ދިވެހިރާއްޖޭގެ ފަތުރުވެރިކަމުގެ ސިނާއަތަށް 50 އަހަރު ފުރުން ފާހަގަކުރާއިރު، މި ސިނާއަތަށް އެންމެ ބޮޑު ގެއްލުމެއް ދިނީ މިހާރު ވެރިކަން ކުރަމުންދާ މައި ޕާޓީ އެމްޑީޕީއިން ކަމަށް ޕީޕީއެމްގެ ނައިބުރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ.
ޝިޔާމު މިފަދައިން ވިދާޅުވެފައިވަނީ ކުރެއްވި ޓްވީޓެއްގައެވެ.
އެގޮތުން ޝިޔާމު ވިދާޅުވީ ރާއްޖޭގެ ޓުއަރިޒަމަށް 50 އަހަރު ފުރުން އެމްޑީޕީ ސަރުކާރުން މިއަދު ފާހަގަކުރާއިރު، އެ ޕާޓީއަކީ ދިވެހިރާއްޖޭގެ ފަތުރުވެރިކަމަށް އެންމެ ބޮޑު ގެއްލުން ދީފައިވާ ސިޔާސީ ޕާޓީކަމަށެވެ.
އެކަން މާޒީގައި އެމްޑީޕީ އަޑިގައި އޮވެގެން ހިންގާފައިވާ ކަންކަމަށް ބަލާލުމުން ފެންނާނެކަމަށް ޝިޔާމު ވިދާޅުވިއެވެ.
"ރާއްޖޭގެ ޓުއަރިޒަމަށް 50 އަހަރު ފުރިގެން އެމްޑީޕީ ސަރުކާރުން އެކަން ފާހަގަކުރާއިރު މާޒީގެ ސަފްހާތައް ބަލާލީމަ އެނގޭ އެންމެ ބޮޑު ހަގީގަތަކީ ދިވެހިރާއްޖޭގެ ޓުއަރިޒަމަށް އެންމެ ބޮޑު ގެއްލުމެއް ދިން ބަޔަކީ އެމްޑީޕީކަން"
ނައިފަރު ދާއިރާގެ މެމްބަރު ޝިޔާމު
ޝިޔާމުގެ އެ ޓްވީޓުގައި ވަނީ އެމްޑީޕީ އިދިކޮޅުގައި އޮތް އިރު ދިވެހިރާއްޖޭގެ ޓުއަރިޒަމް ބޮއިކޮޓް ކުރުމަށް ގޮވާލާ އެ ޕާޓީގެ އިސްވެރިން ދައްކާފައިވާ ބައެއް ވާހަކަތަކާއި ގުޅިގެން ޝާއިއުކޮށްފައިވާ ޚަބަރުތައްވެސް ހިއްސާކުރައްވާފައެވެ.
ރައީސ ޔާމިން އަބްދުލްގައްޔޫމުގެ ވެރިކަމުގައިވެސް އަދި އޭގެ ކުރިން ޑރ މުހައްމަދު ވަހީދު ހަސަން މަނިކުގެ ވެރިކަމުގައިވެސް އެމްޑީޕީއިން ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވާލާފައިވާކަން ފާހަގަކުރެވެއެވެ.
އެހެން ނަމަވެސް އެފަހުން އެ ޕާޓީއިން ވަނީ ރާއްޖޭގެ ފަތުރުވެރިކަން ބޮއިކޮޓު ކުރުމަށް ގޮވާލާ ކެމްޕޭނެއް ކުރިއަށް ގެންދިޔަ ކަމާއި މެދު އިންކާރުކޮށްފައެވެ.
Advertisement
This content is created and paid for by advertisers and does not involve Voice Journalists
