މިހާތަނަށް އެއްވެސް ސަރުކާރުން މަސްވެރިކަމުގެ ސިނާއަތަށް އިންވެސްޓު ނުކުރާކަމަށް، އަމިއްލަފުޅަށް އެ ސިނާއަތަށް އިސްވެސްޓުކޮށްފައިވާނެ ކަމަށް މަޖިލީހުގެ މާމިނގިލީ ދާއިރާގެ މެމްބަރު، ޖުމްހޫރީ ޕާޓީގެ ލީޑަރު އަދި މަޝްހޫރު ވިޔަފާރިވެރިޔާ ގާސިމް އިބުރާހިމް ވިދާޅުވެއްޖެއެވެ.
ގާސިމް އިބުރާހިމް މިފަދައިން ވިދާޅުވެފައިވަނީ މަސްވެރިކަމުގެ މޫސުން އަނެއްކާވެސް ބައްދަލުކޮށްފައިވާއިރު، މަސްކިރުމާއި، މަސް ތާޒާކޮށް ބެހެއްޓުމަށް ބޭނުންވާ އައިސް ހޯދުމަށް ބޮޑެތި ތަކުލީފުތަކެއް އުފުލަންޖެހިފައިވާއިރު އެކަންކަން ހައްލުކޮށްދިނުމަށް ސަރުކާރަށް ގޮވާލާ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ހުށައަޅުއްވާފައިވާ ކުއްލި މައްސަލައަށް ބަހުސްކުރައްވަމުންނެވެ.
މަސްވެރިކަމުގެ ސިނާއަތަށް ދިމާވެފައިވާ މައްސަަލަތަކާއި ގުޅިގެން ގާސިމް ވިދާޅުވީ މަސްވެރިކަމުގެ ސިނާއަތަށް ކުރިމަތިވެފައިވާ މައްސަލަ ހައްލުކުރުމަށް ސަރުކާރުތަކުން އެކަށީގެންވާ މަސައްކަތްތަކެއް ކުރެވިފައި ނުވާކަމަށެވެ.
"ރައީސް މައުމޫނުގެ ސަރުކާރުން ކުރެއްވި އިއުލާނާ ގުޅިގެން، ޕްރައިވެޓް ސެކްޓަރަށް [މަސްގަތުން] ދޫކޮށްލައްވައިގެން ކުރެއްވި މަސައްކަތްޕުޅުގެ ދަށުން އަޅުގަނޑު ބައިވެރިވެގެން އަޅުގަނޑު މިއީ އެކަމަށް ވަރަށް ބޮޑު އިންވެސްޓްމެންޓެއް ކޮށްފައިވާ މީހެއް. އާދެ އަޅުގަނޑު ކޮށްފައިވާ އިންވެސްޓްމެންޓަކީ ހަމަ ގައިމު ވެސް އޭރުވެސް އަދި މިހާރަށް ބެލިޔަސް ދިވެހި ސަރުކާރުން މަސްވެރިކަމަށް ކޮށްފައިވާ އިންވެސްޓްމެންޓަށް ވުރެ ބޮޑު އިންވެސްޓްމެންޓެއް"
މާމިނގިލީ ދާއިރާގެ މެމްބަރު ގާސިމް
އޭނާ އަކީ މަސްވެރިކަމުގެ ސިނާއަތަށް ސަރުކާރުތަކުން ކުރި ހޭދައަށްވުރެ ބޮޑު ހޭދައެއް ކޮށްފައިވާ މީހެއްކަމަށް ގާސިމް ވިދާޅުވިއެވެ. އެއާއެކު ވިދާޅުވީ އެހާ ބޮޑު ހޭދައެއް ކުރި ނަަމަވެސް އެ ސިނާއަތު ކުރިއަށް ނުދާކަމަށެވެ. އަދި އެ ސިނާއަތު ކުރި ނާރަނީ އެކި ސަރުކާރުތަކުން އުސޫލުތަކަށް ބަދަލު ގެންނާތީކަމަށް ގާސިމް ވިދާޅުވިއެވެ.
