މީހުން މަރަން ފަސް ނުޖެހޭ 1400 މީހުން ދެނެގަނެވިފައިވާކަމަށް ކަމިޝަނަރ އޮފް ޕޮލިސް މުހައްމަދު ހަމީދު ވިދާޅުވިތާ ދެ އަހަރު ފާއިތުވެގެން ދިޔައިރުވެސް އެކަމާއި ގުޅިގެން އެއްވެސް ފިޔަވަޅެއް އަޅާފައި ނެތުމަކީ ކަންބޮޑުވާކަމެއްކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
އިންތި މިފަދައިން ވިދާޅުވެފައިވަނީ ކާށިދޫ ދާއިރާގެ މެންބަރު ޖާބިރު ހުށަހަޅުއްވާފައިވާ ކުއްލި މައްސަލައަށް ވާހަކަދައްކަވަމުންނެވެ.
ޖާބިރުގެ ކުއްލި މައްސަލައަކީ އޮފް ޑިއުޓީގައި އުޅުނު ޑްރަގް އެންފޯސްމަންޓް ޑިޕާޓްމަންޓް (ޑީއައިޑީ) ގެ ތިން ފުލުހަކަށް މި މަހުގެ 9 ވަނަ ދުވަހު މެންދުރު މަޖީދީ މަގު އުތުރުކޮޅުން ހަމަލާ ދިނުމާއި ގުޅިގެން ހުށަހަޅުއްވާފައިވާ މައްސަލައެކެވެ.
އިންތި ވިދާޅުވީ ދިވެހިރާއްޖޭގެ ފުލުހުންގެ ޚިދުމަތަށް ވަރަށް ބޮޑެތި ބަޖެޓުތަކެއް ކޮންމެ އަހަރަކުވެސް ކަނޑައެޅޭކަމަށެވެ. އަދި އެއީ ރައްޖޭގެ ރައްޔިތުންގެ ރައްކާތެރިކަން ކަށަވަރުކުރުމަށާއި، ފުލުހުންގެ ޚިދުމަތުގެ މަސައްކަތް ހަރުދަނާ ކުރުމާއި ފުލުހުންގެ ޚިދުމަތުގެ ގާބިލުކަން އިތުރުކުރުމަށް އެކުލަވާލާ ބަޖެޓުތަކެއްކަންވެސް އިންތި ފާހަގަކުރެއްވިއެވެ.
އެހެން ނަމަވެސް، ކުށްކުރާ މީހުން ނުވަތަ އެ ގާބިލުކަން ހުރި މީހުން ދެނެގަނެވެނު ނަމަވެސް، ކުށް ކުރުން ހުއްޓުވާ އަމާންކަން ކަށަވަރުކުރުމަށް ފުލުހުންގެ ޚިދުމަތުން އެންމެ އެކަށީގެންވާ ގޮތަށް މަސައްކަތް ކުރަމުން ނުދާކަމަށް އިންތި ވަނީ ވިދާޅުވެފައެވެ.
"އަޅުގަނޑު ހަނދާން އެބަހުރި މީގެ ދެ އަހަރެއްހާ ދުވަސް ކުރުން ކަމިޝަނަރ އޮފް ޕޮލިސް ވިދާޅުވި. ގާތްގަނޑަކަށް 1400 އެއްހާ މީހުން އެބަ ތިއްބޭ މި ރާއްޖޭގައި ޖެހިގެން ހުރި މީހާ މަރާލަން ޖެހިލުން ނުވާވަރަށް އެމީހުންެގެ ނުބައިކަން އިތުރުވެފައި. އޭގެ ފަހުން މިހާރު ދެ އަހަރެއްހާ ދުވަސް ދިޔައީ. އަޅުގަނޑު ނުދެކެން މި ކަންކަމަށް އެކަށީގެންވާ ރަނގަޅަށް ސްޓްރެޓެޖީ އެކުލަވާލެވި ފިޔަވަޅުތަކެއް އެލޭތަނެއް"
މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ
އެއާއި ގުޅުވާ އިންތި ވިދާޅުވީ މުޅި ރާއްޖޭގައި ގޭންގުތައް އޮޕަރޭޓު ކުރާ މީހުން އިންތިހާއަށް އިތުރުވެފައިވާކަމަށާއި، އެ މީހުންގެ ނުފޫޒު މުއައްސަސާތަކަށް ފޯރާފައިވާ މިންވަރުވެސް މީގެ ކުޑަ ދުވަސްކޮޅެއްކުރިން ލ. އަތޮޅުގައި އޮތް ވިޔަވެތި މަހާސިންތާގައި ހާމަކުރައްވާފައިވާކަމަށެވެ.
"އިހަކަށް ދުވަހު ނިމިގެން ދިޔަ މަހާސިންތާއެއްގައި އެ ވިދާޅުވީ މުޅި ރާއްޖޭގައި ބޮޑެތި ނުރައްކާތެރި ގޭންގުތައް ފެތުރި މުއައްސަސާތަކަށް އެކަންކަން ވަދެ ހިސޯރުކުރާ ހިސާބަށް ގޮސްފައިވާކަން ފާހަގަކުރެވިފައިވާކަމަށް"
މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ
އެކަންކަން ފާހަގަކުރައްވާ އިންތި ވިދާޅުވީ ބޮޑެތި ބަޖެޓުތަށް މުއައްސަސާތަކަށް ދެވޭއިރު، އަދި އެ މައްސަލަތައް ދެނެގަނެވިފައި އޮތް އިރު އެކަށީގެންވާ ފިޔަވަޅު ނޭޅި އޮތުމަކީ ކަންބޮޑުވާކަމެއްކަމަށެވެ. އަދި އެ ކަންކަން ނުބެލި އޮތުމުގެ ސަބަބުން މިއަދު ފުލުހުންނަށް އިންޒާރު ދޭ ހިސާބަށް ކަންކަން ބޮއްސުންލައިގެން ދިއުމަކީ ވަރަށް ބޮޑު ކަންބޮޑުވުމެއްގެ ގޮތުގައި ފާހަގަކުރެއްވިއެވެ.
މުއައްސަސާތަކުން އަދާކުރަން ޖެހޭ ޒިންމާ އަދާކުރުމުގެ އިތުރުން، އަމާންކަން ކަށަވަރުކުރުމުގެ މަސައްކަތް ހަރުދަނާ ކުރުމަށް މުޅި ދައުލަތް ގުޅިގެން މަސައްކަތްތަކެއް ކުރަން ޖެހޭކަމަށް އިންތިގެ ވާހަކައިގައި ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
