ޓެރަރިސްޓް ޖަމާޢަތްތަކާއި ހަނގުރާމަވެރި ސަރަޙައްދުތަކުގެ ލިސްޓު، މުރާޖަޢާ ކުރުމަށްފަހު ރައީސުލްޖުމްހޫރިއްޔާގެ އޮފީހުން އެ ލިސްޓް އާއްމުކޮށްފިއެވެ. 

ޓެރަރިސްޓް ޖަމާޢަތްތަކާއި، ހަނގުރާމަވެރި ސަރަޙައްދުތަކުގެ ލިސްޓު އާއްމުކޮށް ރައީސުލްޖުމްހޫރިއްޔާގެ އޮފީހުން އިއްޔެ ކުރި އިއުލާނެއްގައި ބުނީ، ޤާނޫނު ނަންބަރު 32/2015 (ޓެރަރިޒަމް މަނާކުރުމުގެ ޤާނޫނު) ގެ 18 ވަނަ މާއްދާގެ (ހ) ގެ ދަށުން، ޤައުމީ ސަލާމަތާބެހޭ މަޖިލީހުގެ މަޝްވަރާގެ މަތިން، ޓެރަރިސްޓް ޖަމާޢަތްތަކާއި ހަނގުރާމަވެރި ސަރަޙައްދުތަކުގެ ގޮތުގައި، 03 އޮކްޓޫބަރު 2021 ގައި ރައީސުލްޖުމްހޫރިއްޔާ ކަނޑައަޅާފައިވާ ލިސްޓު, މުރާޖަޢާ ކޮށްފައިވާކަމަށެވެ. 
އެގޮތުން، ޤައުމީ ސަލާމަތާބެހޭ މަޖިލީހުން ނިންމައިފައިވާ ގޮތަށް އެ ލިސްޓުގައި ޓެރަރިސްޓް ޖަމާޢަތްތައް ހިންގުމަށް ބޭނުންކުރާ އެހެނިހެން ނަންތަކާއި، އެ ޖަމާޢަތެއް ޓެރަރިސްޓު ޖަމާޢަތެއްގެ ގޮތުގައި ކަނޑައެޅުނު ތާރީޚު ހިމެނޭނެކަމަށްވެސް އެ އިއުލާނުގައި ބުނެފައިވެއެވެ.

"....[މި ލިސްޓު] ގެޒެޓުކުރުމަށް ގައުމީ ސަލާމަތާބެހޭ މަޖިލީހުން ނިންމާފައިވާތީ، ޓެރަރިޒަމް މަނާކުރުމުގެ ގާނޫނުގެ 18 ވަނަ މާއްދާގެ ދަށުން ރައީސުލްޖުމްހޫރިއްޔާ ކަނޑައަޅުއްވައިފައިވާ ޓެރަރިސްޓް ޖަމާޢަތްތަކާއި ހަނގުރާމަވެރި ސަރަޙައްދުތަކުގެ ލިސްޓު، ޢާންމުކޮށް އަންގައި އިއުލާނު ކުރީމެވެ." ރައީސް އޮފީހުން ކުރި އިއުލާނުގައި ވިދާޅުވިއެވެ.

މި ލިސްޓުގައި ޓެރަރިސްޓް ޖަމާއަތްތަކުގެ ގޮތުގައި 19 ޖަމާއަތެއް ފާހަފަކޮށްފައި ވެއެވެ. އަދި ހަނގުރާމަވެރި ސަރަހައްދުތަކުގެ ގޮތުގައި ސީރިއާގެ ހުރިހާ ސަރަހައްދެއް ވަނީ ފާހަގަކޮށްފައެވެ.

1. އިސްލާމިކް ސްޓޭޓް އޮފް އިރާޤް އެންޑް ސީރިޔާ (ISIS)

2. އަލް-ގައިދާ (AQ)

3. ޖަބްޙަތު އަލް-ނުސްރާ

4. ލަޝްކަރޭ ތައިބާ

5. އަލް-ގައިދާ އިން ދި އަރަބިއަން ޕެނިންސިއުލަރ (AQAP)

6. އަލް-ޤައިދާ އިން ދި އިސްލާމިކް މަޣްރިބް (AQIM)

7. އަބޫ ސައްޔާފް

8. ބޯކޯ ހަރަމް

9. އަލް ޝަބާބް

10. އަލް-ގައިދާ އިން ދި އިންޑިއަން ސަބްކޮންޓިނެންޓް (AQIS)

11. ތެހްރިކޭ ޠާލިބާން ޕާކިސްތާން (TTP)

12. ޙަރަކާތުލް ޖިހާދު އަލް-އިސްލާމީ (HUJI)

13. ޖައިޝޭ މުޙައްމަދު

14. އިސްލާމިކް ސްޓޭޓް އިން ޢިރާޤް އެންޑް ލާވަންޓް –ޚުރާސަން ޕްރޮވިންސް

15. ނޭޝަނަލް ތައުޙީދް ޖަމާޢަތް

16. ވިލާޔަތް އަލް ސޭލާނީ

17. ޖަމާޢަތު މިއްލަތޭ އިބްރާހީމް

18. ހައިއަތު ތަހްރީރް އަލްޝާމް

19. ޚުއްރާސް އައް ދިން