ސަރުކާރުން ފޯރުކޮށްދޭ ބޯހިޔާވަހިކަމުގެ މަޝްރޫއުތަކުގެ ތެރެއިން ފްލެޓުލިބޭ މީހުންގެ 41 އިންސައްތަ މީހުން ކުލި ނުދައްކާކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

އަސްލަމް މިފަދައިން ވިދާޅުވެފައިވަނީ އެމްއޭސީއެލްއިން އެ ކުންފުނީގެ މުވައްޒަފުންނަށް އިމާރާތްކުރި ދެ ޓަވަރުގެ މަސައްކަތް ނިންމާ ފްލެޓުތަކުގެ ތަޅުދަނޑި ހަވާލުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. 

އެ ރަސްމިއްޔާތުގައި ވާހަކަދައްކަވަމުން އަސްލަމް ވިދާޅުވީ ސަރުކާރުގެ އަމާޒަކީ ހުރިހާ ރައްޔިތުންނަށްވެސް ހަމަހަމަކަމާއެކު ބޯހިޔާވަހިކަން ފޯރުކޮށްދިނުންކަމަށެވެ. 

Advertisement

ސަރުކާރުން ހިންގާ ހައުސިން މަޝްރޫއުތަކަކީ ފައިސާ ދައްކައިގެން އެތަން އަމިއްލަ ކުރުމުގެ ފުރުސަތު އޮތް ސްކީމްތަކެއް ނަމަވެސް ފްލެޓް ލިބުނު ގިނަ ބަޔަކު އެތަންތަނަށް ޤަވާއިދުން ފައިސާ ނުދައްކާކަން މިނިސްޓަރ ފާހަގަކުރެއްވިއެވެ. އަދި އެހެން ވުމުގެ ސަބަބުން ދެމެހެއްޓެނިވި ގޮތެއްގައި މަޝްރޫއުތައް ކުރިއަށް ގެންދިއުމަށް ސަރުކާރަށް ބޮޑެތި ގޮންޖެހުންތަކާއި ކުރިމަތިވަމުނދާކަމަށް މިނިސްޓަރު ވިދާޅުވިއެވެ. 

އަސްލަމް ވިދާޅުވީ، މީގެ 30 އަކަށް އަހަރު ކުރިއަށްޖެހިލާއިރު ސަރުކާރުން އަޅާފައިވަނީ ނިސްބަތުން މަދު ފްލެޓްތަކެއްކަމުން، 40 އިންސައްތަ މީހުން ޤަވާއިދުން ފައިސާ ނުދެއްކިނަމަވެސް ސަރުކާރަށް ކެތްކުރެވޭކަމަށެވެ.

އެހެންނަމަވެސް މިހާރު ހާހުން ފްލެޓްތައް އަޅާއިރު، 40 އިންސައްތަ މީހުން ޤަވާއިދުން ކުލި ނުދައްކާނަމަ، މިއީ ދެކޮޅުޖެއްސޭނެކަމެއް ނޫންކަމަށް އަސްލަމްގެ ވާހަކައިގައި ވަނީ ފާހަގަކުރައްވާފައެވެ.