ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާ ގުޅެން ފޯމް ފުރި 10،000 މީހެެއްގެ މެންބާޝިޕް އިއްޔެ އެ ޕާޓީން ހުށައެޅި ކަމަށް އިލެކްޝަންސް ކޮމިޝަނުން މިރޭ ބުނެފި އެވެ. 

އިލެކްޝަންސް ކޮމިޝަނަށް 10،000 ފޯމް ހުށައަޅާފައިވާ ކަމަށް ޕީޕީއެމުން ބުނި ނަމަވެސް ހަގީގަތުގައި ހުށަހަޅާފައިވާނީ 4000 އެއްހާ ފޯމް ކަމަށް އިލެކްޝަންސް އާއި ހަވާލާދީ މީޑިއާ އަކުން ރިޕޯޓް ކުރުނާއި ގުޅިގެން، އެ ކޮމިޝަންގެ ރައީސް ފުއާދު ތައުފީގު މިރޭ ވިދާޅުވީ ޕީޕީއެމް އިން ގެނައި ފޯމްތައް ގުނާ ނިމިފައިވާ ކަމަށާ އެ ޕާޓީން 10،000 ފޯމް ހުށައެޅި ކަމަށެވެ. 

އަދި އެ ފޯމް ތަކުގެ ސައްހަކަށް ކަށަވަރު ކުރުމުގެ މަސައްކަތް މިހާރު ކުރިއަަށްދާއިރު، ބައެއް ފޯމުތަކުގައި އިސްލާހުކުރަންޖެހޭ ކަންކަން ހުރުމާއި ގުޅިގެން އެކަން ކުރުމަށް އެ ޕާޓީއާއި ހަވާލު ކޮށްފައިވާ ކަމަށްވެސް އޭނާ ވިދާޅުވިއެވެ. އެހެން ނަމަވެސް، އެއްވެސް ފޯމެއް ރިޖެކްޓް ކޮށްފައި ނުވާކަމަށްވެސް އޭނާ ވިދާޅުވިއެވެ. 

ޕީޕީއެމް އިން ބުދަ ދުވަހު އީސީއަށް ހުށަހެޅި ފޯމްތަކާއި ގުޅިގެން މައުލޫމާތު ދެމުން ޕީޕީއެމްގެ ސެކިއުރިޓީ ޖެނެރަލް ޝަކީލް ވިދާޅުވީ، އެޕާޓީން ހުށަހަޅާ 10,000 މެންބަރުންގެ ފޯމުގެ ތެރޭގައި ގިނަ އަދަދަކަށް ސަރުކާރު ހިންގާ މައި ޕާޓީ، އެމްޑީޕީ ދޫކޮށް ޕީޕީއެމާ ގުޅުނު މެންބަރުންވެސް ހިމެނޭ ކަމަށާ، އެއިން ހާމަވަނީ އަދުގެ ސަރުކާރާއިމެދު ރައްޔިތުން ހިތްހަމަ ނުޖެހޭ ކަމަށެވެ. އަދި ކުރިއަށް އޮތް ރިޔާސީ ދައުރުގެ ރައީސުލްޖުމްހޫރިއްޔާ ގެ މަގާމަށް ރައީސް ޔާމީން ބަލައިގެންފައިވާ ކަންވެސް އެއިން ދޭހަވާ ކަމަށް އޭނާ ވިދާޅުވިއެވެ.

އިލެކްޝަންސް ކޮމިޝަންގެ ދަފްތަރު ބުނާ ގޮތުން ޕީޕީއެމްގައި މިވަގުތު ތިބީ 33،264 މެންބަރުންނެވެ. އެ ޕާޓީން ހުށައެޅި 10،000 ފޯމް ސައްހަ ނަމަ 44،000 ވުރެ ގިނަ މެންބަރުން ދަފްތަރުގައި ހިމެނޭނެ އެވެ.