ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިދައުރު ރާއްޖޭގެ ތާރީޚުގައި ލިޔެވިގެންދާނީ ސާފުތާހިރު ދިރިއުޅުމަކަށް މަގުފަހިކޮށްދިން ޒަމާނެއްގެ ގޮތުގައި ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ހދ. ނައިވާދޫގައި ފެނުގެ ނިޒާމް އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިހުގެ ސަރުކާރުން ރާއްޖޭގައި އުމްރާނީ ތަރައްގީއަށް މިހާރު ކުރިއަށްގެންދާ މަޝްރޫއުތަކުގެ ތަފްސީލް މިނިސްޓަރު އަސްލަމް ވަނީ ހިއްސާކުރައްވާފައެވެ. އެގޮތުން ވާހަކަދައްކަވަމުން މިނިސްޓަރު ވިދާޅުވީ ރާއްޖޭގެ އެކި ރަށްރަށުގެ އުމްރާނީ ތަރައްގީގެ 18.74 ބިލިއަން ރުފިޔާގެ މަސައްކަތް މިހާރު ވެސް ކުރިއަށްދާ ކަމަށެވެ. 

އެގޮތުން މިސަރުކާރުން ބަނދަރު ހެދުމުގެ 44 މަޝްރޫއެއްގެ މަސައްކަތް ނިންމާފައިވާ ކަމަށާއި ބަނދަރު ހެދުމުގެ 37 މަޝްރޫޢުގެ މަސައްކަތް މިހާރުވެސް ކުރިއަށްދާ ކަމަށް މިނިސްޓަރ ވިދާޅުވިއެވެ. މިއީ 3.6 ބިލިއަން ރުފިޔާގެ މަޝްރޫއު ކަމަށް މިނިސްޓަރ ވިދާޅުވިއެވެ.

މީގެ އިތުރުން 5 ރަށެއްގައި މަގު ހެދުމުގެ މަސައްކަތް ނިމިފައިވާއިރު 21 ރަށެއްގައި މިހާރު ވެސް މަގުހެދުމުގެ މަސައްކަތް ދަނީ ކުރަމުން ކަމަށާ މިއީ 3.7 ބިލިއަން ރުފިޔާގެ މަޝްރޫތައް ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ބިން ހިއްކުމުގެ 7 މަޝްރޫއެއްގެ މަސައްކަތް މިހާރު ނިމިފައިވާ ކަމަށާއި އިތުރު 7 މަޝްރޫއެއްގެ މަސައްކަތް މިހާރު ވެސް ކުރިއަށްދާ ކަމަށެވެ. މިއީ 4.8 ބިލިއަން ރުފިޔާގެ މަޝްރޫތަކެވެ.

ދަތުރުފަތުރުގެ ނިޒާމު ރާއްޖެ ގުޅުވާލުމަށް ކުރިއަށްގެންދާ މަސައްކަތުގެ ތެރެއިން އެއަރޕޯޓް ތަރައްގީކުރުމުގެ 1 މަޝްރޫޢުގެ މަސައްކަތް ނިމި، އިތުރު 3 މަޝްރޫއެއްގެ މަސައްކަތް ކުރިއަށްދާ ކަމަށް މިނިސްޓަރ ވިދާޅުވިއެވެ. އެއީ 840 މިލިއަން ރުފިޔާގެ މަޝްރޫތަކެއް ކަމަށް ވިދާޅުވިއެވެ.

ސަރުކާރުގެ އެންމެ މުހިންމު އެއް ސިޔާސަތު ކަމަށްވާ ސާފު ބޯފެނާއި، ނަރުދަމާގެ މަސައްކަތުގެ ތެރެއިން 11 މަޝްރޫއެއްގެ މަސައްކަތް ނިމިފައިވާއިރު 130 މަޝްރޫއެއްގެ މަސައްކަތް މިވަގުތު ކުރިއަށްދާކަން މިނިސްޓަރ ފާހަގަކުރެއްވިއެވެ. މި މަޝްރޫތަކަށް 5.8 ބިލިއަން ރުފިޔާ ޚަރަދުވާ ކަމަށް މިނިސްޓަރ ވިދާޅުވިއެވެ.

މިނިސްޓަރު ވިދާޅުވީ އެ މަސައްކަތް ތަކަކީ ހަމައެކަނި ހަވާލުކުރެވި މަސައްކަތް ކުރިއަށްދާ މަސައްކަތްތައް ކަމަށާ، އެނޫންވެސް ޓެންޑަރ ކުރުމުގެ މަރުހަލާގައިވެސް އިތުރު އެތައް މަސައްކަތްތަކެއް ހުރި ކަމަށެވެ. 

ރާއްޖޭގެ ހުރިހާ ރަށަކަށް ހަމަހަމައަށް ހިންގަމުން މިދާ މަޝްރޫއުތަކުގެ ސަބަބުން ރައީސް ޞާލިހުގެ މިދައުރު ރާއްޖޭގެ ތާރީޚުގައި ލިޔެވިގެންދާނީ ސާފުތާހިރު ދިރިއުޅުމަކަށް މަގުފަހިވި ބާރަށް ތަރައްގީ ކުރިއަށް ދިޔަ ދައުރެއްގެ ގޮތުގައި ކަމަށްވެސް އަސްލަމް ވިދާޅުވިއެވެ.