހިއްކުމާވެސް ދެކޮޅު. އެތަން ފެހިކުރަން މާލޭގެ ގަސްތައް ކެނޑުމާވެސް ދެކޮޅު!" ސައިފް ވިދާޅުވިއެވެ.
މާލޭގެ އަމީނީ މަގު ހެދުމަށް މަގުގައި ހުރި ގަސްތައް މާލޭ ސިޓީ ކައުންސިލުން އަންނަނީ ކަނޑަމުންނެވެ.
މި މައްސަލައިގައި އާންމު ފަރާތަކުން ކަންބޮޑުވުން ފާޅުކޮށް މާލޭ ސިޓީ ކައުންސިލުގެ މޭޔަރު ޑރ. މުހައްމަދު މުއިއްޒު ޓެގް ކުރުމުން އެފަރާތްތަކަށް ރައްދު ދެއްވައި ވިދާޅުވެފައިވަނީ ސިޓީ ކައުންސިލުގެ މުވައްޒަފުން އެ މަސައްކަތް ކުރަމުން ގެންދަނީ އަމީނީ މަގު ހެދުމުގެ މަސައްކަތް ކުރާ ފަރާތް ކަމަށްވާ އާރުޑީސީ އިން އެކަމަށް އެދުމުން ކަމަށެވެ.
"އަމީނީ މަގު ހަދާ ފަރާތުން ގަސް ނަގައިދޭން އެދޭތީ، މަގު ހެދުމުގެ މަޝްރޫއަށް އެއްބާރުލުން ދިނުމުގެ ގޮތުން (ގަސް ކެނޑުމުގެ މަސައްކަތް ކުރަމުން ދަނީ)" މޭޔަރު މުއިއްޒު ވިދާޅުވެފައިވެއެވެ.
ތަރައްގީގެ މަޝްރޫއުތަކަށް، ހާއްސަކޮށް މަގު ހެދުމުގެ މަޝްރޫއުތަކުގެ ދަށުން ގަސް ކެނޑުމަކީ އާންމު ކަމެއް ނަމަވެސް އެއީ އަބަދުވެސް އާންމުންނާއި ތިމާވެއްޓަށް ލޯބިކުރާ ގިނަ ފަރާތްތަކެއްގެ ކަންބޮޑުވުމާއި ފާޑުކިޔުން ލިބޭ ކަމެއް ކަން ފާހަގަ ކޮށްލެވެއެވެ.
ސަރުކާރުގެ ބަޖެޓުން 84 މިލިއަން ރުފިޔާ ހަރަދުކޮށްގެން އާރުޑީސީ އާއި އަމީނީ މަގުގެ މަސައްކަތް ހެދުމުގެ މަޝްރޫއު ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. މި މަޝްރޫއުގެ ދަށުން އަމީނީ މަގުގައި ތާރު އަޅާ ތަރައްގީ ކުރުމަށް ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
