ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ސަރުކާރުން މަސްވެރިންނަށް ވެފައިވާ ވައުދުތައް ފުއްދަމުން ނުދާ ކަމަށްބުނެ، މަސްވެރިންގެ ހައްގުގައި އަޑު އުފުލުމަށް އިދިކޮޅުން މަސްމާރުކޭޓު ސަރަހައްދަށް އެއްވެ އިހްތިޖާޖު ކުރަން ފަށައިފިއެވެ. 

އިދިކޮޅުން މިހާރު ކުރިއަށް ގެންދާ މި އިހްތިޖާޖު ގެ ތެރެއިން މުޒާހަރާގެ ބައިވެރިން ތިބީ ތަފާތު އެކި ޝުޢޫރުތައް ފާޅުކޮށްފައިވާ ބޯޑުތައް ހިފައިގެންނެވެ. އެގޮތުން ރައީސް ޞާލިހުގެ ގޭދޮށު މަސްފެކްޓަރީގެ ވައުދަށް ފާޑު ކިޔާފައިވާއިރު، މިއީ ތިން ކިޔޫ ސަރުކާރެއް ކަމަށް ބުނާ ބޯޑުތަކުގެ އިތުރުން، ރައީސް ޞާލިހުގެ އިސްތިއުފާއަށް ވެސް އިދިކޮޅުން ވަނީ ގޮވާލާފައެވެ. މީގެ އިތުރުން، ރައީސް ޞާލިހުގެ މި ވެރިކަމުގައި މަސްވެރިން 'އިދަ ޖައްސައިފި' ކަމަށްވެސް އިދިކޮޅުން ވަނީ ބުނެފައެވެ. 

މި މުޒާހަރާ އާއި ގުޅިގެން މައުލޫމާތު ދެއްވަމުން އިދިކޮޅު ޕީޕީއެމްގެ ހަރަކާތު ކޮމިޓީގެ ރައީސް މުހައްމަދު އިސްމާއިލް އިއްޔެ ވިދާޅުވީ، 2018 ވަނަ އަހަރު ރިޔާސީ އިންތިހާބު ކާމިޔާބުކުރަން މިހާރު ސަރުކާރުގައި ތިބި ފަރާތްތަކުން ވަރަށް ގިނަ ވައުދުތަކެއް މަސްވެރިންނަށް ވެފައިވާ ކަމަށެވެ.

Advertisement

އެގޮތުން ބާނާ މަހަށް ހަމަ އަގު ހޯދާ ދިނުމާއި މަސްވެރީންނަށް ހާއްސަ ޕްލެޓްފޯމްތަކެއް ގާއިމު ކުރުމާއި ތެލުގެ އަގު ހެޔޮ ކުރުމުގެ ވައުދުވި ކަމަށާއި ނަމަވެސް މި ވެރިކަމަށް ހަތަރު އަހަރު ފުރެންދާއިރު މަސްވެރި އާއިލާތައް ދަނީ ނިކަމެތިވަމުން ކަމަށް މުހައްމަދު ވިދާޅުވި އެވެ.

މަސްވެރި އާއިލާތައް ނިކަމެތިވަމުންދާއިރު ހިމޭނުން، މަޑުން ތިބެވެން ނެތް ކަމަށާއި، ސިޔާސީ ޕާޓީއެއްގެ ގާނޫނުގައި ބުނާ ގޮތުން އިދިކޮޅުން ސަރުކާރު ޖަވާބުދާރީ ކުރުވުމަށްޓަކައި މަސައްކަތްތަކެއް ކުރަން ޖެހޭ ކަމަށްވެސް އޭނާ ވިދާޅުވިއެވެ. އެހެން ކަމުން މިއަދުގެ އިހްތިޖާޖަކީ އެ ޒިންމާ އަދާކުރުމުގެ ގޮތުން ބާއްވާ އިހުތިޖާޖެއް ކަމަށްވެސް އޭނާ ވިދާޅުވި އެވެ.