އަންނަ ނޮވެމްބަރު މަހު ފަށާ ފުޓުބޯޅަ ވޯލްޑް ކަޕް މުބާރާތުގެ މެޗުތައް ދައުލަތުގެ މީޑިއާއިން ނުދައްކާ ނަމަ އެ މުބާރާތް ބެލުމުން އެތައް ބަޔަކު މަހުރޫމު ވެގެން ދާނެ ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ. 

އަންނަ ނޮވެމްބަރު މަހު ފަށާ ފުޓުބޯޅަ ވޯލްޑް ކަޕް މުބާރާތުގެ ހުރިހާ މެޗެއް އައިސް ޓީވީ އާއި ރާއްޖެ ޓީވީން ދެއްކުމަށް މީޑިއާ ނެޓާއެކު އެއްބަސްވުމާއި ގުޅިގެން ކަންބޮޑުވުން ފާޅުކޮށް ޝިޔާމް ކުރެއްވި ޓުވީޓެއްގައި ވަނީ، ވޯލްޑް ކަޕް ދައުލަތުގެ ޓީވީން ނުދެއްކެންވީ ކީއްވެތޯ ސުވާލު ކުރައްވާފައެވެ. 

"ދައުލަތުން މީޑިޔާ ނެޓަށް ފައިސާދޭވަރު މަދީތޯ؟ ވެނުމަސް ވެނަށްނޫންތޯ؟" ޝިޔާމްގެ ޓުވީޓުގައި ވިދާޅުވިއެވެ.

މިއާއެކު ޝިޔާމް ވިދާޅުވީ، މީޑިޔާނެޓުގެ ޚިދުމަތް ނުލިބޭ އަދި އެޚިދުމަތައް ކެރިފޯރުންތެރިކަން ނެތް އެތައް ރައްޔިތަކު މިރާއްޖޭގައި އެބަތިބި ކަމަށާ، އެހެން އެކަން އޮއްވައި، ދައުލަތުގެ ޓީވީން ނުދައްކައި، މީޑިއާ ނެޓާއި އެކު އެ އެއްބަސްވުން ވުމުން ވާރލްޑުކަޕު ބެލުމުން އެތައްބަޔަކު މަހުރޫމުވެގެން ދާނެކަމަށެވެ. 

ރާއްޖެ ޓީވީ އަދި އައިސް ޓީވީން ވޯލްޑް ކަޕުގެ މެޗުތައް ބެލޭނީ މީޑިއާ ނެޓުގެ ނެޓްވޯކުގެ ތެރެއިންނެވެ. އެހެންކަމުން ޓެރެސްޓްރިއަލް ސިގްނަލް މެދުވެރިކޮށް ވޯލްޑް ކަޕެއް ނުބެލޭނެ އެވެ.