ރައީސް މައުމޫނުގެ ދައުރުގައި މަސްވެރިކަމުގެ ސިނާއަތު ކުރިއެރުވުމަށް ގެންގުޅު އުސޫލަކީ ރަނގަޅު އުސޫލެއްކަމަށާއި، އެ ވެރިކަމަށް ފަހު އުސޫލުތަކަށް ގެނައި ބަދަލުތަކަކީ މަސްވެރިކަމުގެ ސިނާއަތުގެ ކުރިއެރުމަށް އެޅިގެން ދިޔަ ހުރަހެއްގެ ގޮތުގައި ގާސިމް ވަނީ ސިފަކުރައްވާފައެވެ.
"[މަސް ގަނެ އެކްސްޕޯޓްކުރުމުގެ މަސައްކަތް ރަނގަޅަށް ކުރިއަށް ނުދާ] ސަބަބަކަށް ވަނީ މަސްވެރިކަމުން، ކަޅުބިލަ މަހުން ލިބެނީ ވަރަށް ބޮޑު ގެއްލުމަކަށް ވާތީ"
މާމިނގިލީ ދާއިރާގެ މެމްބަރު ގާސިމް
ސްގަނެ އެކްސްޕޯޓްކުރުމުގެ ވިޔަފާރިން ވަނީ ގެއްލުން ކަމަށް ވިދާޅުވެ، އޭގެ މިސާލެއްގެ ގޮތުގައި ގާސިމް ދެއްކެވީ ސަރުކާރުގެ ކުންފުނި މިފްކޯ އެވެ. މިފްކޯ އަބަދުވެސް ހިންގަމުން އަންނަނީ ގެއްލުމުގައި ކަމަށް އޭނާ ވިދާޅުވި އެވެ.
ސަރުކާރުތަކުން ނުކުރާވަރުގެ ބޮޑު އިންވެސްޓުމަންޓެއް މަސްވެރިކަމުގެ ސިނާއަތަށް ކޮށްފައިވާކަމަށް ގާސިމް ވިދާޅުވީ ރާއްޖޭގެ ދެކުނުގެ ވަކި ސަރަހައްދަކުން މަސް ގަތުމުގެ އެކްސްކްލޫސިވިޓީއާއެކީ މާންދޫ ފިޝަރީޒް ކޮމްޕްލެކްސް ހިންގަން، ގާސިމްގެ ވިލާ ގްރޫޕްގެ ސަބްސިޑަޔަރީ ކުންފުނި ހޮރައިޒަން ފިޝަރީޒް އިން ކުރި އިންވެސްޓްމެންޓްގެ ވާހަކައަށެވެ.
އެ މަސައްކަތް ގާސިމްގެ ވިލާ ގުރޫޕުގެ ހޮރައިޒަންއަށް ބިން ދޫކުރިތާ 17 އަހަރުވެގެން ދިޔައިރުވެސް، އެތަނުގައި އެއްވެސް މަސައްކަތެއް ކުރެވިފައި ނުވާކަން ފާހަގަކޮށްލެވެއެވެ. އަދި އެތަނުގައި ހޮރައިޒަނަށް ހަވާލުކުރި ފިޝިން ކޮމްޕްލެކްސްގެ މަސައްކަތް އެ ކުންފުނިން ކުރަމުން ނުދާތީ ދެކުނުގެ މަސްވެރިން ގެންދަނީ ބޮޑެތި ކަންބޮޑުވުންތަކެއް ފާޅުކުރަމުންނެވެ. އަދި އެ ކަންބޮޑުވުންތަކާއެކު މަސްވެރިން ވަނީ ރައީސް ސޯލިހުއަށް ޕެޓިޝަނެއްވެސް ހުށައަޅާފައެވެ.
Advertisement
This content is created and paid for by advertisers and does not involve Voice Journalists
