ކުޑަކުއްޖެއްގެ ގައިގާ ފިހިގަނޑަކުން ތަޅާ އަނިޔާކުރި މައްސަލަ ސާބިތުނުވާކަމަށް ކްރިމިނަލް ކޯޓުން ހުކުމް ކޮށްފި އެވެ.

މި މައްސަލާގައި ދައުލަތުން ދައުވާ ކޮށްފައިވަނީ ދަފްތަރު ނަންބަރު ރސ 8905، އާމިނަތު ހަސަން ނަމަކަށް ކިޔާ އަންހެނެއްގެ މައްޗަށެވެ. 

އެގޮތުން، 2018 ވަނަ އަހަރުގެ މާރިޗު މަހުގެ 27 ވަނަ ދުވަހުގެ ރޭގަނޑުގެ ވަގުތެއްގައި، ކުޑަކުއްޖާ ފެންވަރަން އުޅެނިކޮށް، ފިހިގަނޑަކުން ކުއްޖާގެ ގައިގައި ތަޅައި އަނިޔާކޮށްފައިވާތީއާއި އޭގެ ސަބަބުން ކުއްޖާއަށް އަނިޔާވެފައިވާތީ، ދިވެހިރާއްޖޭގެ ގާނޫނުލްއުގޫބާތުގެ ދަށުން ދައުލަތުން އޭނާގެ މައްޗަށް ގައިގާ އަތްލުމުގެ ކުށުގެ ދައުވާކުރިއެވެ.

އެ މައްސަލައަކީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށްވާތީ މައްސަލަ ގެންގޮސްފައިވަނީ ސިއްރުންނެވެ. އަދި މައްސަލައިގެ ތަފްސީލެއް ކޯޓުން ހާމައެއް ނުކުރާއިރު ކުއްޖާއާއި އާމިނަތު ހަސަން އާއި އޮތް ގުޅުމެއްވެސް ހާމައެެއް ނުކުރެ އެވެ. ނަމަވެސް އޭނާ ކުއްޖާއަށް އަނިޔާކޮށްފައިވަނީ އޭނާ ދިރިއުޅޭ ގޭގެތެރޭގަ ކަމަށް ބުނެފައިވެއެވެ. 

އެމައްސަލަައިގެ ހުކުމްކުރުމުގެ އަޑުއެހުމުގައި ކޯޓުން އިއްޔެ ކުރި ހުކުމުގައި ބުނެފައިވަނީ، އަންހެންމީހާގެ މައްޗަށް ދައުލަތުން ދަޢުވާކުރި ގައިގާ އަތްލުމުގެ ކުށުގެ ދަޢުވާ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއްނެތް މިންވަރަށް ޝަރީޢަތަށް ސާބިތު ނުވާކަމަށެވެ. 

މިމަހުގެ 4 ވަނަ ދުވަހުވެސް ހއ.ވަށަފަރު / މަލަ، އާމިނަތު ޝުޢައިބާ، ނަމަކަށް ކިޔާ މީހަކު ކުޑަ ދެ ކުދިން ގައިގައި އަތުންނާއި، އެއްޗެހި ހިއްކަން އަޅާ ކޮނޑުން ތަޅައި އަނިޔާކުރި މައްސަލައެއްވެސް އަންހެން މީހާގެ މައްޗަށް ސާބިތު ނުވާކަމަށް ކްރިމިނަލް ކޯޓުން ވަނީ ހުކުމް ކޮށްފައެވެ. 

އެގޮތުން ދައުލަތުން އޭނާގެ މައްޗަށް ދަޢުވާކުރި ގައިގާ އަތްލުމުގެ ކުށުގެ ދަޢުވާ ސާބިތުކުރުމަށް ދައުލަތުން ހުށަހެޅި ހެކިޤަރީނާއިން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކޮށްފައިވާ ފަދައިން، މީހަކު ކުށެއް ކޮށްފިކަން އެކަށީގެންވާ މިންވަރެއްގެ ޝައްކެއްނެތް ޝަރީޢަތަށް ސާބިތުކުރުމަށް ބޭނުންވާ މިންވަރަށް ޝަރީޢަތަށް ހެކިޤަރީނާ ލިބިފައިނުވާތީ، މި ދަޢުވާ ޝަރީޢަތަށް ސާބިތުނުވާކަމަށް ހުކުމުގައި ވެއެވެ. 

ކުޑަކުދިންނާއި ބެހޭ މިފަދަ ކުށްތަކުން ގިނަ މީހުން ސަލާމަތް ވަނީ އެކަށިގެންވާ ވަރަށް ހެކި ނުހޯދޭތީއެވެ.