ހުޅުމާލެއިން ގެއްލިގެން ހޯދަމުން ދިޔަ މުހައްމަދު އަޒްހާންގެ ފޯނު ފުލުހުންނަށް ފެނިފައިވާ ކަމަށާ، އޭނާ މަރާލާފައިވާ ކަމުގެ އެއްވެސް ހެއްކެއް އަދި ގަރީނާއެއް މިހާތަނަށް ފެނިފައި ނުވާކަމަށް ފުލުހުން ބުނެފިއެވެ. 

އަޒްހާން ހޯދަން ފުލުހުން ކުރި މަސައްކަތައް ފާޑުކިޔުންތަކެއް އަމާޒުވެފައި ވަނިކޮށް މިރޭ ފުލުހުން ނެރުނު ބަޔާނެއްގައި ބުނީ، ސެޕްޓެމްބަރު 18 ވަނަ ދުވަހުގެ ހެނދުނު 6:00 އިން ފެށިގެން އަޒުހާން ގެއްލިގެން އުޅޭ ކަމަށް ބުނެ ސެޕްޓެމްބަރު 19 ވަނަ ދުވަހުގެ 19:00 ހާއިރު އޭނާގެ ޢާއިލާއިން، ފުލުހުންނަށް އެކަން ރިޕޯޓް ކޮށްފައިވާކަމަށެވެ. 

އަދި މައްސަލަ ފުލުހުންނަށް ހުށަހެޅުމާއި އެކު، މިފަދަ އެހެން މައްސަލަ ތަކުގައިވެސް ފުލުހުން ކަންކުރަމުންދާ އުސޫލުން މާލެއާއި ހުޅުމާލޭގައި ހުންނަ ޕޮލިސް ސްޓޭޝަން ތަކާއި ފުލުހުންގެ އިންޓެލިޖެންސަށް މައުލޫމާތު ހިއްސާ ކޮށްފައިވާނެކަމަށް ފުލުހުންގެ ފުލުހުންގެ ބަޔާނުގައި ބުނެފައިވެއެވެ. 

އަދި އިންޓެލިޖެންސް މެދުވެރިކޮށް ބެލި ބެލުމުން އަޒްހާންގެ ފޯނަށް އެންމެ ފަހުން ރޭންޖް ލިބުނީ ހުޅުމާލޭ ދެވަނަ ފިޔަވަހީގައި ހުންނަ ސެލް ޓަވަރަށް ކަމަށް ފުލުހުން ބުނެފައިވެއެވެ. ނަމަވެސް އަޒްހާންގެ ހަށިގަނޑު ކަމަށް ބެލެވޭ ހަށިގަނޑެއް ފެނުނީ ހުޅުމާލޭ ފުރަތަމަ ފިޔަވަހީގެ ވޯޓާ ޕާކް ތަރައްގީ ކުރާ ސަރަހައްދުންނެވެ.

މީގެ އިތުރުން އަޒުހާން ހޯދުމަށް ފުލުހުން ކުރި މަސައްކަތް ތައް ހާމަކުރަމުން އެ ބަޔާނުގައި ބުނީ، އެ މައްސަލާގައި އަޒުހާން އެންމެ ފަހުން ބައްދަލުވި މީހުންނާއި ސުވާލުކޮށް، އެމީހުން ފޯރުކޮށްދިން މައުލޫމާތާއި، ފުލުހުންގެ ސީސީޓީވީ ފޫޓޭޖް ތަކާއި، އާއްމުންގެ ސީސީޓީވީ ފޫޓޭޖް ތަކާއި، އަދިވެސް އެހެނިހެން ގޮތްގޮތުން މައުލޫތު ތައް ހޯދާފައިވާ ކަމަށެވެ. އަދި އޭގެ އިތުރުން، އަޒުހާން މާލެއަށް ގޮސްފައިވޭތޯ ބެލުމަށް މާލޭގެ ސީސީޓީވީ ފޫޓޭޖް ތައްވެސް ބެލި ކަމަށާ، އަދި އެއްވެސް ރަށަކަށް ފުރައިގެން ދިޔަތޯވެސް ބަލާފައިވާ ކަމަށް އެ ބަޔާނުގައި ފުލުހުން ބުންޏެވެ. 

އެގޮތުން ކުރި މަސައްކަތުން ސެޕްޓެމްބަރު މަހުގެ 18 ވަނަ ދުވަހު ފަތިހު ޓެކްސީއެއްގައި ހުޅުމާލޭ ފޭސް އެކެއް ގައި ހުންނަ ގެސްޓް ހައުސް އަކަށް އޭނާ ދިޔަ ކަމަށް މައުލޫތު ލިބުނު ކަމަށާ، އެ ގެސްޓް ހައުސް އާއި އެ ސަރަހައްދުގައި ހުރި ސީސީޓީވީ ފޫޓޭޖް ތައް އެނަލައިޒް ކޮށް، އެ ސަރަހައްދުގައި ހަރަކާތްތެރިވާ އަވައްޓެރި ފުލުހުންގެ އެހީގައި މައުލޫތު އެއްކޮށްފައިވާ ކަމަށް އެ ބަޔާނުގައި ވެއެވެ.

