ހުޅުމާލެއިން ގެއްލިގެން ހޯދަމުންދާ ޒުވާނެއްކަމަށްވާ މުހައްމަދު އަޒުހާނުގެ ހަށިގަނޑު ކަމަށް ބެލެވޭ މީހެއްގެ ހަށިގަނޑު ފެނިފައިވާއިރު، އެމީހާގެ ފޯނު ނުފެންނަކަމަށާއި، އެ މައްސަލައިގައި ތުހުމަތުކުރެވޭ މީހަކުވެސް އަދި ނެތްކަމަށް ފުލުހުން ބުނެފިއެވެ.
އެ މައްސަލައާއި ގުޅިގެން ފުލުހުންނަށް މައުލޫމާތު ދެމުން ބުނީ ހަށިގަނޑު ފެނިފައިވަނީ ހުޅުމާލޭ ދެވަނަ ފިޔަވަހީގައި ދިރިއުޅޭ އަޒުހާނު ސެޕްޓެމްބަރު މަހުގެ 18 ގައި ގެއްލިގެން ރިޕޯޓުކުރުމާއި ގުޅިގެން ފުލުހުން ހިންގި އޮަޕަރޭޝަނެއްގައިކަަމަށެވެ.
ހަށިގަނޑު ފެނިފައިވަނީ ހުޅުމާލޭގައި ތަރައްގީކުރަމުން އަންނަ ވޯޓާ ތީމް ޕާކާ ދިމާލުން މަގުގެ އަނެއް ފަޅީގައި އޮންނަ ވަލުގެ ތެރެއިންނެވެ. އެއީ، އަޒުހާން އެންމެ ފަހުން ފެނުނު ކަމަށް ފުލުހުން ބުނެފައިވާ ރެޑް ބުލް ދަނޑު ކައިރި އެވެ.
އެ މައްސަލައާއި ގުޅޭގޮތުން ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގެ ވެރިޔާ، ސުޕްރިންޓެންޑެންޓް ހަސަން ސައީދު ނޫސްވެރިންނަށް ވިދާޅުވީ، އަޒްހާން ކަމަށް ބެލެވޭ މީހާގެ ހަށިގަނޑު ފެނުނު ތަން ބަލައި ފާސްކުރީ މިއަދު ކަމަށެވެ.
އެ ތަން ބަލަން ނިންމީ، އޭނާ ވިދާޅުވި ގޮތުގައި، ސީސީޓީވީ ފުޓޭޖު ބެލި ބެލުމުން، ވޯޓާ ތީމް ޕާކުގެ ކައިރިން އަޒުހާން ފެނިފައި ވާއިރު، އެހެން ސަރަހައްދެއްގެ ފުޓޭޖަކުން އޭނާ ފެނިފައި ނުވާތީކަމަށް ސައުދު ވިދާޅުވިއެވެ.
ނޫސްވެރިއަކު ކުރި ސުވާލަށް ޖަވާބުދެއްވަމުން ސައުދު ވިދާޅުވީ، ފެނުނު މީހާގެ ފޯނު ފެނިފައި ނުވާކަމަށެވެ. އަދި އެ މައްސަލައާއި ގުޅިގެން އަދި އެއްވެސް މީހަކަށް ތުހުމަތު ނުކުރެވޭކަމަށް ފުލުހުން ވަނީ ބުނެފައެވެ.
މިހާރު ކުރިއަށް ދަނީ ތަހުގީގުގެ ކުރީކޮޅު ކަމަށްވުމުން ފުލުހުން އެ ހާދިސާއާއި ގުޅޭ މާބޮޑު ތަފްސީލުތަކެއް ހާމަކޮށްފައެއް ނުވެއެވެ.
އެހެން ނަމަވެސް ފެނިފައިވާ ހަށިގަނޑު ޕޯސްމޯޓަމް ހެދުމަށް ނިންމާފައިވާކަމަށް ފުލުހުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
