ދީނީ އެކި މައުލޫމާތު ތައް އާއްމުންނަށް ފޯރުކޮށްދިނުމަށް "ސަމީކް ޕްރައިވެޓް ލިމިޑެޓް" އިން ހިންގާ "ދާރިސް" ނަމުގައި ޓީވީ ޗެނަލެއް އިއްޔެ ރަސްމީކޮށް ފަށައިފި އެވެ.

"ދާރިސް" ގެ ހިދުމަތް ރަސްމީކޮށް ފަށާފައިވަނީ އިއްޔެ ހަވީރު 4:00 ޖެހިއިރު އެވެ. ދިރާގު ޓީވީގެ 13 އިން އެ ޗެނަލް ފެނެ އެވެ.

ދީނީ މައުލޫމާތުތަކަށް އިސްކަން ދީގެން ހިންގާ މި ޗެނަލުން އިޖްތިމާއީ ދާއިރާ އާއި އިގްތިސޯދީ، ތައުލީމީ އަދި ކުޑަކުދީންނާއި އަންހެނުންނަށް ހާއްސަ ޕްރޮގްރާމްތައް ވެސް ގެނެސްދޭނެ އެވެ.

Advertisement

"ދާރިސް" ހިންގުމުގައި އިސްކޮށް ހުންނެވި, ޖަމިއްޔަތުއްސަލަފް ގެ ޗީފް މާކެޓިންގ އޮފިސަރ އަލީ ރަމީޒު "ވޮއިސް" އަށް މައުލޫމާތު ދެއްވަމުން ވިދާޅުވީ، މިވަގުތު އެ ޗެނަލްގެ އޮންއެއާ ކުރިއަށް ގެންދަނީ ހަވީރު ހަތަރަކުން ރޭގަނޑު 10:30 އަށް ކަމަށެވެ. އެހެންނަމަވެސް އަދި އަންނަ ހޮނިހިރު ދުވަހު އެ ޗެނަލް އިފްތިތާހު ކުރަން ބާއްވާ ހާއްސަ އިވެންޓާއެކު އޮންއެއާ ކުރާ ވަގުތު އިތުރު ކުރަން ނިންމާފައިވާ ކަމަށްވެސް އޭނާ ވިދާޅުވިއެވެ.

"ދާރިސް" ގެ ހިދުމަތް އިއްޔެ ފެށުމާއެކު ދީނީ ޕްރޮގްރާމްތަކާއި ކުޑަކުދީންނާއި ހާއްސަ އަދި ތައުލީމީ ދާއިރާއަށް ހާއްސަ ޕްރޮގްރާމްތައް ވަނީ ދައްކަން ފަށާފަ އެވެ. އެގޮތުން މަތީ ގުރޭޑްތަކުގެ އިމްތިހާނުތަކަށް ދަރިވަރުންނަށް އެހީތެރިވެ ދިނުމަށް ހާއްސަ ޕްރޮގްރާމެއްވެސް އެ ޗެނަލުން ވަނީ ފަށާފަ އެވެ. އަދި "ދާރިސް" ޓީވީ މެދުވެރިކޮށް ރާއްޖޭގެ ފުންނާބު އުސް ގިނަ ދީނީ އިލްމުވެރީންގެ ނަސޭހަތް ތަކާއި އެނޫންވެސް ޕްރޮގްރާމްތައް ފެނިގެން ދާނެއެވެ.