ފާއިތުވި ސެޕްޓެންބަރު މަހުގައި މާލެ ސަރަހައްދުގައި 153 ކައިވެނިކޮށްފައިވާއިރު، ހަމަ އެކަނި އެ މަހުގައި ވެސް 102 ވަރިކޮށްފައިވާކަން ފެމެލީ ކޯޓުން ބުނެފިއެވެ. 

ފެމިލީ ކޯޓުން އާއްމު ކޮށްފައިވާ ސެޕްޓެމްބަރު މަހުގެ ތަފާސްހިސާބުތައް ދައްކާ ގޮތުން، ފާއިތުވި ސެޕްޓެންބަރު މަހު ފެމިލީ ކޯޓަށް އެންމެ ގިނައިން ހުށަހެޅިފައިވަނީ ވަރިވުމަށް ހުށަހަޅާފައިވާ މައްސަލަތެކެވެ. އެގޮތުން 134 މައްސަލައެއް ކޯޓަށް ހުށަހަޅާފައިވެއެވެ. އަދި ސެޕްޓެމްބަރު މަސް ނިމުނުއިރު، ނިންމައިނުލެވި 121 ވަރީގެ މައްސަލައެއް އޮތެވެ.

ސެޕްޓެންބަރު މަސް ފެށުނުއިރު 15 ޙަޟާނަތުގެ މައްސަލަ ކޯޓުގައި އޮތްއިރު، އެ މަސް ނިމުނުއިރު ނިންމާފައިވަނީ ފަސް މައްސަލައެވެ. އަދި އަލަށް އެ މަހުގައި ހުށަހެޅުނު މައްސަލަތަކާއެކު ޖުމްލަ 14 މައްސަލައެއް ނުނިމި އޮތެވެ.

ދަރިން ނުދައްކައިގެން ހުށަހެޅި 13 މައްސަލައެއް ސެޕްޓެންބަރު މަސް ފެށުނުއިރު ކޯޓުގައި އޮތްއިރު، ސެޕްޓެންބަރު މަހުގެ ނިޔަލަށް ދަރިން ނުދެއްކުމުގެ 7 މައްސަލައެއް ނުނިމި ކޯޓުގައި އެބައޮތެވެ. ސެޕްޓެމްބަރު މަސްތެރޭގައި އެފަދަ މައްސަލައެއް ހުށަހެޅިފައެއް ނުވެއެވެ. 

ކުޑަކުދިންގެ ހައްގުތައް ރައްކާތެރިކުރުމާ ގުޅޭ އެންމެ މައްސަލައެއް ފާއިތުވި މަހުގައި ކޯޓަށް ހުށަހަޅާފައިވާއިރު، އެ މަސް ފެށުނުއިރު އެ ބާވަތުގެ އެއް މައްސަލަ ކޯޓުގައި އޮތެވެ. އެ ދެ މައްސަލަވެސް ސެޕްޓެންބަރުގައިވަނީ ނިންމާފައެވެ.

މީގެ އިތުރުން، ކުއްޖާ އިޚުތިޔާރުކުރާނެ ފަރާތެއް ކަނޑައެޅުމުގެ 12 މައްސަލައެއް ސެޕްޓެންބަރު މަސް ފެށުނުއިރު ކޯޓުގައި އޮތް އިރު އަލަށް އެ ބާވަތުގެ 2 މައްސަލަ އެ މަހުގައި ކޯޓަށް ހުށަހަޅާފައިވެއެވެ. އެ މަސް ނިމުނުއިރު އެފަދަ 12 މައްސަލަ ނުނިމި ކޯޓުގައި އެބައޮތެވެ.