މާލެ އަތޮޅުގެ ހަ ފަޅެއްގައި ފްލޯޓިން ސިޓީތަކެއް ހަދަން ޑަޗް ޑޮކްލޭންޑްސްއާ ހަވާލުކޮށްފައިވާ އިންޓަގްރޭޓަޑް ޓޫރިޒަމް ޕްރޮޖެކްޓުގެ ފުރަތަމަ ފިޔަވަހީގެ ދަށުން ހަދަމުންދާ ސިޓީގެ ފުރަތަމަ ބްލޮކް ނިންމައި ފޮޓޯ އާންމުކޮށްފި އެވެ.

އެ މަޝްރޫއުގެ ލޯކަލް ކޮންސަލްޓެންޓް އިބްރާހީމް ރިޔާޒް ކުރެއްވި ޓްވީޓެއްގައި ވަނީ ފްލޯޓިން ސިޓީގެ ފުރަތަމަ ބްލޮކް ނިންމައި ފޮޓޯ އާންމުކޮށްފައެވެ. އަދި އެ ތަނުގައި އިތުރަށް ގަސް އިންދުން ވެސް ކުރިއަށް ދާނެ ކަމަށާ، މޫސުން ތަންދިންހާ އަވަހަކަށް މީޑިއާ އާ އާންމުންނަށް ފްލޯޓިން ސިޓީން މަރުހަބާކިޔަން ތައްޔާރުވާކަމަށް އޭނާ ވިދާޅުވިއެވެ. 

މިދިޔަ ސެޕްޓެމްބަރު މަހު ދައުލަތުގެ މީޑިއާއަަށް ރިޔާޒު ދިން އިންޓަރވިއުއެއްގައި ވެސް އޭނާ ވަނީ ވިއްސާރައާއި ގުޅިގެން އާއްމުންނަށް ފްލޯޓިން ސިޓީ ދައްކާލުން ލަސްވެފައިވީ ނަމަވެސް އެމަހުގެ މެދުތެރޭ މޫސުން ރަނގަޅުވާއެކު އެތަނުގެ މޮޑެލްތައް ދައްކާލާނެކަމަށް ވިދާޅުވެފައެވެ. 
ރިޔާޒު އިތުރަށް ވިދާޅުވީ، ފްލޯޓިން ސިޓީ ބަލާލަން ބޭނުންވާ ފަރާތްތަކަށް ނަންނޯޓު ކުރުމުގެ ފުތުސަރު ވެބްސައިޓު މެދުވެރިކޮށް ހުޅުވާލާނެކަމަށާއި، އެތަން ބަލާލަން ދާން ބޭނުންވާ ފަރާތްތަކަށް ޓްރާސްޕޯޓުވެސް ހަމަޖައްސާދެވޭނެކަމަށެވެ. 

ރާއްޖޭގައި ފްލޯޓިން ސިޓީ ތަރައްޤީކުރުމުގެ މަސައްކަތް ކުރިއަށްގެންދަނީ ނެދަލެންޑްސްގެ ޑަޗް ޑޮކްލޭންޑު ކުންފުނިންނެވެ. ފްލޯޓިން ސިޓީގެ ފުރަތަމަ ތަރައްގީކުރަނީ އާރަށާ އެންމެ ކައިރިން އޮންނަ 200 ހެކްޓަރުގެ ފަޅެވެ. އެ ފަޅުގައި ތަރައްގީކުރާ 5000 ހައުސިން ޔުނިޓުގެ މަސައްކަތް ނިމުނު ފެބްރުއަރީ މަހުގެ 10 ގައި ހަވާލުކުރީ ބައިސަން މޯލްޑިވްސްއާ އެވެ.

ބައިސަން އިން ތައްޔާރުކުރި ފުރަތަމަ ބްލޮކު ވަނީ އެކްސްޕީރިއެންސް ސެންޓަރެއްގެ ގޮތުގައި ހުޅުވާލުމަށް ނިންމާފަ އެވެ. އަދި، އަންނަ އަހަރުގެ ދެވަނަ ކުއާޓަރުގައި އަސްލު ޔުނިޓުތައް ނިމޭނެ ކަމަށް އެ މަސައްކަތްކުރަމުންދާ ކުންފުނިން މައުލޫމާތު ދެ އެވެ.

ފްލޯޓިން ސިޓީ ތަރައްޤީކުރަނީ 20000 މީހުންގެ އާބާދީއަކަށް އަމާޒްކޮށެވެ. މާލެއިން ފްލޯޓިންގ ސިޓީއަށް ލޯންޗުގައި 10 މިނެޓުން ދެވޭނެއެވެ. ފްލޯޓިން ސިޓީގެ މިމަޝްރޫޢު ނިމިގެންދާއިރު މިސަރަޙައްދަށް ރިސޯޓުތަކާއި ސިޓީ ހޮޓާތަކާއި ބޮޑެތި ފިހާރަތަކުގެ އިތުރުން ސިއްޙީ ޚިދުމަތާއި ސްކޫލްތައް އައުމާއެކު މިއީ އިތުރަށް އުފެދޭ ވަޒީފާތައްކަމަށް މަސައްކަތުގެ ލޯކަލް ކޮންސަލްޓަންޓް ފާހަގަކުރައްވައެވެ.