އެގޮތުން ލިބުނު މައުލޫމާތަކަށް ބިނާކޮށް ސެޕްޓެމްބަރު 26 ވަނަ ދުވަހު ނިރޮޅުމަގުގައި ހުންނަ ސްކޭޓްޕާކު ސަރަހައްދާއި، ވޯޓާ ތީމް ޕާކު އަޅަން ބިން ދޫކޮށްފައިވާ ސަރަހައްދު ބަލައި ފާސްކުރެވުނު ކަމަށް ފުލުހުން ބުނެފައިވެއެވެ.

އަދި އެ މަސައްކަތުގެ ތެރެއިން ސެޕްޓެމްބަރ 30 ވަނަ ދުވަހު ފުލުހުންނަށް ލިބުނު އިތުރު ސީސީޓީވީ ފުޓޭޖްތަކެއްގެ އެހީގައި ލިބުނު މައުލޫމާތުތަކުން ސެޕްޓެމްބަރު 18 ވަނަ ދުވަހުގެ ހެނދުނު ސްކޭޓް ޕާކާ ދިމާ އަތިރި މައްޗަށް އަޒްހާން ފައިބާ މަންޒަރާއި އެއަށްފަހު އަތިރިމަތިން އެއްގަމަށް އަރައިގެން އައިސް ސްކޭޓް ޕާކާ ދިމާއިން ނިރޮޅުމަގަށް ނުކުންނަކަން އެނގިފައިވާ ކަމަށްވެސް ބަޔާނުގައި ވެއެވެ. 

އެ މައުލޫމާތުތަކާއެކު ދެން އަޒުހާން ފެންނާނެ ކަމަށް ބެލެވުނު ތަނާ އެންމެ ކައިރިން ލިބެން ހުރި ސީސީޓީވީ ފޫޓޭޖް ނަގައި ބެލި އިރު، އެ ފޫޓޭޖް ތަކުން އޭނާ ފެނިފައި ނުވާތީ، އަނެއްކާވެސް ސްކޭޓްޕާކު ހިމެނޭ ސަރަހައްދު ބެލުމަށް ތަހުގީގު ކުރާ ޓީމުން ނިންމި ކަމަށް ފުލުހުންގެ ބަޔާނުގައި ބުނެފައިވެއެވެ. 

އަދި އެގޮތުން އެ ސަރަހައްދުގައި ހިންގުނު އޮޕަރޭޝަނެއްގެ ތެރެއިން އޮކްޓޯބަރ 2 ވަނަ ދުވަހު، ވޯޓާ ތީމް ޕާކު ހެދުމަށް ދޫކޮށްފައިވާ ސަރަހައްދާ ދިމާ، ނިރޮޅުމަގުގެ ހުޅަނގު ފަރާތް ބަލައި ފާސްކުރިއިރު، އެ ސަރަހައްދުގެ ވެޔޮ ތަކުގެ ތެރެއިން އަޒުހާންގެ ހަށިގަނޑު ކަމަށް ބެލެވޭ މީހެއްގެ ހަށިގަނޑު ޑީކޮމްޕޯސްވެފައި ވަނިކޮށް ފެނިފައިވާކަމަށް ފުލުހުން ބުންޏެވެ. 

އަދި އިއްޔެ އަޒްހާންގެ ހަށިގަނޑުކަމަށް ބެލެވޭ ހަށިގަނޑެއް ފެނުނު ހިސާބުން ފެށިގެން، ގެއްލިގެން ހޯދާ މީހެއްގެ މައްސަލައަކުން މަރުގެ މައްސަލައަކަށް ތަހުގީގު ބަދަލުކޮށް، ތަހުގީގު ވާނީ ފުޅާކޮށްފައި ކަމަށްވެސް އެ ބަޔާނުގައި ބުނެފައިވެއެވެ. 

މީގެ އިތުރުން އެ ބަޔާނުގައި ބުނީ، އެ ހަށިގަނޑު އިތުރު ތަހުލީލުތައް ހެދުމަށް ރާއްޖެއިން ބޭރަށް ފޮނުވުމުގެ މަސައްކަތް ކުރަމުންދާ ކަމަށާ، އަޒުހާންގެ ފޯނުވެސް މިހާރު ފުލުހުން ހޯދާފައިވާ ކަމަށެވެ. އެހެންނަމަވެސް އެ ފޯނު ފެނުނު ތަނެއް ފުލުހުން ނުބުނެއެވެ. އަދި މިހާތަނަށް ހޯދި ހޯދުންތަކުން އަޒްހާން މަރާލާފައިވާ ކަމަށް ބެލެވޭނެ އެއްވެސް ހެއްކެއް ނުވަތަ ގަރީނާއެއް ވެސް ލިބިފައި ނެތް ކަމަށް ބުނެފައިވެއެވެ.