ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ސަރުކާރުން މަސްވެރިންނަށް ވެފައިވާ ވައުދުތައް ފުއްދަމުން ނުދާ ކަމަށްބުނެ، މަސްވެރިންގެ ހައްގުގައި އަޑު އުފުލުމަށް އިދިކޮޅު ޕީޕީއެމް/ޕީއެންސީން މަސްމާރުކޭޓު ސަރަހައްދަށް އެއްވެ ކުރި އިހްތިޖާޖުގެ ތެރެއިން 10 މީހަކު ހައްޔަރުކޮށްފިއެވެ.
"ލޭނާރު" ނަމުގައި އިދިކޮޅުން މިއަދު ކުރިއަށް ގެންދިޔަ މި އިހްތިޖާޖު ގެ ތެރެއިން މުޒާހަރާގެ ބައިވެރިން ވަނީ ރައީސް ޞާލިހު މަސްވެރިންނަށް ވެފައިވާ ވައުދުތައް ނުފުއްދޭ ކަމަށް ބުބެ، އެމަނުކުފާނުގެ އިސްތިއުފާއަށް ގޮވާލާފައެވެ. މީގެ އިތުރުން، ރައީސް ޞާލިހުގެ މި ވެރިކަމުގައި މަސްވެރިން 'އިދަ ޖައްސައިފި' ކަމަށްވެސް އިދިކޮޅުން ވަނީ ބުނެފައެވެ.
އިދިކޮޅުން މަސްވެރިންގެ ހައްގުގައި ކުރި މި މުޒާހަރާ ފެށިތާ މާގިނައިރެއް ނުވެ ފުލުހުން ވަނީ މުޒާހަރާގެ ބައިވެރިންނަށް ކުރިއަށް ނުދެވޭނެ ގޮތަށް ބެރިކޭޑް ޖަހާ އެ ސަރަހައްދު ބަންދުކޮށްފައެވެ. އަދި ބެރިކޭޑް ހިފައިގެން ކަރުނަ ގޭސް ބޭނުންކޮށްގެން ފުލުހުން އެ މުޒާހަރާ ރޫޅައިލައިފައިވާއިރު އެ މުޒާހަރާގެ ބައިވެރިންގެ ތެރެއިން 10 މީހަކު ހައްޔަރު ކޮށްފައިވާ ކަމަށްވެސް ޕީޕީއެމްގެ އިސް ތަރުޖަމާނު ހީނާ ވަލީދު ވިދާޅުވިއެވެ.
މި މުޒާހަރާ އާއި ގުޅިގެން މައުލޫމާތު ދެއްވަމުން އިދިކޮޅު ޕީޕީއެމްގެ ހަރަކާތު ކޮމިޓީގެ ރައީސް މުހައްމަދު އިސްމާއިލް އިއްޔެ ވިދާޅުވީ، 2018 ވަނަ އަހަރު ރިޔާސީ އިންތިހާބު ކާމިޔާބުކުރަން މިހާރު ސަރުކާރުގައި ތިބި ފަރާތްތަކުން ވަރަށް ގިނަ ވައުދުތަކެއް މަސްވެރިންނަށް ވެފައިވާ ކަމަށެވެ.
އެގޮތުން ބާނާ މަހަށް ހަމަ އަގު ހޯދާ ދިނުމާއި މަސްވެރީންނަށް ހާއްސަ ޕްލެޓްފޯމްތަކެއް ގާއިމު ކުރުމާއި ތެލުގެ އަގު ހެޔޮ ކުރުމުގެ ވައުދުވި ކަމަށާއި ނަމަވެސް މި ވެރިކަމަށް ހަތަރު އަހަރު ފުރެންދާއިރު މަސްވެރި އާއިލާތައް ދަނީ ނިކަމެތިވަމުން ކަމަށް މުހައްމަދު ވިދާޅުވި އެވެ.
މަސްވެރި އާއިލާތައް ނިކަމެތިވަމުންދާއިރު ހިމޭނުން، މަޑުން ތިބެވެން ނެތް ކަމަށާއި، ސިޔާސީ ޕާޓީއެއްގެ ގާނޫނުގައި ބުނާ ގޮތުން އިދިކޮޅުން ސަރުކާރު ޖަވާބުދާރީ ކުރުވުމަށްޓަކައި މަސައްކަތްތަކެއް ކުރަން ޖެހޭ ކަމަށްވެސް އޭނާ ވިދާޅުވިއެވެ. އެހެން ކަމުން މިއަދުގެ އިހްތިޖާޖަކީ އެ ޒިންމާ އަދާކުރުމުގެ ގޮތުން ބާއްވާ އިހުތިޖާޖެއް ކަމަށްވެސް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
