އައްޑޫ ސިޓީގައި 8000 ޓޫރިސްޓު އެނދު ގާއިމް ކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެވަޑައިގެންނެވި ވައުދާއި އެއްގޮތަށް މަސައްކަތް ކުރިއަށްދާ ކަމަށް އެމަނިކުފާނުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ. 

މިއަދު ކުރިއަށްދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މިއުވާން ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ތިލަދުންމަތީ ގެ ދަތުރުފުޅުގެ ތެރެއިން، ތިލަދުންމައްޗަށް މި ސަރުކާރުން ގެންނަ ކުރިއެރުން ތަކުގެ ސަބަބުން، އެސަރަހައްދަށް އިންވެސްޓަރުންތައް ލިބި، 8000 ޓޫރިސްޓު އެނދު ގާއިމް ކުރެވިގެން ދިޔުމަކީ ރައީސް ޞާލިހުގެ އަމާޒެއް ކަމަށް އެމަނިކުފާނު ވިދާޅުވި ކަމަށެވެ. އެހެން ނަމަވެސް އެ އެނދުތަކަކީ ސަރުކާރުން ގާއިމް ކުރާނެ އެނދެއް ނޫން ކަމަށާ، އެކަން ކުރުމަށް އިންވެސްޓަރުންނަށް ދޭން ޖެހޭ އެންމެހައި އެއްބާރުލުމެއް ސަރުކާރުން ދޭނެ ކަމަށްވެސް އޭނާ ވިދާޅުވިއެވެ. 

މިއުވާން އިތުރަށް ވިދާޅުވީ، ރާއްޖޭގެ އުތުރާއި ދެކުނުގައިވެސް ފަތުރުވެރިން ފުޅާވުމަށް އޮތް އެންމެ ބޮޑު އެއް ހުރަހަކީ ދަތުރު ފަތުރުގެ މައްސަލަ ކަމަށާ، އެހެން ނަމަވެސް އެ ދެ ސަރަހައްދުގައި ވެސް އިންޓަރނޭޝަނަލް އެއަރޕޯޓް އާއި ޑޮމެސްޓިކް އެއާޕޯޓްތައް ގާއިމް ކުރެވުމުން އެ މައްސަލަ ހައްލު ވެގެން ދާނެ ކަމަށެވެ. އަދި ސަރުކާރުން މަސައްކަތް ކުރަމުން ދަނީ އެ ވިސްނުމުގައި ކަމަށްވެސް އޭނާ ފާހަގަކުރެއްވިއެވެ.

"އެނގިވަޑައިގަންނަވާނެ ރާއްޖޭގެ އުތުރާއި ދެކުނުގެ ފަތުރުވެރިކަން ފުޅާވުމަށް އޮތް އެންމެ ބޮޑު ހުރަހަކީ، މައި ދޮރާއްޓެއްގެ ގޮތުގައި ހަމައެކަނި ވެލާނާ އިންޓަރނޭޝަނަލް އެއަރޕޯޓް އޮތުމާއި ގުޅިގެން ދަތުރުފަތުރަށް މިއަންނަ، ވަރަށް ދިގު ދަތުރެއް ކޮށްފައި ގިނަ ފަތުރުވެރިން މި އަންނަނީ. އަނެއްކާވެސް ރާއްޖޭގެ އުތުރާއި ދެކުނަށް ދަތުރު ކުރުމަށް އަނެއްކާވެސް ގިނަ ވަގުތު ތަކެއް މި ހޭދަ ވަނީ. ދަތުރުފަތުރު ކުރުމުގައި މި ހުރި ދަތިތަކާއި އެކު އެ ސަރަހައްދު ތަކުގައި ފަތުރުވެރިކަން ފުޅާވުމަަށް ހުރަސްތަކެއް މި ކުރިމަތިވީ." މިއުވާން ވިދާޅުވިއެވެ.

މިއުވާން ވިދާޅުވީ ހަނިމާދޫ އިންޓަނޭޝަނަލް އެއާޕޯޓް ތަރައްގީ ވުމާއިއެކު އެތަނަށް އިންވެސްޓަރުން އަންނާނެ ކަމަށެވެ. އަދި 8000 އެނދުގެ ވާހަކަ ދައްކާއިރު، އެ ދެކެވެނީ ހަމައެކަނި ރިސޯޓުތަކުގައި އެހާ އެނދު ގާއިމް ކުރާ ވާހަކަ ނޫން ކަމަށާ، އެހެން ނަމަވެސް ރަށްތަކުގެ ގެސްޓް ހައުސް ވިޔަފާރި ފުޅާވެ، އޭގެ ސަބަބުން އިތުރުވާ އެނދުވެސް އޭގެ ތެރޭގައި ހިމެނޭނެކަމަށް މިއުވާން ވިދާޅުވިއެވެ. 

"އައްޑޫގެ އެއާޕޯޓް ތަރައްގީ ކުރުމުގެ މަޝްރޫއު ވެސް އެބަ ކުރިއަަށްދޭ. އެހެންވީމާ މިއާއެކު، މި އެއާރޕޯޓްތައް ޑިވެލޮޕް ކުރެވި، އިންޓަނޭޝަނަލް އެއާލައިން ތަކަށް އެތަނަށް ޚިދުމަތް ދެވޭނެ މަގުފަހިވެ، އަދި ކޮވިޑް ގެ ސަބަބުން މިއައި ކަންތައްތަކަށް ހައްލުލިބިގެން ދިޔައިމަ، މިސަރަހައްދު ތަކުގައި ސަރުކާރުން އެ އަންދާޒާ ކުރާ އަދަދަށް އެނދުތައް ގާއިމް ކުރެވިގެންދާނެ ކަމުގެ ޔަގީންކަން އެބައޮތް. ދެން އަދި އައްޑޫގެ 5 ޓޫރިޒަމް ޒޯން ޑިވެލޮޕް ކުރުމުގެ މަސައްކަތް އެކަންވެސް ކުރިއަށް އެބަދޭ، އިންޑިއާ ސަރުކާރުގެ ކޮމިއުނިޓީ ހައި އިމްޕެކްޓް ޕްރޮޖެކްޓްސް ގެ ތެރެއިން އެ މަޝްރޫއު ކުރިއަށް އެބަދޭ." މިއުވާން ވިދާޅުވިއެވެ. 

މީގެ އިތުރުން، އިންޓަރނޭޝަނަލް އެއަރޕޯޓް ގެ އިތުރުން ޑޮމެސްޓިކް އެއާޕޯޓްތައްވެސް ތަރައްގީވެ ދަތުރުފަތުރުން ރަށްތައް ގުޅާލެވުމުން، އުތުރާއި ދެކުނުގައިވެސް ސަރުކާރުން އަންދޒާ  ކުރާ ވަރަށް ފަތުރުވެރިކަން ކުރިއަރައިގެންދާނެ ކަމަށް މިއުވާން ވިދާޅުވިއެވެ. 

ރާއްޖޭގެ ދެކުނުގެ އައްޑޫ ސިޓީގައި 8،000 އެނދު ޤާއިމުކުރެއްވުމަކީ 2018 ވަނަ އަހަރުގެ ރިޔާސީ އިންތިޚާބުގައި ރައީސް އިބްރާހީމް މުޙައްމަދު ޞާލިޙު ވެވަޑައިގެންފައިވާ ވައުދެކެވެ. ނަމަވެސް މިހާތަނަށް އެ ސަރަހައްދުގައި އެ އެނދު ޤާއިމުކުރެވިފައިނުވެއެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް އެމަނުކުފާނަށް އަންނަނީ އަމާޒުވަމުންނެވެ.