ރަސްމާލެ ހިއްކުމުގެ މަޝްރޫއު ފެށިގެން އައިއިރު އިދިކޮޅު ފަރާތްތަކުން އެއީ "އަގެއް ނެތް ވެލިގަނޑެއް" ކަމަށް ބުނެ ވާހަކަ ދެއްކި ނަމަވެސް، މިއަދު އެއީ ދައުލަތުގެ އެންމެ ބޮޑު ރައުސުލްމާލު ކަމަށް އެ ފަރާތްތަކުން ވެސް ގަބޫލުކޮށްފި ކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ ޕީއެންސީ މެންބަރު ޙުސައިން އިމްރާން ލަޠީފް (އިއްމު) މިއަދު ވިދާޅުވެއްޖެއެވެ.
އިމްރާން މިހެން ވިދާޅުވީ ރަސްމާލެ މަޝްރޫއުގެ އެއްބަސްވުންތައް ހާމަކުރުމަށް ގޮވާލައި ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހްމަދު ނަސީމް މިއަދުގެ މަޖިލީހަށް ހުށަހެޅުއްވި މައްސަލައިގެ ބަހުސްގައެވެ.
މެންބަރު އިމްރާންގެ ވާހަކައިގައި ވަނީ ކުރީގެ އެމްޑީޕީ ސަރުކާރުން ހިންގި މާލީ މުއާމަލާތްތަކަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ޤާނޫނާ ޚިލާފަށް އަށް ބިލިއަނެއްހާ ރުފިޔާ ޗާޕުކޮށްގެން ފައިސާގެ ނިޒާމުގެ ތެރެއަށް ދޫކޮށްލިއިރު މީކާއީލް ކޮބައިތޯ އިމްރާން ސުވާލު އުފެއްދެވިއެވެ. މީގެއިތުރުން ނ. އަތޮޅުގެ ފަޅުތައް ވިއްކައިގެންނާއި، ތަންތަން 99 އަހަރަށް ކުއްޔަށް ދީގެން ލިބުނު ފައިސާއިން ގިރާވަރު ފަޅުވެސް އެއްކޮށް ނުހިއްކުނު ކަމަށާއި، އެ ފައިސާއަށް ވީގޮތެއް އޭރު އެ ބޭފުޅުން ނުބެއްލެވި ކަމަށް އިމްރާން ވިދާޅުވިއެވެ.
އިދިކޮޅު އެމްޑީޕީން ކުރިން ފާފު އަތޮޅުގައި ހިންގަން އުޅުނު ބޮޑު އިންވެސްޓްމަންޓް ވެސް ރާއްޖެއިން ބޭރުކޮށްލި ކަމަށާއި، މިހާރުވެސް މަސައްކަތް ކުރަމުން ދަނީ ރާއްޖެއަށް ފައިދާއެއް ވާން އުޅޭ ކޮންމެ ކަމަކަށް ހުރަސްއަޅަން ކަމަށް އޭނާ ތުހުމަތު ކުރެއްވިއެވެ.
"ދިވެހިރާއްޖެއަށް އެއްވެސް ފައިދާއެއް ހުރިކަމެއް މިބޭފުޅުން ބޭނުމެއްނުވާނެ. ދިވެހި ރައްޔިތުންނަށް ދިވެހި ދައުލަތަށް ފައިސާއެއް ލިބޭކަށް ބޭނުމެއްނުވާނެ. މިއަދާ ހަމައަށް އީގަލް ހިލްސްގެ މަޝްރޫއު މިތާ ފެށުމަށްޓަކައި އެއްބަސްވުމެއް އަދި ޤާއިމެއްނުކުރެވޭ. އެއްބަސްވުމަކަށް ކުރެވުމުންދާ މަޝްވަރާތަކެއްގެ މައްޗަށް މިހާރު ވާހަކަ ދެކެވެމުން މިދަނީ. މިބޭފުޅުންނަކަށް ހަޖަމެއްނުވޭ،"
އިމްރާން ވިދާޅުވިއެވެ.
އޭނާ އިތުރަށް ވިދާޅުވީ، ރަސްމާލެ ހިއްކަން ފެށުމުން އިހަށްދުވަހު "އެއީ އަގެއް ނެތް ވެލިގަނޑެއް" ކަމަށް ބުނެ ވާހަކަ ދެއްކި ނަމަވެސް، މިއަދު އެ ބޭފުޅުންގެ އަމިއްލަ ދުލުން ރަސްމާލެއަކީ ދައުލަތުގެ އެންމެ ބޮޑު ރައުސުލްމާލު ކަމަށް އެއްބަސްވެފައިވާ ކަމަށެވެ.
"މިއަދު އެބޭފުޅާގެ ހުދު އަމިއްލަ އަނގައިން މިއަދު އެ ވިދާޅުވީ ދިވެހިރާއްޖޭގެ ދިވެހި ދައުލަތުގެ އެންމެ ބޮޑު ރައުސުލްމާލޭ ރަސްމާލެއަކީ. މީ އަޅުގަނޑުމެން މި ދައްކާ ވާހަކަ. މި ރައުސުލްމާލުގެ ބޭނުން މި ޕީއެންސީއިން ކުރާނީ ދިވެހިރާއްޖޭގެ ހުރިހާ ރައްޔިތުންނަށް އެންމެ ފައިދާހުރި ގޮތަށް،"
އިމްރާން ވިދާޅުވިއެވެ.
މީގެއިތުރުން، މި ސަރުކާރަކީ ރައްޔިތުންގެ މަޖިލީހުގެ ސުޕަ މެޖޯރިޓީ އޮތް ޕީއެންސީގެ ސަރުކާރެއްކަން ފާހަގަކުރައްވައި އިމްރާން ވިދާޅުވީ، މި މަޝްރޫއާ ގުޅިގެން ސޮއިކުރެވޭނީ ދެފުށް ފެންނަ ވަރަށް ހާމަކަން ބޮޑު އެއްބަސްވުމެއް ކަމަށެވެ. އަދި އިސްލާމްދީނާއި ގައުމުގެ އެއްބައިވަންތަކަމަށް އުނިކަމެއް އަންނާނެ އެއްވެސް ކަމެއް މަޖިލީހުން ފާސްނުކުރާނެ ކަމުގެ ފުރިހަމަ ޔަގީންކަން ރައްޔިތުންނަށް އޭނާ ދެއްވިއެވެ.
Advertisement
This content is created and paid for by advertisers and does not involve Voice Journalists
