2019 ވަނަ އަހަރު އެޓާނީ ޖެނެރަލްގެ އޮފީހުން އެކުލަވާލާ ރައީސް އޮފީހަށް ފޮނުވި ނަފްސާނީ ދުޅަހެޔޮކަމާއި ގުޅޭ "މެންޓަލް ހެލްތު" ބިލުގެ ޑްރާފްޓު މަސައްކަތް މިހާރު ނިންމާލެވިފައިވާކަމަށް ރައީސް އޮފީހުގެ ތަރުޖަމާނު މިއުވާން މިހައްމަދު ވިދާޅުވެއްޖެއެވެ. 

މިއަދު ރައީސް އޮފީހުގައި ކުރިއަށް ގެންދިޔަ ޕްރެސް ކޮންފަރެންސްގައި "ވޮއިސް" އިން ވަނީ މެންޓަލް ހެލްޓު ބިލުގެ މަސައްކަތް ގޮސްފައިވާ ހިސާބު ސާފުކޮށްދެއްވުމަށް ތަރުޖަމާނާއި ސުވާލުކުރައްވާފައެވެ. 

އެ ސުވާލަށް ޖަވާބުދެއްވަމުން މިއުވާނު ވިދާޅުވީ މިހާރު އެ ބިލުގެ ޑްރާފްޓު ތައްޔާރުކުރެވިފައިވާކަމަށެވެ. އަދި ވަރަށް އަވަހަށް މަޖިލީހަށް ފޮނުވޭނެކަމަށް އުންމީދުކުރައްވާކަމަށް މިއުވާނު ވިދާޅުވިއެވެ. 

Advertisement

ނަފްސާނީ ސިއްހަތު ނުވަތަ މެންޓަލް ހެލްތަށް ފަރުވާ ކުރެވޭނެ ފަސޭހަ އިންތިޒާމުތައް ހަމަޖެއްސުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވަރަށް މުހިންމު ރިޔާސީ ވައުދުފުޅޭކެވެ. 

ރައީސްގެ އެ ވައުދުފުޅާއި ގުޅޭ ގޮތަށް ފަރުމާކުރެވިފައިވާ ނަފްސާނީ ދުޅަހެޔޮކަމާއި ބެހޭ ބިލު އޭޖީ އޮފީހުން ވަނީ އެކުލަވާލާ 2019 ވަނަ އަހަރު ރައީސް އޮފީހަށް ހުށައަޅާފައެވެ. 

އެ ބިލަކީ ރާއްޖޭގައި ނަފްސާނީ ދުޅަހެޔޮކަން ކުރިއަރުވައި، ނަފްސާނީ ބަލިތަކަށް މުޖުތަމައު އަހުލުވެރިކުރުވުމުގެ މަގްސަދުގައި އެކުލަވާލި ބިލެއްކަމަށް އޭޖީ އޮފީހުން ވަނީ ބުނެފައެވެ. 

ނަފްސާނީ ބަލިތައް ތަހައްމަލުކުރަމުންދާ ފަރާތްތަކަށް ދައުލަތުގެ ހަރަދުގައި ފަރުވާ ދިނުމުގެ ނިޒާމެއް ގާއިމުކޮށް، އެފަދަ ފަރާތްތަކުގެ ހައްގުތައް ރައްކާތެރިކޮށް ހިމާޔަތްކުރުމާއި އަދި އެފަދަ ފަރާތްތަކަށް ލިބިދޭންޖެހޭ ރައްކާތެރިކަމާ ގުޅޭ އުސޫލުތައް މި ބިލުގައި ހިމެނިފައިވާކަމަށް އޭޖީ އޮފީހުން ވަނީ ހާމަކޮށްފައެވެ. 

އެހެން ނަމަވެސް ރައީސް އޮފީހަށް ބިލު ހުށައަޅާފައި އޮންނަތާ 4 އަހަރުވާން ދާއިރު، އަދި ނިންމާލެވިފައިވަނީ ބިލުގެ ޑްރާފްޓުގެ މަސައްކަތްކަތްކަން ރައީސް އޮފީހުގެ ތަރުޖަމާނު ވަނީ ހާމަކުރައްވާފައެވެ. 

އެ ބިލު ލަސްވަމުން ދިއުމާއި ގުޅިގެން ނަފްސާނީ ދުޅަހެޔޮކަން ތަރައްގީކުރުމަށް މަސައްކަތްކުރާ ފަރާތްތަކުގެ ފާޑުކިޔުންތައް ވަނީ ވަރަށް ބޮޑަށް ސަރުކާރަށް އަމާޒުވެގެން ގޮސްފައެވެ.