އިސްތިއުމާރީ އިސްރާއީލުގެ ހަނގުރާމަވެރި ބޯޓުތަކުން އާދީއްތަ ދުވަހު ޣައްޒާގެ ދެ ސަރަހައްދަކަށް ވައިގެ ހަމަލާ ދީ ހަތަރު އަހަރުގެ ފިރިހެން ކުއްޖަކު ހިމެނޭ ގޮތަށް މަދުވެގެން ދެ މީހަކު ޝަހީދުކޮށް ހަތް މީހަކު ޒަޚަމްކޮށްލައިފިއެވެ.

ފުރަތަމަ ހަމަލާ އަމާޒުވީ ޣައްޒާގެ މެދުތެރޭގައި އޮންނަ ޒަވާޔިދާ އަވަށުގެ ޢިމާރާތަކަށެވެ. އެ ހަމަލާގެ ސަބަބުން ވެއްޓުނު ކުނިބުނިތަކާއި ރޮކެޓް އެތިކޮޅުތައް ވަށައިގެން އެތައް މީޓަރަކަށް ފެތުރި މަދުވެގެން ހަ މީހަކު ޒަޚަމްވި ކަމަށް ސިއްހީ ޚިދުމަތްތެރިން ބުނެފައިވެއެވެ. ޒަޚަމްވި މީހުންގެ ތެރޭގައި ހިމެނޭ ހަތަރު އަހަރުގެ މުޙައްމަދު ޢަބްދުއްސަލާމް ޠާހާ ފަހުން ހޮސްޕިޓަލުގައި ފަރުވާ ދެމުންދަނިކޮށް ޝަހީދުވެފައިވެއެވެ.

ދެވަނަ ވައިގެ ހަމަލާ ދީފައިވަނީ ޒަވާޔިދާ ކައިރީގައި އޮންނަ ނުޞައިރާތު ރެފިއުޖީ ކޭމްޕަށް ކަމަށް ފަލަސްޠީނުގެ ޞިއްޙީ އޮފިޝަލުން ބުނެފައިވެއެވެ.

މީގެ އިތުރުން ހޮނިހިރު ދުވަހު ދައިރުލް ބަލަޙު ސިޓީގައި ހަމާސްގެ އިސް ހަނގުރާމަވެރިއެއް ކަމަށްވާ ޝަރީފް އަލް ޙަސްނާތު ހަމަލާ ދީ ޝަހީދުކޮށްލާފައިވާ ކަމަށް އިސްރާއީލު ސިފައިން ބުނެފައިވެއެވެ. ހަމާސްގެ "ބިމު އަޑީގެ ވިއުގަ" އަލުން ބިނާކުރުމުގެ މަސައްކަތް އޭނާ ލީޑުކުރަމުން ދިޔަ ކަމަށް އެ ބަޔާނުގައި ބުނެފައިވެއެވެ.

އެމެރިކާ މެދުވެރިވެގެން 2025 ވަނަ އަހަރުގެ އޮކްޓޫބަރުގައި ހެދި ގަތުލުއާއްމު ހުއްޓައިލުމުގެ އެއްބަސްވުމާ އެކު ބޮޑެތި ކުރިމަތިލުންތައް ހުއްޓުނު ނަމަވެސް އިސްރާއީލުގެ ވައިގެ ހަމަލާތައް ހުއްޓިފައެއް ނުވެއެވެ. އެ އެއްބަސްވުމަށް ފަހު ޣައްޒާގައި 1,280 އަށް ވުރެ ގިނަ ފަލަސްޠީނު ރައްޔިތުން ޝަހީދުވެފައިވާ ކަމަށް ޣައްޒާގެ ޞިއްޙީ އިދާރާތަކުން ބުނެފައިވެއެވެ. 

ހުޅަނގު އައްސޭރިފަށުގައި ވެސް ހާލަތު ގޯސްވެ އިސްރާއީލު ސިފައިން ނާބުލުސް ކައިރީ ޢަސްކަރު ރެފިއުޖީ ކޭމްޕަށް ވަދެ ހިންގި ގަތުލުއާއްމުގައި 14 އަހަރުގެ އިސްލާމް ޢައްޖޫރީ ބަޑި ޖަހައި ޝަހީދުކޮށްލާފައިވެއެވެ.