ފަލަސްތީނުގައި ލޯބިވެރިޔަކު ހުރިނަމަ އެކަން އިސްރާއިލަށް އަންގަންޖެހޭ ކަމަށް ބުނާ ގަވާއިދަކަށް އިސްރާއިލުގެ އިދާރާތަކުން އަމަލުކުރަން ފަށައިފިއެވެ.

މިއަދު އަމަލުކުރަންފެށި މި ގަވާއިދުގެ ދަށުން ފަލަސްތީނުގެ ރައްޔިތަކާއި ލޯބީގެ ގުޅުން އޮތް އެހެން ގައުމުތަކުގެ ފަރާތްތަކުން 30 ދުވަހުގެ ތެރޭގައި އިސްރާއިލަށް އެކަން އަންގަން ޖެހޭނެއެވެ. މީގެ އިތުރުން ގުޅުން އޮތް ފަލަސްތީނުގެ ފަރާތަކީ އެ ގައުމުގައި ބިން އޮތް ނުވަތަ ވާރުތަ ވާނެ ބިމެއް އޮތް ފަރާތެއްކަންވެސް ހާމަކުރަން ޖެހެއެވެ. ނަމަވެސް މި ގަވާއިދު ގަދަކަމުން ފަލަސްތީނުގެ ބިމުގައި ދިރިއުޅެމުންދާ ޔަހޫދީންގެ މައްޗަށް ނުހިނގާނެ ކަމަށްވެސް ބުނެފައިވެއެވެ.

މީގެ އިތުރުން އަލަށް އަމަލުކުރަން ފެށި ގަވާއިދު ތަކުގެ ސަބަބުން އެހެން ގައުމުތަކުގެ ޕާސްޕޯޓު އޮތް، އަދި އެހެން ގައުމުތަކުގައި ދިރިއުޅޭ ފަލަސްތީނުގެ ރައްޔިތުންނަށް އެ ގައުމަށް ދިއުމުގައިވެސް އިތުރު ދަތިތަކެއް ކުރިމަތިވާނެއެވެ. އެގޮތުން އަމިއްލަ ގައުމަށް ދަތުރު ކުރުމުގެ 45 ދުވަސް ކުރިން އެ ފަރާތްތަކުން އިސްރާއިލުން ވިސާއަށް އެދެން ވަނީ މަޖުބޫރު ކޮށްފައެވެ.

ފަލަސްތީނުގެ މަޝްރަހު ދިރާސާ ކުރާ ފަރާތްތަކުން ބުނާ ގޮތުގައި މިއީ ވީހާވެސް ގިނަ ބަޔަކު ފަލަސްތީނުގެ ބިންތަކުން ފޮނުވާލާ، އެ ބިންތަކަށް ވެރިވެގަތުމަށް އިސްރާއިލުން ކުރަމުންދާ މަސައްކަތެކެވެ. އެގޮތުން ލޯބީގެ ގުޅުން ބާއްވަން ބޭނުންނަމަ ނުވަތަ އާއިލާ އާއި އެކު ދިރިއުޅެން ބޭނުންނަމަ އެހެން ގައުމަކަށް ދިއުމަށް މަޖުބޫރު ކުރުވުމަކީ މި ގަވާއިދު ތަކުގެ ބޭނުން ކަމުގައި ތަޖުރިބާކާރުން ބުނެއެވެ.