މީހުންގެ ސިއްރުތަކާއި އުނި ސިފަތައް ހާމަ ކޮށްފި މީހާ، އޭނާގެ ގޭތެރޭގައި ފިލައި އޮތަސް، މާތް ﷲ އޭނާ ފަޟީޙަތް ކުރައްވާނެ ކަމަށް ރަސޫލާ ޞޢވ ހަދީޘް ކުރައްވާފައިވާ ކަމަށް މިއަދުގެ ޚުތުބާގައި ބުނެފިއެވެ.
"ތިމާގެ އަޚާ ފަޟީހަތް ކުރުމުން ދުރުހެލިވުން" މައުޟޫއަށް މިއަދު އިއްވި ޚުތުބާގައި ބުނީ، ރިވެތި ސިފަތަކާއި މާތް އަޚްލާޤުގެ ތެރޭގައި އެހެން މީހުންގެ ޢައިބުތަކާއި އުނި ސިފަތައް ވަންހަނާ ކުރުން ހިމެނޭ ކަމަށެވެ. އަދި މާތް ﷲ ސުބުޙާނަހޫވަތަޢާލާ އަކީ އަޅުތަކުންގެ ނުބައި އަމަލުތައް ވަންހަނާ ކޮށްދެއްވާ ރަސްކަލާނގެ ކަމަށާ، ވުމާއެކު އިސްލާމްދީން، މުސްލިމުންނަށް އެމީހުންގެ އައުރަ ނިވާކުރުމަށާއި، އެހެން މީހުންގެ ސިއްރުތައް ރައްކައުކޮށް ސިއްރު ކޮށްދިނުމަށް ގޮވައިލާ ކަމަށްވެސް ޚުތުބާގައި ބުނެފައިވެއެވެ.
ރަސޫލާ ޞޢވ އަހަރެމެންނަށް އަންގަވާފައިވަނީ އަހަރެމެންނަށް ކުރެވޭ ކުށްފާފަތައް ވަންހަނާ ކުރުމަށް ކަމަށް ކަމަށާ، ތިމާ އެފަދަ ކަންކަން ޢާއްމުކޮށް ފައުޅުނުކުރާހާ ހިނދަކު، މާތް ﷲ އިންސާނާގެ އެފަދަ އަމަލުތައް ބޭޒާރު ނުކުރައްވައި ވަންހަނާ ކޮށްދެއްވާނެ ކަމަށްވެސް ޚުތުބާގައި ބުނެފައިވެއެވެ.
މިއާއެކު ޚުތުބާގައި ބުނީ، ފޮރުވައި ވަންހަނާ ކޮށްދިނުމުގެ ތެރޭގައި އަހަރެމެންގެ އަޚަކަށް ކުރެވޭ ނުބައި ކަމެއް ފެންނަ ހިނދު އޭނާއަށް ނަސޭހަތްތެރިވެ އޭނާގެ ކުށް ވަންހަނާ ކޮށްދިނުންވެސް ހިމެނޭކަމަށެވެ. އަދި މުސްލިމުންގެ ސިއްރުތައް ކަޝްފުކޮށް ހާމަކުރަން މަސައްކަތް ކުރާ މީހުންނަށް އަހަރެމެންގެ ރަސޫލާ ޞޢވ އިންޒާރު ދެއްވާފައިވާ ކަމަށްވެސް ޚުތުބާގައި ބުނެފައިވެއެވެ.
"ކީރިތި ރަސޫލާ ޞޢވ ހަދީޘް ކުރައްވާފައިވެއެވެ. ދުލުކުރިން އީމާންކަން ހިތުގެ ތެރެއަށް އަދި ނުވަންނަ މީހުންނޭވެ! ތިޔަބައިމީހުންގެ މުސްލިމުންގެ ޣީބަ ނުބުނާށެވެ! އަދި ތިޔަބައިމީހުން އެބައިމީހުންގެ އުނި ސިފަތަކާއި ސިއްރުތައް ހާމަ ނުކުރާށެވެ! ފަހެ ހަމަކަށަވަރުން އެމީހުންގެ ސިއްރުތަކާއި އުނި ސިފަތައް ހާމަ ކޮށްފި މީހާ، އޭނާގެ ގޭތެރޭގައި ފިލައި އޮތަސް، މާތް ﷲ އޭނާ ފަޟީޙަތް ކުރައްވާނެތެވެ!" ޚުތުބާގައި ބުނެފައިވެއެވެ.
