އިންޓަރނޭޝާނަލް އެއިޑް ކެމްޕޭން(އައިއޭސީ)ގެ ފަރާތުން އިންތިޒާމް ކޮށްގެން ބަންގުލަދޭޝްގައި ތިބި ރޮހިންޔާ މުސްލިމުންނަށް އެހީތެރިކަން ފޯރުކޮށްދިނުމަ މިފަހަރު ކުރާ ދަތުރުގައި އެތެރެހަށީގެ ޚާއްސަ ޑޮކްޓަރ، ޑރ. މުޙައްމަދު ޢަލީ ބައިވެރި ވެއްޖެއެވެ.

އައިއޭސީން ފޭސްބުކުގައި ކުރި ޕޯސްޓެއްގައި ބުނީ، އެ ޓީމުގެ ދެ މެމްބަރުން ވަރަށް ޚާއްސަ މެޑިކަލް ކޭމްޕަކަށް އިއްޔެ ބަންގްލަދޭޝްއަށް ފުރާފައިވާ ކަމަށެވެ. އަދި މިފަހަރުގެ ދަތުރުގައި، ޗެއަރމަން އަޙްމަދު އިޤްބާލް އަދި އިންޓަރނޭޝަނަލް ރިލޭޝަންސް ޑިރެކްޓަރ މުޙައްމަދު ޢަލީގެ އިތުރުން މަޝްހޫރު އެތެރެހަށީގެ ޚާއްސަ ޑޮކްޓަރ ، ޑރ.މުޙައްމަދު ޢަލީ ބައިވެރިވާ ކަމަށްް ބުނެފައިވެއެވެ. 

އައިއޭސީން އިތުރަށް ބުނީ، މިދަތުރަކީ އެ ޖަމިއްޔާއިން ކުރާ މިފަދަ ފުރަތަމަ ދަތުރު ކަމަށާ، އަދި މިއީ ދެމެހެއްޓިނިވި ގޮތެއްގައި މިފަދަ ކޭމްޕްތަށް ކުރިއަށް ގެންދިއުމުގެ މަގްސަދުގައި ކުރެވޭ ފުރަތަމަ ދަތުރު ކަމަށެވެ. 

Advertisement

މީގެ އިތުރުން އައިއޭސީން ބުނީ، މިދަތުރުގައި ފަގީރުން ދިރިއުޅޭ ހިސާބުތަކުގައި އަދި ރޮހިންޔާ ރައްޔިތުން ދިރިއުޅޭ ކޭމްޕްތަކުގައި ހިލޭ ޑޮކްޓަރަށް ދެއްކުން ކުރިއަށްދާނެ ކަމަށާ، އެގޮތުން ބަލިމީހުން ބެލުމުގައި ޑރ މުޙައްމަދު ޢަލީ ވެސް ހަރަކާތްތެރިވާނެ ކަމަށެވެ. 

"އަދި މީގެ އިތުރުން ލޮލުގެ ބަލިތަކަށް ކުރެވޭ ފަރުވާ ކުރުމަށް ދަތިވެފައިވާ ފަރާތްތަކަށް އެފުރުސަތު ފަހިކޮށްދެވިގެންދާނެ. ވަރަށް ތަފާތު ދަތުރަކަށްވެގެން ދާނެ. ބައްލަވަމުން ގެންދަވާ." އައިއޭސީން ބުނެފައިވެއެވެ. 

އިންޓަރނޭޝަނަލް އެއިޑް ކެމްޕެއިން (އައިއޭސީ)އަކީ ރާއްޖޭގައި އިންސާނިއްޔަތަށްޓަކައި މަސައްކަތްކުރާ ގިނަ ޖަމްޢިއްޔާތަކެއް އެކުވެގެން ދުނިޔޭގެ އެކި ހިސާބުތަކުގައި ޙާލުގައި ޖެހިފައިތިބި މުސްލިމުންނަށް އެހީތެރިކަން ފޯރުކޮށްދިނުމަށް 2016 ވަނަ އަހަރު އުފައްދާފައިވާ ޖަމިއްޔާއެކެވެ.