ވުމާއެކު މީހަކަށް މުންކަރާތަކަށް އަރައިގަނެވިއްޖެނަމަ، އޭނާއަށް ނަސޭޙަތް ދީ އޭނާގެ އަތުގައި ހިފައި، ފާފަތަކުން އެއްކިބާވެ ހެޔޮމަގަށް ރުޖޫޢަވުމަށް ބާރުއަޅައި ހިތްވަރު ދިނުމަށް ހުތުބާގައި ނަސޭހަތްތެރިވެފައިވެއެވެ. ނަމަވެސް، ފާޅުކަން ބޮޑު ގޮތެއްގައި ވަކިން ޚާއްސަކޮށް ޙައްދު ކަނޑައެޅިފައިވާ ފާފަތަކަށް އަރައިގަންނަ ފަރާތްތަކުގެ މައްސަލަ ޝަރީޢަތަށް ހުށައެޅި ކުށް ސާބިތުވެއްޖެނަމަ، ޝަރްޢީ ގޮތުން ކަނޑައެޅިފައިވާ ޙައްޤު އަދަބު ދޭންޖެހޭނެއެވެ. އެއީ ވަލިއްޔުލް އަމްރުގެ ޒިއްމާއެއް ކަމަށްވެސް ޚުތުބާގައި ބުނެފައިވެއެވެ.
އަދި ފާފަތައް ފޮރުވައި ވަންހަނާ ކުރުމުގެ މާނައަކީ މުންކަރާތްތަކާ ދެކޮޅު ހެދުން ދޫކޮށްލުމެއް ވެސް ނޫންކަން ބަޔާންކޮށް ޚުތުބާގައި ބުނީ، ފާފަތައް ފޮރުވައި ވަންހަނާ ކުރަންޖެހެނީ އޭގެ ސަބަބުން މީސްތަކުންގެ ސިއްރުތައް ހާމަވެ ފަޟީޙަތްވެގެން ދާނެތީ އާއި އިޚްލާސްތެރިކަމާއެކު ތައުބާވުމުން އެކަންކަން މާތްﷲގެ އިރާދަފުޅުން، ހެޔޮ ކަންކަމަށް ބަދަލުކުރައްވާނެތީ ކަމަށެވެ.
ފާފަތައް ފޮރުވައި ވަންހަނާ ކުރުމުގެ މާނައަކީ އެއްވެސް ޙާލެއްގައި ފާޙިޝް ކަންތަކާއި މުންކަރާތްތަކަށް އަރައިގަތުމަށް ހިތްވަރު ދިނުން ނޫންކަމަށާ، އެއީ މުންކަރާތްތަކާ ދެކޮޅު ހެދުން ދޫކޮށްލުމެއް ވެސް ނޫނ. ކަމަށް ހުތުބާގައި ބުންޏެވެ. އަދި އެކުށަކަށް ކަނޑައެޅިފައިވާ އަދަބު ނުދިނުމެއް ވެސް ނޫން ކަމަށާ، ހަމަ އެހެންމެ، އެއީ މުންކަރާތް ހުއްޓުވޭ ފަދަ ފަރާތެއް މެދުވެރިކޮށް އެކަން ހުއްޓުވުމަށް މަސައްކަތް ނުކޮށް ދޫކޮށްލުމެއް ވެސް ނުމެނޫން ކަމަށްވެސް ޚުތުބާގައި ބުނެފައިވެއެވެ. އެހެންނަމަވެސް ފާފަތަކަށް އަރައިގަނެވޭ މީހާ ފަޟީޙަތް ކުރުމަކީ އިސްލާމްދީނުގައި ހުއްދަ ކަމެއް ނޫން ކަމަށް ޚުތުބާގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
